الماتى اكادەمياسىنا قازاقستان-نەمىس ۋنيۆەرسيتەتىنىڭ رەكتورى كەلدى
ءىىم الماتى اكادەمياسىنا قازاقستان-نەمىس ۋنيۆەرسيتەتىنىڭ رەكتورى، دوكتور روممەل ۆولراد كەلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ءىىم الماتى اكادەمياسىنىڭ تىڭداۋشىلارى قازاقستان-نەمىس ۋنيۆەرسيتەتىنىڭ رەكتورى پروفەسسور در.روممەل ۆولراد باستاعان ۋنيۆەرسيتەت وكىلدەرىمەن كەزدەستى.
قوناقتاردىڭ اراسىندا الماتى اكادەمياسىنا اتى بەرىلگەن گەنەرال ماقان ەسبولاتوۆتىڭ نەمەرەسى زارينا ەسبولاتوۆا دا بولدى. شەتەلدىك ۋنيۆەرسيتەت ماماندارى گەنەرالدىڭ ەسكەرتكىشىنە گۇل شوقتارىن قويىپ، اكادەميا مۇراجايىن ارالادى. اتالعان ۋنيۆەرسيتەتتە قىزمەت اتقاراتىن زارينا ەسبولاتوۆا ارىپتەستەرىن قازاقستان پوليسياسىنىڭ قالىپتاسۋىنان سىر شەرتەتىن ەكسپوناتتار جيناقتالعان مۇراجايداعى م.ەسبولاتوۆقا ارنالعان بۇرىشپەن دە تانىستىردى.
قازاقستان-نەمىس ۋنيۆەرسيتەتىنىڭ رەكتورى، دوكتور روممەل ۆولراد الماتى اكادەمياسىنىڭ تىڭداۋشىلارىنا ءوزى باسقاراتىن ۋنيۆەرسيتەت تۋرالى مالىمەت بەرىپ، مۇندا ورتالىق ازيانىڭ تۇكپىر-تۇكپىرىنەن كەلگەن ستۋدەنتتەر ءبىلىم الاتىنىن ەرەكشە اتاپ ءوتتى. قازاقستان-نەمىس ۋنيۆەرسيتەتى ەكى ەلدىڭ ۇكىمەتارالىق كەلىسىمى اياسىندا جۇمىس ىستەيدى جانە 1999 جىلى “ءبىلىم بەرۋ سالاسىنداعى قازاقستان-نەمىس ىنتىماقتاستىعى” قوعامدىق قورىنىڭ جەكە باستاماسىمەن قۇرىلعان. ۋنيۆەرسيتەت بازاسىندا ماماندار نەمىس ستاندارتى بويىنشا دايارلانادى. بۇل اتالعان وقۋ ورنىنداعى وقىتۋدىڭ ساپاسى جوعارى ەكەنىن كورسەتەدى.
سونداي-اق، دوكتور روممەل ۆولراد قازاقستان-نەمىس ۋنيۆەرسيتەتىنىڭ ق ر ءىىم الماتى اكادەمياسىمەن ىنتىماقتاستىعىن جولعا قويۋعا مۇددەلى ەكەنىن اتاپ ءوتتى.