قازاقستاندا مۇعالىمدەر كۇنىن مەرەكەلەۋ ۋاقىتى وزگەرتىلدى

ەندى ول 5 قازاندا اتاپ وتىلەدى

قازاقستاندا پەداگوگتاردىڭ كاسىبي مەرەكەسى – مۇعالىمدەر كۇنى ەندى 5 قازاندا اتاپ وتىلەدى. ق ر ۇكىمەتى ءتيىستى قاۋلى قابىلدادى، دەپ حابارلايدى Almaty-akshamy.kz.  

مەملەكەتتىك مەرەكەلەر تىزىمىنە سايكەس، رەسپۋبليكادا مۇعالىمدەر كۇنى وسى ۋاقىتقا دەيىن قازان ايىنىڭ ءبىرىنشى جەكسەنبىسىندە تويلانىپ كەلدى. ەندى بۇل مەرەكە 5 قازاندا الەمنىڭ 100-دەن استام ەلى اتاپ وتەتىن دۇنيەجۇزىلىك مۇعالىمدەر كۇنىمەن سايكەستەندىرىلدى.

«مۇعالىمدەر كۇنى – ءبىلىم بەرۋ سالاسىنداعى قىزمەتكەرلەردىڭ بارلىعىنا ورتاق كاسىبي مەرەكە. بۇل كۇنى ۇستازدار قاۋىمىنىڭ قوعام دامۋىنداعى ءرولى مەن ەڭبەگى، وعان قوساتىن زور ۇلەسى اتالىپ وتىلەدى»، - دەلىنگەن ۇكىمەت باسشىسىنىڭ باسپا ءسوز قىزمەتى تاراتقان حابارلامادا.

وقۋ-اعارتۋ مينيسترلىگىنىڭ مالىمەتىنشە، بۇگىندە قازاقستاندا مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىندا 556 مىڭ پەداگوگ ەڭبەك ەتەدى.

ايتا كەتسەك، دۇنيەجۇزىلىك مۇعالىمدەر كۇنىن بەكىتۋگە 1966 جىلى 5 قازاندا پاريجدە وتكەن مۇعالىمدەردىڭ مارتەبەسى تۋرالى ارنايى ۇكىمەتارالىق كونفەرەنسيا ۇيىتقى بولدى. ناتيجەسىندە يۋنەسكو مەن حالىقارالىق ەڭبەك ۇيىمىنىڭ وكىلدەرى «مۇعالىمدەردىڭ مارتەبەسىنە قاتىستى ۇسىنىستار» قۇجاتىنا قول قويدى. دۇنيەجۇزىلىك مۇعالىمدەر كۇنى العاش رەت 1994 جىلى 5 قازاندا اتاپ ءوتىلدى.