چەمپيوندار ليگاسىندا ونەر كورسەتىپ جاتقان الماتىلىق «قايرات» فۋتبول كلۋبى سلوۆەنيانىڭ «وليمپيا» كومانداسىن ەكى ويىننىڭ قورىتىندىسى بويىنشا 3:1 (1:1، 2:0) ەسەبىمەن جەڭىپ، كەلەسى كەزەڭگە جولداما الدى.
جانكۇيەردى جەلپىنتكەن جەڭىس
بۇل – الماتىلىق كوماندا تاريحىنداعى ەكىنشى ەلەۋلى جەتىستىك. ەسكە سالساق، بۇدان ءتورت جىل بۇرىن قازاقستاننىڭ ەڭ ءىرى مەگاپوليسىنىڭ وكىلدەرى ءيزرايلدىڭ «ماكابي» كلۋبىن ءوز الاڭىندا 2:0 ەسەبىمەن جەڭىپ، سىرت الاڭدا 1:1 ناتيجەسىن تىركەپ، العاشقى ىرىكتەۋ كەزەڭىنەن سۇرىنبەي وتكەن بولاتىن. الايدا، كەلەسى اينالىمدا سەربتىڭ ايگىلى «سرۆەنا زۆەزدا» كومانداسىنا قارسىلاس اتانعان «قايرات» ءوز الاڭىندا 2:1 ەسەبىمەن جەڭىسكە جەتكەنىمەن، بەلگرادتاعى قارىمتا كەزدەسۋدە 0:5 ەسەبىمەن ويسىراي ۇتىلدى.
الايدا، ۋاقىت ءوز دەگەنىن جاسايدى. ۋاقىت وتە كەلە قۇرام جاڭارىپ، جاسىل الاڭدا جاڭا ەسىمدەر پايدا بولادى. بۇل – ءومىر زاڭدىلىعى. بيىلعى جەرەبە سلوۆەنيانىڭ كوپ دۇركىن چەمپيونى «وليمپيانى» قارسىلاس رەتىندە بەلگىلەگەندە، كوپشىلىكتىڭ كوكەيىندە كۇمان بولعانى راس. سەبەبى، «وليمپيا» – ءوز ەلىنىڭ 8 دۇركىن چەمپيونى، سوڭعى ەكى جىل قاتارىنان ەشبىر قارسىلاسقا ەسە جىبەرمەي، چەمپيوندىقتى يەلەنىپ كەلەدى. وتكەن ماۋسىمدا ەل چەمپيوناتىندا ەكىنشى ورىن العان «ماريبور» كلۋبىن 7 ۇپايعا باسىپ وزعان.
العاشقى ويىن سلوۆەنيادا ءوتتى. بۇل ماچتا الاڭ يەلەرى باسىمدىق تانىتىپ، دوپتى كوبىرەك يەلەندى. ال «قايرات» قارىمتا شابۋىلدارعا سۇيەنىپ، قورعانىستى بەكەم ۇستاۋعا تىرىستى. باس باپكەر رافاەل ۋرازباحتين ۇسىنعان تاكتيكا كۇتپەگەن ناتيجە بەردى. كەزدەسۋدىڭ العاشقى گولىن «قايرات» سوقتى. جورجينو مەن ساتبايەۆتىڭ ءوزارا تۇسىنىسۋىمەن وربىگەن شابۋىلدى 16 جاستاعى ساتبايەۆ ءساتتى اياقتاپ، كومانداسىن العا شىعاردى. ايتا كەتەرلىگى، بۇل – قازاق فۋتبولشىسى ءۇشىن ەۋروكۋبوكتارداعى العاشقى جانە تاريحي گول بولدى. الايدا ماچ سوڭىنا قاراي «وليمپيا» شابۋىلىن كۇشەيتىپ، ەسەپتى تەڭەستىرىپ ۇلگەردى – 1:1.
