بۇل مەملەكەت باسشىسىنىڭ تاپسىرماسى.
پرەزيدەنت تاپسىرماسىن ورىنداۋ بويىنشا انتيكوررۋپسيالىق قىزمەت الماتى اكىمدىگىمەن بىرلەسىپ، تاۋ بوكتەرىندەگى اۋدانداردا جەر ءبولۋ جانە قۇرىلىس سالۋ ماسەلەلەرىندە سىبايلاس جەمقورلىق قاۋپىنە تالداۋ جۇرگىزىپ جاتىر، دەپ حابارلايدى Almaty-akshamy.kz
سىبايلاس جەمقورلىققا قارسى قىزمەتتىڭ مالىمەتىنشە، بۇل ماسەلەنى الدىن الا زەردەلەۋ قۇرىلىستىڭ بارلىق كەزەڭدەرىندە ەلەۋلى ءقاۋىپ بارىن كورسەتەدى. بۇل شەنەۋنىكتەردىڭ جەر بولۋدەگى زاڭسىز ارەكەتتەرىنە اكەپ سوعادى. سالدارىنان فۋنكسيونالدىق ايماقتار مەن نىسانالى ماقسات وزگەرەدى، كاداسترلىق قۇن تولىق تولەنبەيدى.
بۇعان قوسا، ساۋلەت جانە قالا قۇرىلىسى قىزمەتى تۋرالى زاڭنامانى بۇزۋشىلىقتار انىقتالعان.
"مىسالى، 2017 جىلدان باستاپ جاپپاي دەمالۋعا جانە تۋريزمگە ارنالعان رەكرەاسيالىق ايماقتان تۇرعىن ايماققا 286 گەكتارعا جۋىق جەر اۋدارىلدى. بۇل وزگەرىستەر ەكولوگتاردىڭ، سەس پەن ءورت سوندىرۋشىلەردىڭ كەلىسىمىنسىز ىسكە اسىرىلدى. قوعامدىق تىڭداۋلار وتكىزىلمەدى. سونىمەن بىرگە، قولدانىستاعى باس جوسپار 2011 جىلى وزەكتىلىگىن جويدى، ال جاڭاسى ءالى بەكىتىلمەگەن"، دەلىنگەن سىبايلاس جەمقورلىققا قارسى ءىس-قيمىل اگەنتتىگى تاراتقان اقپاراتتا.
سونىمەن قاتار، اگەنتتىك وكىلدەرى تاراتقان اقپاراتقا سۇيەنسەك، توتەنشە جاعداي قىزمەتىنىڭ دەرەكتەرى بويىنشا تاسقىن، كوشكىن جانە سەل ءقاۋپى ايماعىندا 5 000-عا جۋىق نىسان بار. ولاردا 26 مىڭ ادام تۇرادى.
مىسالى، نابەرەجنايا كوشەسىندە تىك بەتكەيدىڭ استىنداعى سارى توپىراققا 12 تۇرعىن ءۇي سالىنعان. سوڭعى ەكى جىلدا لاندشافتتى زاڭسىز وزگەرتۋدىڭ 26 فاكتىسى انىقتالدى.
مىسالى، ناۋرىزباي اۋدانىنىڭ تاۋ بوكتەرىندەگى ۋچاسكەلەردىڭ ءبىرىنىڭ يەسى رۇقسات قۇجاتسىز تاۋدى ۇڭگي قازعان. مامانداردىڭ قورىتىندىسى بويىنشا الىنعان توپىراقتىڭ كولەمى 100 مىڭ تەكشە مەتر بولعان. بۇل جەرلەر ساتۋ ماقساتىندا 50 تاۋەلسىز ۋچاسكەگە بولىنگەن.
جەردىڭ نىسانالى ماقساتىن وزگەرتۋ بويىنشا مەملەكەتتىك قىزمەتتەردى ۇسىنۋ پروسەسىنىڭ اشىقتىعى مەن باقىلاۋدىڭ بولماۋى سىبايلاس جەمقورلىق پراكتيكاسىنا الىپ كەلەدى.
