ناۋرىزباي اۋدانى تۇرعىنداردىڭ ءومىر ساپاسىن جاقسارتۋ ءۇشىن تىنباي جۇمىس ىستەپ جاتىر. ەڭبەكپەن قامتۋ، مەكەنجاي بويىنشا كومەك كورسەتۋ، بارلىق جاسقا ارنالعان تەگىن ۇيىرمەلەر مەن كۋرستار ۇيىمداستىرۋدان باستاپ، الەۋمەتتىك قولداۋ جاعى دا قولعا الىنعان. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز كونفەرەنسياسىندا اۋدان اكىمى وسىعان جان-جاقتى توقتالدى.
ناۋرىزباي اۋدانى الەۋمەتتىك قولداۋ مەن حالىقتى جۇمىسپەن قامتۋ جاعىن مىقتاپ قولعا الدى. ءقازىر 583 وتباسىعا جالپى سوماسى 140،1 ميلليون تەڭگە كولەمىندە مەكەنجايلىق الەۋمەتتىك كومەك بەرىلىپ جاتىر. 12 ءوتىنىش بەرۋشىگە 584 مىڭ تەڭگە كولەمىندە تۇرعىن ءۇي كومەگى كورسەتىلدى.
ۇلتتىق كاسىپكەرلىكتى دامىتۋ جوباسى اياسىندا اۋدان بويىنشا 2 713 ادام جۇمىسقا ورنالاسقان. ونىڭ ىشىندە 684 ادام تۇراقتى جۇمىس، 1 714 ادام قوعامدىق جۇمىستار اياسىندا ۋاقىتشا جۇمىسقا تۇردى. سونىمەن قاتار، 107 ادام الەۋمەتتىك جۇمىس ورىندارىنا، 64 ادام قوعامدىق جۇمىس ورىندارىنا جىبەرىلىپ، 48 جاس مامان پراكتيكادان ءوتىپتى.
اۋدان اۋماعىندا «باقىتتى وتباسى» مەن «شىڭعا ورلەۋ» الەۋمەتتىك ورتالىقتارى جاقسى جۇمىس ىستەپ جاتىر. بۇل ورتالىقتار از قامتىلعان جانە كوپ بالالى وتباسىلارعا جان-جاقتى كومەك كورسەتەدى. مۇندا ايەلدەر تەگىن تىگىن ءىسىن، كوسمەتولوگيا نەگىزدەرىن، كومپيۋتەرلىك ساۋاتتىلىق پەن باسقا دا سۇرانىسقا يە كاسىپتى ۇيرەنە الادى. بالالارعا ونەر مەن شەت تىلدەرى بويىنشا ساباقتار ۇيىمداستىرىلادى.
اۋدانداعى قارت تۇرعىندارعا ەرەكشە كوڭىل بولىنگەن. «بەلسەندى ۇزاق ءومىر ءسۇرۋ ورتالىعىندا» ولار سپورتپەن شۇعىلدانىپ، شىعارماشىلىقپەن اينالىسىپ، بي سىنىپتارىنا قاتىسىپ، دەنساۋلىق ساقتاۋعا بايلانىستى قىزمەت كورسەتەدى ولارعا. مۇگەدەكتىگى بار ادامدار «TenQogam مۇگەدەكتەرگە الەۋمەتتىك قولداۋ ورتالىعىندا» بازالىق كومپيۋتەرلىك داعدىلاردى ۇيرەنىپ، اعىلشىن ءتىلىن وقىپ، كاسىپكەرلىك ترەنينگتەرگە قاتىسا الادى.
بالالار مەن جاستاردىڭ شىعارماشىلىق جانە سپورتقا قابىلەتىن دامىتۋعا باعىتتالعان «DamuBala» باعدارلاماسى ۇلكەن سۇرانىسقا يە. وسى باعدارلامانى جۇزەگە اسىرۋعا جەرگىلىكتى بيۋدجەتتەن 1،4 ميلليارد تەڭگە ءبولىندى. باعدارلامانىڭ ارقاسىندا 4 مىڭنان استام بالا تەگىن ۇيىرمە مەن سپورت سەكسياسىنا قاتىسادى. سونىمەن قاتار، اۋدان اكىمدىگى ۇنەمى وسى باستامانىڭ ساپاسىن باقىلاپ، ەسەپ بەرۋ كونسەرتتەرىن ۇيىمداستىرادى.
«ناۋرىزباي اۋدانىنىڭ الەۋمەتتىك ساياساتى ءار ادامنىڭ دامۋى مەن قولداۋىنا ناقتى جاعداي جاساۋعا باعىتتالعان» - دەيدى نازيرا توعىزبايەۆا.