بارلىعى الماتىداعى قارىمتا كەزدەسۋدە شەشىلدى. كوپشىلىك سلوۆەن كلۋبىن فاۆوريت ساناعانىمەن، ويىن تاعدىرىن «قايرات» شەشتى. ويىننىڭ العاشقى مينۋتتارىندا-اق «وليمپيا» باسىمدىققا ۇمتىلدى. الاڭنىڭ كوپ بولىگىن «قايرات» قورعانىسقا جۇمساۋعا ءماجبۇر بولدى. دەگەنمەن، بەسىنشى مينۋتتا كۇتپەگەن شابۋىل ۇيىمداستىرىلىپ، سول قاپتالدان كوتەرىلگەن دوپتى پورتۋگاليالىق جورجينو باسپەن تورعا توعىتتى. قاقپاشى گالا ليۋبەي-فينك دوپتى توقتاتا المادى – ەسەپ 1:0.
سلوۆەن سايىپقىراندارى ءسۇرىندى
كەزدەسۋ بارىسىندا دوپ يەلەنۋ جاعىنان قوناقتار باسىم بولعانىمەن، الاڭ يەلەرى قورعانىستا ساۋاتتى وينادى. قاقپاشى الەكساندر زارۋسكيي شەبەرلىك تانىتىپ، ءقاۋىپتىڭ بەتىن قايتارا ءبىلدى. قارىمتا شابۋىلدار دا وتكىر ءوربىدى. داستان ساتبايەۆ ەكى رەت جەكە شابۋىلعا شىعىپ، ءقاۋىپتى ءسات تۋدىردى. ءبىراق قارسىلاس قورعاۋشىلار بارىن سالىپ توسقاۋىل قويدى. ءبىرىنشى تايم سوڭىنا تامان تاعى ءبىر قاتەلىككە بوي الدىرعان قوناقتار بۇل جولى جورجينونىڭ پاسىنان كەيىن تۋعان كۇنىڭ اتاپ وتكەن الەكساندر مرىنسكييدىڭ ءدال سوققىسىنا توتەپ بەرە المادى. ەسەپ – 2:0. ايتا كەتۋ كەرەك، مرىنسكيي – «قايرات» كلۋبىنىڭ ءوز تاربيەلەنۋشىسى.
ويىننىڭ ەكىنشى بولىگىندە دە سلوۆەندەر شابۋىلدى ۇدەتە ءتۇستى. ءبىر ساتتە الەكس تامم قاقپاعا سوققى جاساۋ مۇمكىندىگىن پايدالانعانىمەن، ناتيجە شىقپادى. جانكۇيەرلەر سول ساتتە دەمىن ىشىنە تارتىپ، الاڭداعىلارمەن بىرگە الاڭدادى. 90 مينۋت بويى «قايرات» قاقپاسىنا تۋرا سوققى جاسالمادى دەۋگە بولادى. قوسىمشا ۋاقىتتا الاڭ يەلەرى تاعى ءبىر گول سوققانىمەن، تورەشى ونى ويىننان تىس دەپ تانىپ، ەسەپكە المادى.
وسىلايشا ەكى ماچتىڭ قورىتىندىسى بويىنشا «قايرات» لايىقتى جەڭىسكە جەتىپ، چەمپيوندار ليگاسىنىڭ ەكىنشى ىرىكتەۋ كەزەڭىنە ءوتتى. بۇل جولى ولار فينليانديا چەمپيونى – كۋپس كلۋبىمەن كەزدەسەتىن بولادى. ماچتار 22 جانە 29 شىلدەدە وتەدى.
فۋتبول ماماندارى رافاەل ۋرازباحتين باپتايتىن كوماندا مۇنداي ۇيىمشىلدىقپەن ءارى تاكتيكالىق دالدىكپەن ويناسا، ودان ءارى وتۋگە دە تولىق مۇمكىندىگى بار دەپ باعالاپ وتىر. سوندىقتان دا ەل نامىسىن قورعايتىن «قايرات» كلۋبى كەلەسى قارسىلاسىنا دا ءدال وسىنداي مىنەز كورسەتسە، الار اسۋى الدا دەپ سەنىممەن ايتۋعا بولادى.
ءالىم اناپيانوۆ