مۇز ايدىنىندا اۋىر جاراقات العان 14 جاستاعى قىز قارقىندى تەراپيا بولىمىنە جاتقىزىلدى
الماتىدا سىرعاناق تەپكەن ءتورت بالا اۋىر جاراقات الدى. دارىگەرلەر الماتىلىقتاردى دەمالىستا قاۋىپسىزدىك ەرەجەلەرىن ساقتاۋعا شاقىرادى، دەپ حابارلايدى Almaty-akshamy.kz قازاقپاراقا سىلتەمە جاساپ.
جاڭاجىلدىق مەرەكە كۇندەرى بالالار شۇعىل مەديسينالىق كومەك كورسەتۋ ورتالىعىنا 14 جاسار ەكى بالا، 16 جانە 6 جاستاعى بارلىعى ءتورت بالا ءتۇستى.
توبەشىكتەن جوعارى جىلدامدىقپەن سىرعاناپ كەلە جاتقان التى جاسار بالا باسقا بالامەن سوعىلىپ قالعان.
«سالدارىنان كىشكەنتاي بالا جابىق باس سۇيەك-مي جاراقاتىن الىپ، سول جاق توبە سۇيەگىنىڭ جەلىسى سىندى. جازىق ەپيدۋرالدى گەماتوما دياگنوزى قويىلدى. قازىرگى كەزدە بالا جانساقتاۋ بولىمىندە جاتىر»، - دەيدى الماتى قالاسى بالالار شۇعىل مەديسينالىق كومەك كورسەتۋ ورتالىعى تراۆماتولوگيا بولىمشەسىنىڭ مەڭگەرۋشىسى باقىت قوجاحانوۆ.
مۇز ايدىنىندا اۋىر جاراقات العان 14 جاستاعى قىز قارقىندى تەراپيا بولىمىنە جاتقىزىلدى، جاعدايى تۇراقتانعاننان كەيىن مامانداندىرىلعان بولىمشەگە اۋىستىرىلدى.
«مۇز ايدىنىندا بورتپەن سوقتىعىسۋ سالدارىنان ءجاسوسپىرىمنىڭ كوكباۋىرى جارىلىپ، ىشىنە قان كەتىپ، ءىشى تۇيىق جاراقات العان. وتا جاسالدى، ءقازىر بالانىڭ جاعدايى تۇراقتى، بولىمشەدە باقىلاۋدا جاتىر. اتا-انالارعا سپورتتىڭ كەز كەلگەن ءتۇرى جانە اشىق اۋادا وتكىزىلەتىن ءىس-شارالار كەزىندە قاۋىپسىزدىك ەرەجەلەرىن مۇقيات ساقتاۋ كەرەك ەكەنىن ەسكەرتەمىن»، - دەيدى دارىگەر حيرۋرگيا بولىمشەسىنىڭ مەنگەرۋشىسى ەرلان جۇسىپبەكوۆ.
مۇز ايدىنىندا جاراقات العان تاعى ءبىر ناۋقاس 16 جاسار قىز اۋرۋحانادا جاتىر. دارىگەرلەر بالاعا جابىق باسسۇيەك-مي جاراقاتى، مي شايقالۋ، توبە ايماعى جۇمساق تىندەرىنىڭ سوعىلۋى دياگنوزىن قويدى. بويجەتكەن جانساقتاۋ بولىمىنە جاتقىزىلدى، كەيىن نەيروحيرۋرگيا بولىمشەسىنە اۋىستىرىلدى.
سونداي-اق 3 قاڭتاردا 14 جاستاعى ءجاسوسپىرىم ورتالىققا جاتقىزىلدى، ول شىمبۇلاق تاۋ شاڭعىسى كۋرورتىنان جەتكىزىلدى. اڭعىرت سىرعاناۋ ناتيجەسىندە بالادا جابىق باسسۇيەك-مي جاراقاتى، باس ميىنىڭ شايقالۋى، توبە ايماعىنىڭ سوعىلۋى انىقتالدى.
«بالالاردىڭ قاۋىپسىزدىگى مەن دەنساۋلىعى باستى باسىمدىق بولىپ قالۋى كەرەك. بالاعا شاڭعىمەن سىرعاناۋعا رۇقسات بەرمەس بۇرىن، جابدىقتىڭ تولىق جيىنتىعىنا كوڭىل ءبولۋ كەرەك، بالانىڭ قورعانىس دۋلىعاسى بولۋى كەرەك. ۇلكەن قارلى توبەشىكتەردە جاراقات الۋ مۇمكىندىگى وتە جوعارى، بالالار ءومىر ءسۇرۋ ساپاسىنا اسەر ەتەتىن اۋىر جاراقاتتار الادى. ءبىز بالالاردىڭ دەنساۋلىعى مەن ءومىرىن بىرگە ساقتاۋعا شاقىرامىز»، - دەپ قوستى نەيروحيرۋرگيا بولىمشەسىنىڭ مەنگەرۋشىسى مۇحتار يبراگيموۆ.