شىمكەنتتە جوعالعان ءجاسوسپىرىم قىز تابىلدى

بۇعان دەيىن ءجاسوسپىرىم 3 رەت ۇيىنەن كەتىپ قالىپ، پوليسەيلەر ونى اناسىنا قايتا تاپسىرعان.

شىمكەنتتە كريمينالدىق پوليسيا باسقارماسىنىڭ قىزمەتكەرلەرى جوعالىپ كەتكەن انەلدى ىزدەپ تاپتى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

ەستەرىڭىزگە سالا كەتەيىك، 30 جەلتوقساندا اباي اپب-عا جەرگىلىكتى تۇرعىن كامەلەتتىك جاسقا تولماعان قىزى جوعالعانى تۋرالى شاعىمدانعان بولاتىن. بەلگىلى بولعانداي، قىز تۋىستارىمەن جانجالداسىپ، ۇيىنەن شىعىپ كەتكەن.

بۇعان دەيىن ءجاسوسپىرىم ءۇش رەت ۇيىنەن كەتىپ قالىپ، پوليسەيلەر ونى اناسىنا قايتا تاپسىرعان. 

شىمكەنت قالاسى پد-نىڭ جەدەل ۋاكىلدەرى، ۋچاسكەلىك ينسپەكتورلار مەن ەرىكتىلەر جوعالعان قىزدى جەتى كۇن بويى توقتاۋسىز ىزدەدى. بالانى ىزدەۋ جۇمىستارى پوليسيا دەپارتامەنتى باسشىلىعىنىڭ جەكە باقىلاۋىندا بولدى. 

ىزدەستىرۋ جۇمىستارىنىڭ ناتيجەسىندە جەدەل ۋاكىلدەر ءجاسوپىرىمدى تەمىرجول ۆوكزالىنان تاپتى. 

انىقتالعانداي، انەل بۇل كۇندەرى بەيتانىس ادامداردىڭ ۇيىندە جاسىرىنعان. ءوز بەتىنشە جۇمىسقا ورنالاسۋعا تىرىسقان. كامەلەتكە تولماعان قىزدىڭ ايتۋى بويىنشا، ۇيدەن قاشۋعا ونىڭ اناسىنىڭ ءجيى ۇرىپ-سوعۋى سەبەپ بولعان. ءجاسوسپىرىم ۇيگە بارۋدان تۇبەگەيلى باس تارتىپ وتىر. 

قازىرگى تاڭدا اكىمدىك، ءبىلىم باسقارماسى جانە پوليسيا قىزمەتكەرلەرى تاراپىنان ارنايى كوميسسيا قۇرىلدى. ولار اناسىن اتا-انا قۇقىعىنان ايىرۋ تۋرالى قۇجاتتاردى جينايدى. بۇل ۋاقىت ارالىعىندا قىز كامەلەتكە تولماعانداردى بەيىمدەۋ جانە وڭالتۋ ورتالىعىنا ورنالاستىرىلادى.