الماتى تاۋىندا قاردى جاساندى جولمەن ءتۇسىرۋ جۇمىستارى جۇرگىزىلدى
الماتى تاۋلارىندا قاردى جاساندى جولمەن ءتۇسىرۋ جۇمىستارى جۇرگىزىلدى، دەپ حابارلايدى Almaty.tv.
قولدان قار كوشكىنىن جاساۋعا اق ۇلپانىڭ قالىڭ جاۋۋى سەبەپ بولعان. ونىڭ ۇستىنە كۇننىڭ كۇرت جىلۋىنا بايلانىستى كوشكىن ءجۇرۋ ءقاۋپى قىزىل دەڭگەيگە دەيىن كوتەرىلىپتى. ەستە بولسا، جۋىردا عانا شىمبۇلاق تاۋلى كۋرورتىنىڭ جوعارى بەتكەيىندە 800 تەكشە مەترگە جۋىق قار كوشكىنى جۇرگەنى بەلگىلى بولعان ەدى. قالىڭ قار «شىمبۇلاق-تۇيىق سۋ» جولىن جاۋىپ قالعان بولاتىن. ءقازىر شىمبۇلاق پەن ۇلكەن الماتى كولىنە باراتىن جولدار جابىق. كوشكىن ءجۇرۋ ءقاۋپى ءالى دە ساقتالادى. سوندىقتان قۇتقارۋشىلار ءبىراز ۋاقىت تاۋعا شىعۋدان باس تارتۋعا كەڭەس بەرەدى.
«شىمبۇلاق» تاۋلى كۋرورتى اۋماعىندا، كىشى الماتى وزەنىنىڭ باسسەينىندە قار ماسساسىن پروفيلاكتيكالىق ءتۇسىرۋ جۇمىستارى جۇرگىزىلدى. جۇمىس بارىسىندا 500 تەكشە مەتردەن اسا قار الىندى. دەمالۋشىلاردىڭ قاۋىپسىزدىگى تولىق قامتاماسىز ەتىلدى»، – دەدى تجد توتەنشە جاعدايلاردى الدىن الا ەسكەرتۋ باسقارماسىنىڭ ينجەنەرى ءامىر تولەبايەۆ.