جىراقتا جۇرگەن قانداستار ەلگە جەتتى
اۋعانستانداعى قازاقتار ەلگە جەتكىزىلدى، دەپ حابارلايدى Almaty-akshsmy.kz قازاقپارات سايتىنا سىلتەمە جاساپ.
«مەملەكەت باسشىسى ق.ك.توقايەۆتىڭ تاپسىرماسى بويىنشا بۇگىن اۋعان ەلىندە تۇراتىن ءبىر توپ قازاق قانداسىمىز ەلىمىزگە ءساتتى ەۆاكۋاسيالاندى. كابۋلدان الماتىعا ارنايى رەيسپەن 35 قانداسىمىز، 4 قازاقستان ازاماتى جانە بۇۇ-نىڭ 1 قىزمەتكەرى جەتكىزىلدى. پرەزيدەنت ديپلوماتتارىمىزعا جانە يگى ءىستى ۇيىمداستىرۋعا اتسالىسقان بارلىق ۆەدومستۆو قىزمەتكەرلەرىنە العىس ايتتى»، - دەپ جازدى بەرىك ءۋالي Facebook-تەگى پاراقشاسىندا.
ەسكە سالا كەتسەك، ق ر پرەزيدەنتى قاسىم-جومارت توقايەۆ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتاسىن تاپسىرۋ راسىمىندە اۋعانستانداعى قازاق دياسپوراسىن ەلگە قايتارۋ ماسەلەسىن قاراستىرىپ جاتقانىن مالىمدەگەن ەدى. 20 تامىزدا ق ر ءسىم حالىقارالىق اقپارات كوميتەتى ءتوراعاسىنىڭ ورىنباسارى – باسپا ءسوز حاتشىسى ايبەك سمادياروۆ اۋعانستانداعى قانداستاردى ەلگە اكەلۋ جۇمىسى قاي ساتىدا ەكەنىن ايتقان بولاتىن.