الماتىدا قىسقى تۋريستىك ماۋسىم باستالدى. قالا جىل بوي تۋريستىك ورتالىق رەتىندەگى مارتەبەسىن نىعايتىپ كەلەدى، ال تاۋلى ايماقتارعا قىزىعۋشىلىق جازدا دا، قىستا دا تۇراقتى تۇردە جوعارى. 2025 جىلى قاڭتار-قاراشا ايلارىندا ىلە-الاتاۋ ۇلتتىق ساياباعىنا 901 مىڭ ادام، ال قاڭتار-قازان ارالىعىندا Shymbulak كۋرورتىنا 1،1 ملن تۋريست كەلگەن. 2025 جىلدىڭ جازىندا Shymbulak 450 مىڭنان استام قوناقتى قابىلدادى. بۇل تاۋداعى دەمالىسقا دەگەن سۇرانىستىڭ جىل بويىنا جوعارى ەكەنىن كورسەتەدى.
قىسقى كەزەڭدەگى باستى تۋريستىك نىسان ءداستۇرلى تۇردە – 6 جەلتوقساندا ماۋسىمدى رەسمي تۇردە اشقان Shymbulak تاۋ-شاڭعى كۋرورتى. كۋرورت ورتالىق ازياداعى جەتەكشى باعىتتاردىڭ ءبىرى سانالادى. وتكەن ماۋسىمدا مۇندا 1،5 ملن ادام كەلدى، ال حالىقارالىق باسىلىمدار Shymbulak-تى الەمدەگى ەڭ ۇزدىك 5 تاۋ شاڭعىسى باعىتتارىنىڭ قاتارىنا ەنگىزدى.
جاڭا ماۋسىمدا Shymbulak تۋريستىك بەلسەندىلىك اياسىن كەڭەيتەدى. Le Mont الاڭىندا ءار سەنبى سايىن كۇندىزگى après-ski وتەدى. ءقازىردىڭ وزىندە تالعار، جاسىل الاڭ، اق ايۋ جانە اقبارسىق تراسسالارى اشىق. قوسىمشا بەتكەيلەر مەن تالعار اسۋىنان تۇنگى سىرعاناۋ الاڭدارى اۋا رايى تۇراقتى سۋىتقان ساتتەن باستاپ ىسكە قوسىلادى.
2025 جىلدىڭ ءۇش توقسانىندا الماتىعا 563 مىڭ شەتەلدىك تۋريست كەلدى، ال جىل سوڭىنا قاراي ولاردىڭ سانى 750 مىڭ ادامعا دەيىن ارتپاق. وسى جاعدايدى ەسكەرە وتىرىپ Shymbulak قوناقتاردى قابىلداۋعا تولىق دايىن: بەس اي بويى شاڭعى ماۋسىمى، مازمۇندى ءىس-شارالار باعدارلاماسى جانە تاۋداعى دەمالىسقا ىڭعايلى ينفراقۇرىلىم ۇسىنىلادى.
