سەرىك كۇدەبايەۆتىڭ ۇستىنەن ازاپتاۋ جانە بيلىگىن اسىرا پايدالانۋ فاكتىسىمەن ەكى ءىس قوزعالعان

سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان.

الماتى وبلىستىق پوليسيا دەپارتامەنتىنىڭ ەكس-باسشىسى سەرىك كۇدەبايەۆتىڭ ۇستىنەن ەكى قىلمىستىق ءىس قوزعالعان، دەپ حابارلايدى Almaty-akshamy.kz قازاقپاراتقا سىلتەمە جاساپ.

«سوتتالۋشىعا قىلمىستىق كودەكستىڭ 146-بابىنىڭ 2-بولىگى 1،3،4 تارماقتارى جانە 362-بابىنىڭ 4-بولىگى بويىنشا ءىس قوزعالعان. بۇل - ازاپتاۋ جانە بيلىكتى نەمەسە لاۋازىمدىق وكىلەتتىگىن اسىرا پايدالانۋ فاكتىلەرى»، - دەدى جەتىسۋ وبلىستىق سوتىنىڭ باسپا ءسوز قىزمەتىنىڭ وكىلى نۇرسۇلتان ورىنباساروۆ.

سوت وكىلى قىلمىستىق كودەكستىڭ 362-بابى 4 بولىگى بويىنشا 5 جىلدان 10 جىلعا دەيىن باس بوستاندىعىنان ايىرۋ، ال 146-بابى 2-بولىگى (3-7 تارماقتارى) بويىنشا 3 جىلدان 7 جىلعا دەيىن سوتتاۋ جانە ءۇش جىلعا دەيىن قانداي دا لاۋازىم اتقارۋ قۇقىعىنان ايىرۋ قاراستىرىلعانىن ناقتىلادى.

ايتا كەتەيىك، بۇگىن تالدىقورعاندا الماتى وبلىستىق پوليسيا دەپارتامەنتىنىڭ بۇرىنعى باسشىسى سەرىك كۇدەبايەۆقا قاتىستى سوت پروسەسى باستالدى.

ەسكە سالساق، سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان بولاتىن.

ول 2020 جىلدان باستاپ 2022 جىلدىڭ قاڭتارىنا دەيىن الماتى وبلىسى پوليسيا دەپارتامەنتىنىڭ باستىعى قىزمەتىن اتقارعان.

2022 جىلدىڭ 18 اقپانىندا ىشكى ىستەر ورگاندارىنان ءوز ەركىمەن بوساتىلدى.