شۆەيساريانىڭ كران-مونتانا تاۋ شاڭعىسى كۋرورتىندا بولعان ءىرى ورتتەن قازا تاپقان العاشقى ادامداردىڭ جەكە باسى انىقتالدى، دەپ حابارلايدى Aqshamnews.kz ءتىلشىسى Euronews-كە سىلتەمە جاساپ.
قازا تاپقانداردىڭ جەكە باسى انىقتالدى
ۆالە كانتونى پوليسياسىنىڭ مالىمەتىنشە، باردا شىققان ءورت سالدارىنان ءتورت ادام كوز جۇمعان. قازا تاپقانداردىڭ اراسىندا 21 جانە 16 جاستاعى شۆەيساريا ازاماتتارى، سونداي-اق 18 جانە 16 جاستاعى ەكى ءجاسوسپىرىم بار. مارقۇمداردىڭ جەكە باسى تولىق انىقتالىپ، مايىتتەرى تۋىستارىنا تاپسىرىلعان.
100-دەن استام ادام ەم قابىلداپ جاتىر
ورتتەن زارداپ شەككەن 100-دەن استام ادام مەديسينالىق كومەك الىپ جاتىر. ولاردىڭ ءبىر بولىگى شەتەلدىك كلينيكالارعا جەتكىزىلگەن. اتاپ ايتقاندا، ءبىرقاتار ناۋقاس گەرمانيا اۋرۋحانالارىنا شۇعىل تۇردە تاسىمالداندى. الداعى كۇندەرى زارداپ شەككەندەردى فرانسيا، يتاليا جانە بەلگيا اۋرۋحانالارىنا اۋىستىرۋ جوسپارلانىپ وتىر. جالپى شەتەلگە شامامەن 50 ادامدى جىبەرۋ كوزدەلگەن.
دارىگەرلەر جاعدايدى اۋىر دەپ باعالاپ وتىر
مەديسينا ماماندارى كوپتەگەن ناۋقاستىڭ جاعدايىن وتە اۋىر دەپ باعالاۋدا. زارداپ شەككەندەردىڭ اراسىندا كامەلەتكە تولماعاندار دا بار. كەيبىر جابىرلەنۋشىلەردىڭ دەنەسىنىڭ 70 پايىزدان استامى كۇيگەن، سونداي-اق ءتۇتىن جۇتۋدان وكپەسىنە اۋىر زاقىم كەلگەن. دارىگەرلەر ۇزاق ءارى كۇردەلى ەمدەۋ، بىرنەشە وپەراسيا قاجەت بولاتىنىن ەسكەرتەدى.
ءورت قاۋىپسىزدىگى تالاپتارىنا قاتىستى سىن كۇشەيدى
قايعىلى وقيعادان كەيىن بارداعى ءورت قاۋىپسىزدىگى تالاپتارىنىڭ ساقتالماۋىنا قاتىستى سىن ۇدەي ءتۇستى. كۋاگەرلەر جەرتولەدەن شىعاتىن تار باسپالداقتا ادامداردىڭ كەپتەلىسى بولعانىن ايتادى. ب ا ق مالىمەتىنشە، 2015 جىلعى جوندەۋ جۇمىستارى كەزىندە ەۆاكۋاسيالىق ءوتۋ جولى تارىلعان بولۋى مۇمكىن. سونىمەن قاتار قوسالقى شىعۋ جولىنىڭ ءجيى جابىق تۇرعانى جانە اۆاريالىق ەسىكتىڭ تەمەكى شەگەتىن بولمە رەتىندە پايدالانىلعانى تۋرالى اقپارات تارادى.
قايعىلى وقيعا قالاي بولدى
قايعىلى جاعداي 1 قاڭتارعا قاراعان ءتۇنى كران-مونتانا كۋرورتىنداعى Constellation بارىندا بولعان. الدىن الا مالىمەت بويىنشا، الدىمەن جارىلىس بولىپ، ارتىنشا ءىرى ءورت شىققان.
پرەزيدەنت كوڭىل ايتتى، ازا تۇتۋ جاريالاندى
وقيعاعا بايلانىستى قازاقستان پرەزيدەنتى قاسىم-جومارت توقايەۆ شۆەيساريا كونفەدەراسياسىنىڭ پرەزيدەنتى گي پارمەلانعا كوڭىل ايتۋ جەدەلحاتىن جولدادى.
شۆەيساريا بيلىگىنىڭ مالىمەتىنشە، ءورت سالدارىنان زارداپ شەككەندەردىڭ كەمىندە 80ء-ىنىڭ جاعدايى اۋىر. قايعىلى وقيعاعا بايلانىستى كران-مونتانا تاۋ شاڭعىسى كۋرورتىندا بەس كۇندىك ازا تۇتۋ جاريالاندى.