الەۋمەتتىك جەلىدە Magnum جەلىسىنە قاراستى دۇكەندەردىڭ بىرىندە تۇسىرىلگەن ۆيدەو قىزۋ تالقىعا ءتۇستى. كادرلاردا كۇرىش سالىنعان كونتەينەردىڭ ىشىندە مىسىقتىڭ ءناجىسى جاتقانىن، ال ءدال سول كونتەينەردىڭ ۇستىندە ەكى مىسىق وتىرعانىن كورۋگە بولادى، دەپ حابارلايدى اqshamnews.kz ءتىلشىسى.
بۇل ۆيدەونىڭ استىنا پىكىر قالدىرعان دۇكەننىڭ رەسمي اككاۋنتى وقيعانى راستادى.
"بۇل ۆيدەو حالىقتىڭ اشۋىن تۋىدىرعانىن تۇسىنەمىز. ىشكى تەكسەرۋدەن كەيىن ءبىز وقيعانىڭ ءمان-جايىن تۇگەل تەكسەردىك. تۇندە دۇكەن قىزمەتكەرلەرى تاۋار قابىلداپ العان. تاۋار قابىلداناتىن اۋماقتىڭ ەسىگىنەن ەكى مىسىق ەشكىمگە كورىنبەي كىرىپ كەتكەن. نەگىزىندە، ءبىزدىڭ ءداندى-داقىلدار سالىنعان كونتەينەرلەرىمىزدىڭ قاقپاعى ۇنەمى جابىق تۇرادى. تاڭەرتەڭ دۇكەنگە كەلگەن ادامداردىڭ بىرەۋى كونتەينەردىڭ بەتىن اشىق تاستاپ كەتىپتى. سول كەزدە كونتەينەردىڭ ىشىنە مىسىق كىرىپ كەتكەن"، - دەپ تۇسىندىرگەن دۇكەن وكىلدەرى.
مىسىقتىڭ ءناجىسى تابىلعاننان كەيىن دۇكەننىڭ اكىمشىلىگى كۇرىشتى توگىپ، كونتەينەردى تازالاعان كورىنەدى. دۇكەننىڭ ءىشىن دە زالالسىزداندىرىپ، تاۋارلاردىڭ ءبارىن تەكسەرىپ شىققان.
"جانۋارلاردى قورعايتىن ۆولونتەرلەرگە حابارلاسىپ، ەكى مىسىقتى جاقسى ادامنىڭ قولىنا تابىستاعىمىز كەلگەن. ءبىراق، مىسىقتاردى تابا الماي جاتىرمىز. ال، بۇنداي جاعداي ءبىرىنشى رەت باسىمىزدان ءوتىپ جاتقان سوڭ، تاۋار قابىلدايتىن اۋماق، ونى قابىلداپ العان قىزمەتكەرلەرگە قاتىستى قانداي شەشىم شىعاراتىنىمىزدى بىلمەيمىز. ءبىراق، امالىن تاباتىنىمىزعا سەنىمدىمىز"، - دەپ جازعان دۇكەن اكىمشىلىگى.