ناۋرىزباي اۋدانىندا الەۋمەتتىك ينفراقۇرىلىمدى دامىتۋ جۇمىستارى ىسكە اسىپ جاتىر. الداعى جىلدارى جاڭا مەكتەپتەر، بالاباقشالار مەن ەمحانالار سالىنىپ، اۋدان تۇرعىندارى ءۇشىن قىزمەت جاعى ءالى دە قولجەتىمدى بولا تۇسپەك. وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ناۋرىزباي اۋدانىنىڭ اكىمى نازيرا توعىزبايەۆا وسىلاي دەپ مالىمدەدى.
2024–2025 وقۋ جىلىندا ناۋرىزباي اۋدانىندا الەۋمەتتىك ينفراقۇرىلىم بويىنشا ءبىراز جوبا جۇزەگە اسپاق. ءقازىر اۋداندا 33 000 وقۋشى تىركەلگەن. «جايلى مەكتەپ» جوباسى اياسىندا جاڭا ءبىلىم بەرۋ نىساندارى اشىلىپ، جىل سوڭىنا دەيىن «نۇرلى دالا» تۇرعىن ءۇي كەشەنىندە 1500 ورىندىق جاڭا مەكتەپ ىسكە قوسىلادى. سونىمەن قاتار، «ەلىماي» تۇرعىن ءۇي كەشەنى، قۇرامىس پەن شۇعىلا شاعىن اۋدانىندا ءۇش مەكتەپ سالىنىپ جاتىر. سونىڭ ارقاسىندا اۋداندا 6000-نان استام جاڭا وقۋشى ورنى پايدا بولماقشى.
«جاڭا ءبىلىم بەرۋ نىساندارىن اشۋ – بىزدەگى باسىم باعىتتىڭ ءبىرى. بالالارىمىز ساپالى ءبىلىم الۋى ءۇشىن وسى زامانعى ءارى قولايلى ينفراقۇرىلىم جاساۋىمىز قاجەت»، - دەپ اتاپ ءوتتى نازيرا توعىزبايەۆا.
بيىل قىركۇيەكتە شۇعىلا شاعىن اۋدانىندا 320 ورىندىق بالاباقشا اشىلادى. سونداي-اق، 2025 جىلدىڭ سوڭىنا دەيىن تاعى ءۇش بالاباقشا سالىنىپ بىتپەكشى. ءارقايسىسى 320 ورىنعا ارنالعان ولاردىڭ ەكەۋى – قۇرامىس پەن شۇعىلا شاعىن اۋدانىندا، قالقامان شاعىن اۋدانىندا 240 ورىندىق بالاباقشا تاعى سالىنادى.
«مەكتەپكە دەيىنگى ءبىلىم بەرۋدى دامىتۋ – بالالارىمىزعا قولايلى جاعداي جاساۋ ءۇشىن كەرەك. ءار بالانىڭ جاڭا دا جايلى بالاباقشاعا بارۋىنا مۇمكىندىك جاساۋ ءۇشىن جۇمىس ىستەپ جاتىرمىز»، - دەيدى اۋدان اكىمى.
دەنساۋلىق ساقتاۋ سالاسىندا دا ماڭىزدى جۇمىستار قولعا الىنعان. 2025 جىلدىڭ شىلدەسىندە قۇرامىس شاعىن اۋدانىندا كۇنىنە 500 ادامدى قابىلداي الاتىن ەمدىك-دياگنوستيكالىق ورتالىعى بار ەمحانانىڭ قۇرىلىسى باستالدى. سونىمەن قاتار، اقجار شاعىن اۋدانىندا 200 ادامعا ارنالعان العاشقى مەديسينالىق-سانيتارلىق كومەك ورتالىعىنىڭ قۇرىلىسىنا ارنالعان مەملەكەتتىك ساراپتامانىڭ قورىتىندىسى قازان ايىندا شىعىپ قالادى.
«ءبىلىم بەرۋ مەن دەنساۋلىق ساقتاۋ – ءبىزدىڭ جۇمىسىمىزدىڭ نەگىزگى ەكى باعىتى. جاڭا مەكتەپتەر، بالاباقشالار مەن مەديسينالىق مەكەمەلەردىڭ سالىنۋى اۋدان تۇرعىندارىنىڭ ءومىر ساپاسىن ارتتىرۋعا ىقپال ەتەدى»، - دەدى ناۋرىزباي اۋدانىنىڭ اكىمى نازيرا توعىزبايەۆا.
سونداي-اق، ناۋرىزباي اۋدانىندا ەكى دەنە شىنىقتىرۋ-ساۋىقتىرۋ كەشەنىنىڭ قۇرىلىسى جوسپارلانىپ وتىر. شۇعىلا شاعىن اۋدانىندا نىساننىڭ 2026 جىلدىڭ تامىزىندا پايدالانۋعا بەرىلمەك، ال اقجار شاعىن اۋدانىندا قۇرىلىس جۇمىستارى قىركۇيەك ايىندا باستالادى. ءقازىر جوبالىق-سمەتالىق قۇجاتتامانىڭ ازىرلەنۋى اياقتالىپ قالدى، شىلدە ايىنىڭ سوڭىنا دەيىن مەملەكەتتىك ساراپتامانىڭ قورىتىندىسى شىعۋى كەرەك.