ناۋرىزباي اۋدانىندا «حالىق قاتىساتىن بيۋدجەت» باعدارلاماسى مەن قالالىق باستامالاردىڭ ارقاسىندا جىلدىڭ سوڭىنا دەيىن 80-نەن استام اباتتاندىرۋ، كوگالداندىرۋ مەن ينفراقۇرىلىمدى دامىتۋ جوباسى جۇزەگە اسادى. وڭىرلىك كوممۋنيكاسيالار قىزمەتىندە اۋدان اكىمى نازيرا توعىزبايەۆا وسىلاي دەدى.
«2024 جىلى «حالىق قاتىساتىن بيۋدجەت» ارقىلى 10 قوعامدىق كەڭىستىك پەن ەكى اۋلاعا 2،5 ميلليارد تەڭگە ءبولىندى. ول قارجى تروتۋار سالىپ، اۆتوسۋارۋ جۇيەسىن ورناتىپ، كوگالداندىرۋ مەن جارىقتاندىرۋعا، اسفالت توسەپ، قورشاۋ ورناتۋ جۇمىستارىنا جۇمسالدى. بيىل قارجىلاندىرۋ كولەمى ساقتالدى، ءقازىر تۇرعىنداردان تۇسكەن 1300-دەن استام ۇسىنىستىڭ اراسىنان ىرىكتەلىپ الىنعان 34 جاڭا جوبا ىسكە اسىرىلىپ جاتىر»، - دەيدى نازيرا توعىزبايەۆا.
ءقازىر شۇعىلا تۇرعىن ءۇي كەشەنىندە جاياۋ جۇرگىنشىلەر جولىن اباتتاندىرۋ مەن قوقىس الاڭدارىنىڭ قۇرىلىس كاركاستارىن ورناتىپ جاتىر. جاندوسوۆ كوشەسىندە جولدى كەڭەيتىپ، تروتۋارلار سالىپ، اۆتوسۋارۋ جۇيەسىن قۇرۋ جۇمىستارى قولعا الىندى. تاستىبۇلاق وزەنىنىڭ بويىندا ۇزىندىعى 1،4 شاقىرىم بولاتىن جاياۋ جۇرگىنشىلەر جولى جاسالىپ جاتىر.
جىل سوڭىنا دەيىن الاتاۋ داڭعىلى مەن سابدەنوۆ كوشەسىن اباتتاندىرىپ، جاندوسوۆ كوشەسىنەن اقساي وزەنىنە دەيىنگى ساپوجنيكوۆ وزەنىنىڭ ارناسىن نىعايتۋ مەن قارعالى وزەنىنىڭ رايىمبەك داڭعىلىنا دەيىنگى جاعالاۋىن اباتتاندىرۋ جاعى جوسپارلانعان.
سونىمەن قاتار، اباي داڭعىلى مەن قونايەۆ، الاتاۋ، ءاشىموۆ، شالياپين سياقتى ۇلكەن-ۇلكەن كوشەلەردە ساندەپ جارىقتاندىرۋدى قولعا الماق.
قالالىق «ديزاين-كود» كونسەپسياسى اياسىندا 20 كوپقاباتتى ءۇيدىڭ قاسبەتىن جوندەۋ جۇمىستارى باستالدى. سونىمەن قاتار، وتكەن جىلمەن سالىستىرعاندا جوندەلەتىن اۋلالار سانى ءۇش ەسەگە ارتىپ، 16-دان 47-گە دەيىن كوبەيگەن.
اۋدان الەۋمەتتىك ينفراقۇرىلىمدى دا بەلسەندى تۇردە جاڭارتىپ جاتىر. جەڭىستىڭ 80 جىلدىعىنا وراي №187 مەكتەپ اۋماعى اباتتاندىرىلىپ، «ماڭگىلىك الاۋ» مونۋمەنتى ورناتىلدى. اقجار شاعىن اۋدانى مەن زيمانوۆ كوشەسىندە بالالار مەن سپورت الاڭدارىنا كۇردەلى جوندەۋ جاسالدى. ايتماتوۆ كوشەسىندە جاڭا قورشاۋ ورناتىلىپ، ارىق جۇيەسى مەن سپورت جابدىقتارى جاڭارتىلدى. قوسىمشا بولىنگەن 200 ميلليون تەڭگە قارعالى، اباي، رايىمبەك، كارەرنايا مەن باسقا دا كوشەلەر بويىنشا جوبالاردى ىسكە اسىرۋعا مۇمكىندىك بەرەدى.
ۋسيكوۆ كوشەسىندە سىرعىمالى جانە سۋ تاسقىنى ءقاۋپى بار اۋماقتاردى نىعايتۋ جۇمىستارى اياقتالدى، بۇل كۇشتى جاۋىن-شاشىن كەزىندە وقىس وقيعانىڭ الدىن الۋعا مۇمكىندىك بەرەدى.
«بارلىق جۇمىستار قالاداعى جايلى ورتا كونسەپسياسى اياسىندا جۇزەگە اسىرىلىپ، تۇرعىنداردىڭ قولداۋىمەن جۇرگىزىلىپ جاتىر. ءبىز اۋدانىمىزدى اباتتاندىرىپ قانا قويماي، ونى ءقاۋىپسىز ەتۋگە دە تىرىسىپ جاتىرمىز»، - دەپ اتاپ ءوتتى نازيرا توعىزبايەۆا.