كولىك جۇكتەمەسى مەن قورشاعان ورتاعا انتروپوگەندىك اسەردى ازايتۋ ماقساتىندا الماتى قالاسىنىڭ اكىمدىگى 2016 جىلعى 8 ساۋىردەگى №2/122 «الماتى قالاسىنىڭ كەيبىر اۋماقتارىنا كولىكتىڭ كىرۋىن شەكتەۋ تۋرالى» قاۋلىسىنا وزگەرىستەر ەنگىزىلدى. وزگەرىستەر 2023 جىلعى 1 ساۋىردەن باستاپ كۇشىنە ەنەدى، دەپ حابارلايدى Almaty-akshamy.kz.
ەلەكترلىك قوزعالتقىش اۆتوكولىكتەرى (ەلەكترموبيل) مەن شۇعىل، جەدەل، كوممۋنالدىق جانە ارنايى قىزمەتتەر مەن ارنايى تەكحنيكادان باسقا كولىكتەردىڭ بارلىعىنا تاۋ شاڭعى كۋرورتى اۋماعىنا كىرۋگە شەكتەۋ قويىلادى.
قولدانىلعان شارالار كولىكتەن شىعاتىن لاستاعىش زاتتاردىڭ كولەمىن ازايتا وتىرىپ ەرەكشە قورعالاتىن تابيعي اۋماقتا قورشاعان ورتاعا تيگىزەتىن كەرى اسەردى تومەندەتۋگە مۇمكىندىك بەرەتىن بولادى. ەسكە سالا كەتەيىك، بۇعان دەيىن سول جەردىڭ تۇرعىلىقتى تۇرعىندارى مەن جەكەمەنشىك يەلەرىنە قوزعالتقىش تيپىنە قاراماستان «شىمبۇلاق» تك اۋماعىنا كىرۋگە رۇقسات ەتىلەتىن.
2023 جىلعى 1 قىركۇيەكتەن باستاپ «مەدەۋ» ماتپ اۋماعىندا ورنالاسقان كاسىپكەرلىكپەن اينالىساتىن زاڭدى تۇلعالارعا تيەسىلى جانە (نەمەسە) سولارعا قىزمەت كورسەتەتىن كولىكتەرگە شەكتەۋ كۇشىنە ەنەدى. وسى ورايدا شاعىن جانە ورتا بيزنەس سۋبەكتىلەرىنە ەلەكتر قوزعالتقىشتى كولىك ساتىپ الۋ ءۇشىن «الماتى» اكك» اق قاراستى «الماتى» مقۇ» ارقىلى 7 جىلعا دەيىنگى مەرزىمگە 6% جىلدىق مولشەرلەمەمەن 30 ملن دەيىن كەپىلدى جەڭىلدەتىلگەن نەسيە الۋ مۇمكىندىگى بەرىلەدى. بورىشكەردىڭ جەكە مەنشىگى ساتىپ الىناتىن كولىك قۇرالىنىڭ 50%-نان كەم بولماۋى ءتيىس.
ىشتەن جاناتىن سۇيىق وتىندى قوزعالتقىشپەن جۇرەتىن كولىكتەردىڭ ءجۇرىسىن شەكتەۋدىڭ نەگىزگى ماقساتى – زياندى شىعىندىلاردى ازايتىپ، تابيعي رەسۋرستار مەن قورشاعان ورتانى ءتيىمدى پايدالانۋ. حالىقارالىق تاجىريبەگە سايكەس مۇنداي ەكولوگياىق اۋماقتار «زيان شىعىندىلاردىڭ تومەن دەڭگەيى اۋماعى» دەگەندى بىلدىرەتىن «Low Emission Zone» (LEZ) بەلگىسىمەن بەلگىلەنەدى. شەتەلدە LEZ جۇيەسى جىل بويى 24/7 دەمالىس كۇندەرى دە ارەكەت ەتەدى.
اقپارات ءۇشىن:
«كازگيدرومەت» رمك اقپاراتىنا سايكەس 2022 جىلى الماتى قالاسى بويىنشا اتموسفەرانى لاستاۋ يندەكسى 5ء-تى قۇراعان (جوعارى). جىلىنا 127 مىڭ توننا ەسەپتىك شىعارىندىلاردىڭ 70 مىڭ تونناسى اۆتوكولىكتەرگە تيەسىلى، 46 مىڭ توننا – نا ستاسيونارلى لاستاۋ كوزدەرىنە (ونىڭ ىشىندە جەو-2)، شامامەن 11 مىڭ توننا – جەكە سەكتورعا تيەسىلى. اۆتوترانسپورت اتموسفەرانى لاستاۋدىڭ نەگىزگى كوزى بولىپ وتىر. قازىرگى كەزدە الماتىدا شامامەن 560 مىڭ اۆتوموبيل تىركەلگەن، (ونىڭ ىشىندە ەلەكتروموبيل سانى 958)، كۇن سايىن قالا اۋماعىنا 200 مىڭنان استام كولىك كىرەدى. ال ونىڭ 58%-ىنىڭ قولدانىس مەرزىمى 14 جىلدان 40 جىلعا دەيىنگى مەرزىمدى قۇرايدى.