ەلىمىزدىڭ بارلىق وڭىرلەرىنەن كەلگەن 400-گە جۋىق سارباز جاس جاۋىنگەر كۋرسىنان ءوتىپ وتانىنا ادال بولۋعا سالتاناتتى تۇردە انت بەردى جانە وتاننىڭ تولىققاندى قورعاۋشىلارىمەن ءبىر قاتارعا تۇردى.
وسى سالتاناتتى ءىس-شارامەن جاس ۇلاندىقتاردى 6506 اسكەري ءبولىمىنىڭ كومانديرى پولكوۆنيك مارات راحمانوۆ قۇتتىقتادى، دەپ حابارلايدى aqshamnews.kz ق ر ءىىم ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساپ.
- «سارباز مىرزالار! سىزدەر وتانعا ادال بولۋعا اسكەري انت بەردىڭىزدەر. سىزدەردىڭ ءارقايسىلارىڭىز بۇل كۇندى ءومىر بويى ەستە ساقتايسىز دەپ ۇمىتتەنەمىن جانە ءارقاشان وتانعا ابىرويمەن قىزمەت اتقاراسىزدار دەپ ويلايمىن. سىزدەردى اسكەري انت قابىلداعاندارىڭىزبەن، ال قۇقىقتىق ءتارتىپ اسكەرلەرىن جاڭا تولىقتىرۋمەن قۇتتىقتايمىن. سىزدەرگە جانە سىزدەردىڭ وتباسىلارىڭىزعا، بارشا حالقىمىزعا، بارشا مەملەكەتىمىزگە تابىس، دەنساۋلىق، بەيبىتشىلىك پەن اماندىق تىلەيمىن»، - دەدى مارات ورال ۇلى.
اسكەري انت - بۇل مەملەكەتكە، ءوز ەلىنىڭ حالقىنا ادال بولۋعا انت بەرۋ. اسكەري انت بەرۋ «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسىنىڭ زاڭىمەن جانە ىشكى قىزمەت جارعىسىمەن رەگلامەنتتەلەدى. بۇل اسكەري ءىستىڭ جولىنا ءتۇسۋ كەزىندە ادام كەزدەسەتىن العاشقى ماڭىزدى اسكەري قىزمەت اكتىلەرىنىڭ ءبىرى.
اسكەرگە شاقىرىلۋشىلاردى وسى ماڭىزدى وقيعامەن قۇتتىقتاۋعا جاۋىنگەرلەردىڭ اتا-انالارى، جاقىن تۋىستارى مەن اسكەري ءبولىمنىڭ ارداگەرلەرى كەلدى.
جاس ساربازداردىڭ ءبىرى قاتارداعى جاۋىنگەر ايتماحانبەك ءالىباي استانا قالاسىنان شاقىرىلدى. ول بۇگىن ءوز قىزمەتتەستەرىنىڭ الدىندا ءسوز سويلەۋ قۇرمەتىنە يە بولدى.
- «ءبىز ءوزىمىز قابىلداعان اسكەري انتقا ادال بولامىز جانە شىمكەنت قالاسىندا قاۋىپسىزدىكتى قامتاماسىز ەتۋ ءۇشىن بار كۇشىمىزدى سالامىز. ءبىز الدىمىزعا قويىلعان بارلىق مىندەتتەردى تولىق كولەمدە ورىندايمىز جانە مەملەكەتتىڭ قاۋىپسىزدىك ىسىنە ءوز ۇلەسىمىزدى قوسامىز»، - دەدى جاس انت بەرۋشى.
اسكەري ءبولىمنىڭ ارداگەرى زاپاستاعى پودپولكوۆنيك سۇلتان نۇرىمبەتوۆ اسكەرگە شاقىرىلۋشىلارعا ءوز تىلەكتەرىن جولدادى. ول ءبىزدىڭ ەلىمىزدە اسكەري بورىشىن ورىنداۋ، وتباسىن، وتانىن قورعاۋ ءاربىر ەر ادامنىڭ قاسيەتتى مىندەتى بولعانىنا جانە بولاتىنىنا سەنىم ءبىلدىردى.
- «ارميا - بۇل جاس جىگىتكە كوپ نارسە بەرەتىن شىنايى ءومىر مەكتەبى. قىزمەت ەتكەن جىلدار سىزدەردىڭ مىنەزدەرىڭىزدى شىڭدايتىنىنا كۇمانىم جوق»، - دەدى سۇلتان جاناباي ۇلى.
ءىس-شارا سوڭىندا جاس ۇلاندىقتار سالتاناتتى ساپپەن، اسكەري وركەستردىڭ داۋىسىنا قادام باسىپ، كومانديرلەرى مەن اتا-انالارىنىڭ الدىندا سالتاناتتى شەرۋمەن ءوتتى.
انت بەرگەن اسكەري قىزمەتشىلەر جاقىن ارادا شىمكەنت جانە تۇركىستان قالالارىنىڭ كوشەلەرىندە قوعامدىق ءتارتىپ پەن قاۋىپسىزدىكتى قامتاماسىز ەتۋ بويىنشا مىندەتتەردى ورىنداۋعا كىرىسەتىنىن اتاپ وتكەن ءجون.