الدىمەن باس جوسپارعا سايكەس كەلمەۋ جانە سەيسميكالىق جانە سۋ قورعاۋ ايماقتارىندا بولۋ سىلتاۋىمەن باس تارتادى. كەيىنىرەك سول ۋچاسكەلەر بويىنشا وزگەرتۋگە كەلىسىم بەرىلەدى.
وسىنداي 900-دەن استام فاكت انىقتالدى.
مىسالى، قالا تۇرعىنىنا ۋچاسكەلەردىڭ نىسانالى ماقساتىن وزگەرتۋگە باس تارتىلىپ، ءبىراق ءبىراز ۋاقىتتان كەيىن ولارعا رۇقسات بەرىلدى. بۇل رەتتە ونىڭ ۋچاسكەلەرىنىڭ ءبىرى اكىمدىكتىڭ لاۋازىمدى تۇلعاسىنىڭ تۋىسىنا اۋدارىلعان.
وسى پروسەستەرگە باقىلاۋدىڭ بولماۋى بيۋدجەتكە ءتيىستى تولەمدەردىڭ تۇسپەۋىنە اكەپ سوعادى. سوڭعى ءۇش جىلدا الدىن الا دەرەكتەر بويىنشا نىسانالى ماقساتى وزگەرگەن كەزدە كاداسترلىق قۇن ايىرماسى ءۇشىن 500 ملن تەڭگەدەن استام تولەنبەگەن.
سونىمەن قاتار، تەكتونيكالىق ءۇزىلىم ايماقتارىندا جەرلەر شىعارىلدى. وسىلايشا، جەكە كومپانيانىڭ ءبىرى اۋكسيون وتكىزبەستەن مەديسينالىق ورتالىق سالۋ ءۇشىن ينۆەستيسيالىق جوبا تۇرىندەگى قازاقفيلم اۋدانىندا جەر ۋچاسكەسىن جالعا الدى. كەيىن اياقتالماعان نىسان پايدالانۋعا بەرىلدى.
الماتى تۇرعىندارى اراسىندا تاۋ بوكتەرىندەگى ايماقتىڭ قۇرىلىسى ەرەكشە رەزونانس تۋدىردى
رۇقسات قۇجاتتارىن بەرۋ جانە كەلىسۋ كەزىندە سىبايلاس جەمقورلىق فاكتورلارى بار ەكەنى انىقتالدى. ساۋلەت ورگاندارى جەكە ءۇي قۇرىلىسىنىڭ ەسكيزىن بەكىتكەنىمەن، ءىس جۇزىندە كوپپاتەرلى تۇرعىن ءۇي كەشەنى سالىنادى.
"بۇل ۇيلەردى سۋعا جانە جىلۋعا قوسۋ ءۇشىن قولدا بار تەحنيكالىق شارتتار دا ەسكەرىلمەيدى. مەكتەپتەر، بالاباقشالار، ەمحانالار، جولدار جوق. ۇيلەردىڭ قاباتتىلىعى، زيراتتاردان سانيتارلىق-قورعاۋ ايماعىن قامتاماسىز ەتۋ بويىنشا تالاپتار بۇزىلادى"، – دەيدى سىبايلاس جەمقورلىققا قارسى ءىس-قيمىل اگەنتتىگىنىڭ ماماندارى.
قۇرىلىس سالۋشىلار بەكىتىلگەن ەسكيزدەردى بۇزا وتىرىپ، ىرگەلەس اۋماق: تروتۋارلار، سەرۋەندەۋ ايماقتارى جانە بالالار الاڭدارى ەسەبىنەن سالىنىپ جاتقان تۇرعىن ءۇي الاڭىن ۇلعايتادى.
وسى بۇزۋشىلىقتار بويىنشا ءقازىر قىلمىستىق ىستەر تەرگەلىپ جاتىر. سونىڭ اياسىندا لاۋازىمدى تۇلعالاردىڭ جاۋاپكەرشىلىگى قارالادى. تالداۋ جالعاسۋدا. ونىڭ تۇپكىلىكتى ناتيجەلەرى بويىنشا اتقارۋشى جانە ۋاكىلەتتى ورگانداردىڭ اتىنا ءتيىستى ۇسىنىمدار ەنگىزىلەدى.