شري-لانكا پرەزيدەنتى گوتابايا رادجاپاكسا كولومبودا تاۋلىك بويى وتكەن حالىق شەرۋىنەن كەيىن وتستاۆكاعا كەتتى. بۇل تۋرالى كەشە پارلامەنت سپيكەرى ماحيندا ياپا ابەيۆاردەنا مالىمدەدى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇعان دەيىن ەل پرەمەر-مينيسترى رانيل ۆيكراماسينگحە دە «ازاماتتاردىڭ قاۋىپسىزدىگى ءۇشىن» قىزمەتىنەن كەتۋگە دايىن ەكەنىن مالىمدەگەن. سەنبى كۇنى نارازىلىق بىلدىرگەن مىڭداعان ادام پرەزيدەنت رەزيدەنسياسىن باسىپ الدى. ءتارتىپ ساقشىلارى اسپانعا وق اتىپ، كوزدەن جاس اعىزاتىن گاز قولداندى، ءبىراق حالىقتى تاراتا المادى. كەم دەگەندە 45 ادام جاراقات الدى.
«بۇگىن ءبىز جەكپە-جەكتە جەڭىسكە جەتتىك دەسەم، قاتەلەسپەيمىن. بارلىق كەلىسپەۋشىلىكتەردى قويا تۇرىپ، پرەزيدەنتتىڭ ءۇيىن باسىپ الدىق. ءبىز گوتابايا رادجاپاكسا مىرزانىڭ وتستاۆكاعا كەتەمىن دەگەن مالىمدەمەسىن كۇتەمىز»، - دەيدى نارازىلىق بىلدىرۋشىلەردىڭ ءبىرى، كولومبو تۇرعىنى موحاماد يمران. شري-لانكادا 9 شىلدەدە شارىقتاۋ شەگىنە جەتكەن نارازىلىق شارالارى بىرنەشە ايدان بەرى جالعاسىپ كەلەدى.
ەل تۇرعىندارى ۇكىمەتتىڭ بۇرىن-سوڭدى بولماعان ەكونوميكالىق داعدارىسقا قارسى قالاي جۇمىس اتقارىپ جاتقانىنان نارازى: شىلدەدە ەلدەگى ازىق-تۇلىك ينفلياسياسى 57%-عا جەتتى – تۇرعىندار تاماق ىشۋگە اقشا تاپپاي ءجۇر، ال جانارماي تاپشىلىعىنا بايلانىستى حالىق بەنزين كەزەگىندە بىرنەشە كۇننەن تۇرادى. جاعدايدىڭ كۇردەلى بولعانى سونشا، مەملەكەتتىك قىزمەتكەرلەرگە بەس جىلعا دەمالىس الىپ، ارالدا قالعان تۋىستارىنا اقشالاي كومەكتەسۋ ءۇشىن شەتەلگە كوشۋ ۇسىنىلعان.