شىمبۇلاقتا قار كوشكىنى بولىپ، ءبىر ادام مەرت بولدى

اسپالى جولدىڭ جۇمىسى توقتاتىلدى.

الماتىنىڭ شىمبۇلاق تۋريستىك اۋماعىنان جوعارى تۇستا قار كوشكىنى ءجۇرىپ، ءبىر ادام مەرت بولدى، دەپ حابارلايدى Almaty-akshamy.kz.

«شىمبۇلاق» تاۋ-شاڭعى كۋرورتى باسپا ءسوز قىزمەتىنىڭ مالىمەتىنشە، 10 ناۋرىز كۇنى تاۋدا شاڭعى تەۋىپ جۇرگەن دەمالۋشى قار كوشكىنىن تۇسىرەتىن قۇرالمەن سوقتىعىسىپ، كوشكىن استىندا قالدى.

«تاڭعى ساعات 10:58-دە كۋرورتتىڭ قۇتقارۋشىلارىنا كومبي-2 تىرەگىنىڭ 8-دەن جوعارى ايماعىندا قار كوشكىنى بولعانى تۋرالى اقپارات ءتۇستى. وقيعا ورنىنا ساعات 11:02-دە جەتكەن قۇتقارۋشىلار ەر ادامنىڭ دەنەسىن تاپتى. بەلگىلى بولعانداي، ول رۇقسات ەتىلگەن ايماقتان شىعىپ كەتكەن. ساعات 11:25-تە مەديسينالىق پۋنكتكە جەتكىزىلدى، ماماندار ونىڭ قايتىس بولعانىن انىقتادى»، - دەپ حابارلادى «شىمبۇلاق» تاۋ شاڭعى كۋرورتىنىڭ باسپا ءسوز قىزمەتى.

كۋرورت اكىمشىلىگى ەر ادامنىڭ تۋىستارى مەن جاقىندارىنا قايعىلارىنا ورتاقتاسىپ، كوڭىل ايتتى.

قازىرگى ۋاقىتتا اسپالى جولدىڭ (كومبي-2) جۇمىسى توقتاتىلدى. تۇسكەن قار ماسساسىنىڭ كولەمى انىقتالىپ جاتىر. وقيعا ورنىنا الماتى قالالىق تجد-نىڭ 1 مامانى مەن 1 تەحنيكاسى، رەسپۋبليكالىق جەدەل-قۇتقارۋ جاساعىنىڭ ءبىر تەحنيكاسى مەن 8 قىزمەتكەرى جۇمىلدىرىلدى.