وسى سەنبى، 19 شىلدە كۇنى تاۋ شاڭعى كۋرورتى "شىمبۇلاق" الماتى تۇرعىندارى مەن قوناقتارىن ECO DAY — تۇراقتى دامۋ جولىنداعى ۇلكەن شارالار لەگىنىڭ باستاماسى بولاتىن ەكولوگيالىق باستامالار كۇنىنە شاقىرادى.
ءىس-شارانىڭ باستى ماقساتى تاۋدى قوقىستان تازارتۋ عانا ەمەس، ءاربىر ازاماتتىڭ تابيعاتتى قورعاۋعا قالاي ۇلەس قوسا الاتىنىن كورسەتۋ.
تاڭعى جالپىقالالىق سەنبىلىكتەن كەيىن "شىمبۇلاق" بازالىق ستانسياسىنان قازا تاپقان الپينيستەر مەموريالىنا دەيىن قاتىسۋشىلاردى مازمۇندى باعدارلاما كۇتەدى: جەرگىلىكتى برەندتەردىڭ ەكولوگيالىق ونىمدەر جارمەڭكەسى، پلاستيكتى سۇرىپتاۋ مەن قايتا وڭدەۋ بويىنشا ءتۇرلى شەبەرلىك ساعاتتارى ۇيىمداستىرىلادى.
اتاپ ايتقاندا، Recycle Birge ۇيىمى قالدىقتاردى دۇرىس سۇرىپتاۋ جانە قانداي قالدىقتاردى ءىس جۇزىندە قايتا وڭدەۋگە بولاتىنىن ۇيرەتەدى، ال HelloEco ءبىر رەتتىك زاتتاردى كۇندەلىكتى ومىردە كوپ رەتتىك بالامالارعا قالاي اۋىستىرۋعا بولاتىنى جونىندە تاجىريبەسىن بولىسەدى. جارمەڭكەدە "ءنول قالدىق" قاعيداتىنا نەگىزدەلگەن دۇكەن ونىمدەرى، قايتا وڭدەلگەن شىنىدان جاسالعان بۇيىمدار، ىلە الاتاۋىنىڭ وسىمدىكتەرىنەن جاسالعان بوتانيكالىق پاننولار، وتاندىق ەكولوگيالىق تۇرمىستىق ونىمدەر جانە وزگە دە تاۋارلار ۇسىنىلادى.
"EcoDay اياسىندا ءبىز تەك قايتا وڭدەۋ مەن سانالى تۇتىنۋ تۋرالى ايتىپ قانا قويمايمىز، ونى ءوز قولىمىزبەن قالاي جۇزەگە اسىرۋعا بولاتىنىن ءىس جۇزىندە كورسەتەمىز. قاتىسۋشىلار بەلسەندى اتسالىسىپ، سۇراق قويىپ، وي بولىسەدى. ءدال وسىنداي قادامدار ادامداردى تۇراقتى ءومىر سالتىنا جەتەلەيدى"، — دەيدى Recycle Birge قوزعالىسىنىڭ تەڭ قۇرىلتايشىسى پاكيزات سايلاۋبەكوۆا.
سول كۇنى جينالعان پلاستيك پەن وزگە دە قايتا وڭدەلەتىن قالدىقتار Recycle Birge ۇيىمىنا جونەلتىلەدى. ال قىستا سول قالدىقتان جاسالعان تاۋ شاڭعىسى مەن سنوۋبوردقا ارنالعان تىرەۋىشتەر جۇرت نازارىنا ۇسىنىلىپ، تۇيىق سيكلدىڭ ناقتى ۇلگىسى كورسەتىلەدى.
يگى باستامانىڭ سەرىكتەستەرى: ىلە-الاتاۋ ۇلتتىق تابيعي پاركى، "مەدەۋ" وڭىرلىك تابيعي پاركى كمم، الماتى الپينيزم فەدەراسياسى، WildNature Volunteers ەرىكتىلەرى، Recycle Birge جانە HelloEco ەكولوگيالىق قاۋىمداستىقتارى. ءىس-شارا الماتى قالاسى اكىمدىگى جانىنداعى جوبالىق كەڭسەنىڭ قولداۋىمەن وتەدى.
قاتىسۋشىلاردى جيناۋ "مەدەۋ" بازالىق ستانسياسىندا ساعات 8:30-دا باستالادى.
قوسىمشا اقپارات: نازەركە رزاشوۆا، PR-مەنەدجەر — +7 706 420 9516