پۋشكين كوشەسىنىڭ رايىمبەك باتىر داڭعىلىنان گوگول كوشەسىنە دەيىنگى بولىگىن اباتتاندىرا باستادى. بۇل جۇمىس قالانىڭ ورتالىق بولىگىن جاڭارتۋ باعدارلاماسىنىڭ اياسىندا جۇزەگە اسپاق. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا قوعامدىق كەڭىستىكتەردى دامىتۋ باسقارماسىنىڭ باسشىسى باتىرحان سۇلەيمەنوۆ وسىلاي دەدى.
پۋشكين كوشەسىنىڭ اتالعان بولىگى 2025 جىلى تولىق جاڭعىرتىلادى. جوبا الماتى قالاسىنىڭ ورتالىق بولىگىن كەشەندى اباتتاندىرۋ باعدارلاماسى شەڭبەرىندە ىسكە اسپاقشى. جوباعا تاپسىرىس بەرگەن – الماتى قالاسىنىڭ قالالىق جوسپارلاۋ جانە ۋربانيستيكا باسقارماسى، جوبالاۋدى «الماتىگەنپلان» عىلىمي-زەرتتەۋ ينستيتۋتى» ج ش س ازىرلەگەن.
«2023–2024 جىلدارى «الماتىگەنپلان» جوبالاۋ ينستيتۋتى وسى كوشە بويىنشا ۇلكەن زەرتتەۋ جۇمىسىن جۇرگىزگەن. سول كەزدە كوشەنىڭ تۋريستىك الەۋەتى وتە جوعارى ەكەنىن انىقتادىق. ونى ادامدار سەرۋەندەيتىن، ۋاقىت وتكىزە الاتىن جاياۋ جۇرگىنشىلەر كەڭىستىگىنە اينالدىرۋعا بولادى. بۇل اۋدانداعى ەڭ تارتىمدى جەرگە اينالۋى مۇمكىن. ءقازىر ءبىز قۇرىلىس-مونتاج جۇمىستارىنا كىرىستىك»، – دەدى باتىرحان سۇلەيمەنوۆ.
جوندەۋ جۇمىستارى 6،5 گەكتار اۋماقتى قامتىپ، قايتا جاڭعىرتىلاتىن جەردىڭ ۇزىندىعى – 1،1 شاقىرىم بولماق. جوبا اياسىندا جاياۋ جۇرگىنشىلەر مەن كولىك ينفراقۇرىلىمىن جان-جاقتى اباتتاندىرۋ كوزدەلگەن: جاسىل اۋماقتىڭ كولەمى 19 619،5 م² قۇرايدى. جامىلعىنىڭ جالپى اۋماعى – 45 301،4 م²، ونىڭ ىشىندە 18 041،5 م² – اسفالتبەتون، 25 914،9 م² – بەتون تروتۋار پليتكالارى. سونىمەن قاتار، 58 م² رەزەڭكە جابىندى جانە 96 م² تاكتيلدى پليتكا توسەلەدى. بۇل مۇمكىندىگى شەكتەۋلى ازاماتتارعا ىڭعايلى بولماق.
«كوشەنىڭ ەكى جاعىندا دا اباتتاندىرىلعان جاياۋ جۇرگىنشىلەر ايماعى بولادى. ءبىراق بۇل جوباداعى ەڭ ماڭىزدى تۇس – ماقاتايەۆ كوشەسىنەن رايىمبەك باتىر داڭعىلىنا دەيىنگى ارالىق. ويتكەنى ءدال وسى جەردە ءبىز جولدىڭ بولىگىن تارىلتىپ، جاياۋ جۇرگىنشىلەرگە ارنالعان كەڭىستىكتى ۇلعايتامىز. مۇندا تولىققاندى بۋلۆار سالىنادى. ءتىپتى ونى جاقىن ماڭداعى ۇيلەردىڭ تۇرعىندارى مەن وسى اۋداننىڭ حالقى ءۇشىن سالعان ساياباق دەسەك تە بولادى. بۇل ورىن اۋداننىڭ وزەگىنە، تارتىمدى نۇكتەسىنە اينالادى. سونىمەن قاتار ءبىز تەك جاياۋ جۇرگىنشىلەردىڭ ەمەس، جۇرگىزۋشىلەر مەن كولىك قۇرالدارىنىڭ دا قاجەتتىلىگىن ەسكەردىك»، – دەدى باتىرحان سۇلەيمەنوۆ.
بۇل جوبا وسى زامانعى قالالىق ورتانى قالىپتاستىرۋعا باعىتتالعان، قالا ينفراقۇرىلىمىن جاقسارتۋعا ارنالعان ۇلكەن جۇمىستىڭ ءبىر بولىگى بولماق.