شۆەيساريا جاڭا سانيتارلىق ەرەجەلەر ەنگىزۋدە
13 قىركۇيەكتەن باستاپ ەلدە ۆاكسينالاۋ سەرتيفيكاتى، كوروناۆيرۋستىڭ جوق ەكەنىن راستايتىن تەستتىڭ تەرىس ناتيجەسى نەمەسە ءقاۋىپتى دەرتپەن اۋىرعانى جايلى انىقتامانى مەيرامحانالار، تەاترلار، كينوتەاترلار مەن فيتنەس-ورتالىقتاردا تەكسەرەتىن بولادى، دەپ حابارلايدى Almaty-akshamy.kz Euronews.com-عا سىلتەمە جاساپ.
جاڭا ەنگىزىلەتىن شارا مىڭنان استام ادام قاتىساتىن اشىق دالادا دا قولدانىلادى. سانيتارلىق رۇقسات قۇجاتى 16 جاستان اسقان بارلىق شۆەيساريالىقتارعا قاجەت بولماق.
ەل بيلىگى مۇنداي قوسىمشا شارالاردى جۇقتىرۋ دەڭگەيىنىڭ كوبەيۋىنە بايلانىستى ەنگىزىپ وتىر: مۇندا كۇنىنە COVID-19-دى جۇقتىرۋدىڭ 3 مىڭعا جۋىق جاڭا وقيعاسى تىركەلەدى. وسىعان ۇقساس دەرەكتەر ءساۋىر ايىندا تىركەلگەن بولاتىن.
مينيستەرلەر كابينەتىندەگىلەر اۋرۋحانالارداعى جاعدايدىڭ وتە كۇردەلى ەكەنىن، ال قارقىندى تەراپيا بولىمدەرى ناۋقاستارعا بارىنشا تولعانىن مالىمدەدى. كەي جەرلەردە ناۋقاستاردى ءتىپتى باسقا قالالارعا تاسۋعا تۋرا كەلىپ تۇرعان كورىنەدى. بيلىكتەگىلەر بۇنىڭ بالامالى نۇسقاسى تەك قانا لوكداۋن ەنگىزۋ دەپ تولىقتىردى.
بۇگىنگى تاڭدا شۆەيساريا تۇرعىندارىنىڭ جارتىسىنان استامى ۆاكسيناسيانىڭ تولىق كۋرسىنان وتكەن.