ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا 25-30 ءساۋىر ارالىعىندا تەاتر رەجيسسەرى، ق ر ەڭبەك سىڭىرگەن ءارتيسى، «قۇرمەت» وردەنىنىڭ يەگەرى مۇرات احمانوۆتىڭ شىعارماشىلىق اپتالىعى وتەدى.
ع.مۇسىرەپوۆ تەاترىندا قىزمەت ەتىپ كەلە جاتقان رەجيسسەر رەپەرتۋارداعى س.احمادتىڭ «كەلىندەر كوتەرىلىسى»، ب.مۇقايدىڭ «شىندىق دەتەكتورى»، يران-عايىپتىڭ «فاتيما»، «ەستايدىڭ قورلانى»، «ءبىر ءتۇپ الما اعاشى» قويىلىمدارىن كوپشىلىك نازارىنا ۇسىنىپ، سونداي-اق ءوزىنىڭ قالامىنان تۋعان «ناۋرىز دۋمان»، «ەرتەگىلەر الەمىندە» سىندى بالالارعا ارنالعان سپەكتاكلدەرىن ساحنالادى.
شىعارماشىلىق جولىن بالەت ءبيشىسى رەتىندە باستاپ، تەاتر مەن كينو ونەرىندە وزىندىك سارا جولى مەن قولتاڭباسىن قالىپتاستىرعان مۇرات نويانباي ۇلى احمانوۆتىڭ مەرەيلى جاسى قارساڭىندا قازاق تەاتر ونەرىندەگى ەلەۋلى ەڭبەكتەرىنە شولۋ بولماق. ەلىمىزدىڭ بىرنەشە تەاترىندا جەمىستى ەڭبەك ەتىپ، ورال، تالدىقورعان، جەزقازعان، اقتوبە تەاترلارىنىڭ دامۋىنا ۇلەس قوسىپ، شىعارماشىلىعىن رۋحاني استانامىزدىڭ ايتۋلى ورداسى مۇسىرەپوۆ تەاترىندا جالعاپ كەلە جاتقان ونەر يەسىنىڭ كەزەكتى جاڭا تۋىندىسى اپتالىقتىڭ العاشقى كۇنى كورەرمەن نازارىنا ۇسىنىلماق. «تويى كوپ ءۇي» سپەكتاكلىنىڭ پرەمەراسى 25 ءساۋىر كۇنى 18:30-دا وتەدى.
ساحنا ونەرى ساردارىنىڭ شىعارماشىلىق اپتالىعى سالتاناتتى تۇردە ءساۋىردىڭ 25ء-شى جۇلدىزىندا اشىلىپ، تەاتر فويەسىنىڭ ەكىنشى قاباتىندا رەجيسسەردىڭ شىعارماشىلىعى تۋرالى عىلىمي كونفەرەنسيا، «مۇرات احمانوۆ» شىعارماشىلىق كىتابىنىڭ تۇساۋكەسەرى جانە «تويى كوپ ءۇي» سپەكتاكلىنىڭ پرەمەراسى جايلى باسپا ءسوز كونفەرەنسياسى وتەدى. كونفەرەنسياعا رەجيسسەر مۇرات احمانوۆ، اقىن، دراماتۋرگ نۇرلان ورازالين، تەاتردىڭ ءارتيسى حازيما نۇعمانوۆا، تەاتر سىنشىلارى امانكەلدى مۇقان، باقىت نۇرپەيىس، ايجان احمەت قاتىسادى.
اپتالىققا رەجيسسەردىڭ باسقا تەاتردا ساحنالاعان سپەكتاكلدەرى قوناققا كەلىپ، قالا كورەرمەندەرىنە ءوز قويىلىمدارىن ۇسىنباق. سونىمەن قاتار، اپتالىق اياسىندا م.احمانوۆ رەجيسسەرلىگىمەن ساحنالانعان 6 سپەكتاكل كورەرمەن نازارىنا ۇسىنىلادى. 30 ءساۋىر كۇنى تەاتر رەپەرتۋارىندا 10 جىلدان اسا ءجۇرىپ كەلە جاتقان «كەلىندەر كوتەرىلىسى» سپەكتاكلىمەن اپتالىق اياقتالماق. سانالى عۇمىرىن ساحناعا ارناعان ساڭلاق تەك تەاتر ونەرىنىڭ ءتورىن عانا باعىندىرىپ قويماي، كوگىلدىر ەكراندا ءتۇرلى تۇلعالاردىڭ بەينەلەرىمەن قالىڭ كوپشىلىككە تانىلدى. اتاپ ايتساق، «الكەي.عۇلاما عۇمىر»، «مەنىڭ كۇنالى پەرىشتەم»، «ەلباسى جولى»، «پارىز»، «استانا – ماحابباتىم مەنىڭ» فيلمدەرىنىڭ نەگىزگى كەيىپكەرلەرىن سومداعان.
شىعارماشىلىقتىڭ زاڭعار شىڭىن باعىندىرىپ، ونەگەلى ءومىرىن ونەرگە ارناعان تۇلعانىڭ شىعارماشىلىعىن ناسيحاتتاۋ، جالىندى جاستاردى كىرشىكسىز ونەرگە باۋلۋ ماقساتىندا ۇيىمداستىرىلعان شارا اۋقىمدى تۇردە اتالىپ وتىلەدى. سۋرەتكەرلىكتى سۇيەتىن، ساحنا ونەرىن سان ءتۇرلى بوياۋعا بوياپ، كيەلى كەڭىستىكتە كەلىستى ونەر تۋدىرا بىلگەن رەجيسسەردىڭ شىعارماشىلىعىنا شولۋ جاساۋ ورەلى ونەردىڭ ورىستەتۋدىڭ جولى بولىپ سانالادى. ساۋلەلى ونەرمەن سۋسىنداپ، تەاتر ونەرىنە تاعى ءبىر تابان جاقىندايمىن دەسەڭىز، شىعارماشىلىق اپتالىقتان قاپى قالماڭىز، كورەرمەن!