بۇگىندە تەحنولوگيانىڭ دامۋىمەن قاتار ينتەرنەتتەگى قىلمىس سانى دا ارتىپ وتىر. بۇل تۋرالى Almaty-akshamy.kz حابارلايدى Inform.kz-كە سىلتەمە جاساپ.
بۇل تەك قازاقستان عانا ەمەس، بۇكىل الەمدە كۇن تارتىبىندە تۇرعان وزەكتى ماسەلەنىڭ بىرىنە اينالدى. Check Point كومپانياسىنىڭ زەرتتەۋىنە سايكەس، 2021 جىلى 2020 جىلمەن سالىستىرعاندا الەمدەگى كيبەرقىلمىس سانى 40%-عا وسكەن. ماماندار بۇعان پاندەميا كەزىندە بارلىق سالانىڭ ونلاينعا كوشۋى بىردەن-بىر سەبەپ ەكەنىن ايتادى. ەلىمىزدەگى جاعداي دا كوڭىل كونشىتەرلىك ەمەس. ماسەلەن، مامىر ايىنداعى سوڭعى دەرەكتەر بويىنشا، قازاقستاندا بيىل 24 501 الاياقتىق فاكتىسى تىركەلگەن. ال ونىڭ 10 478ء-ىن نەمەسە 42،7%-ىن ينتەرنەتتەگى الاياقتىق قۇرايدى. 2019 جىلمەن سالىستىرساق، وسىدان ءۇش جىل بۇرىن كيبەرقىلمىستىڭ 7 مىڭ فاكتىسى تىركەلگەن. بۇل بيىلعى بەس ايداعى كورسەتكىش قانا.
ساراپشىلار جىل سوڭىندا بۇدان دا الدەقايدا كوپ بولۋى مۇمكىن ەكەنىن ەسكەرتىپ وتىر. وسىعان بايلانىستى ەلىمىزدەگى كيبەرقاۋىپسىزدىك ماسەلەسى قالاي شەشىلىپ جاتىر، سالادا قانداي پروبلەما بار، ادامدار نەلىكتەن الدانادى، سيفرلىق ساۋاتتىلىق دەڭگەيىن ارتتىرۋ ءۇشىن نە ىستەۋ كەرەك دەگەن ساۋالدارعا جاۋاپ ىزدەۋدى ءجون سانادىق.
قازاقستان كيبەركاۋىپسىزدىك رەيتينگىندە 31-ورىندا
بۇگىندە جاھاندىق كيبەرقاۋىپسىزدىك يندەكسىندە قازاقستان جوعارى كوتەرىلىپ كەلەدى. بۇۇ حالىقارالىق ەلەكتربايلانىس وداعىنىڭ ەسەبى بويىنشا قازاقستان 31-ورىندا. بارلىق كريتەريي بويىنشا 15-تەن 20 ۇپايعا دەيىن جوعارى باعا الىپ، يندەكسى – 93،15 بولدى. ساراپشىلار بۇل قازاقستان ءۇشىن جاقسى كورسەتكىش ەكەنىن ايتادى. ماسەلەن، وسىدان 3 جىل بۇرىن ەلىمىز 83-ورىنعا تۇراقتاسا، ءبىر جىل بۇرىن 40-ورىندى يەمدەنگەن ەدى. اتالعان رەيتينگتىڭ كوش باسىندا اقش (1-ورىن)، ۇلىبريتانيا مەن ساۋد ارابياسى (2-ورىن) جانە ەستونيا (3-ورىن) تۇر. ال ميكرونەزيا، يەمەن جانە ۆاتيكان سەكىلدى مەملەكەتتەر جايلى دەرەكتەر جوق. تومەندەگى كەستەدە كيبەرقاۋىپسىزدىك رەيتينگى بويىنشا ەڭ ۇزدىك ون مەملەكەتتىڭ دياگرامماسى بەرىلگەن.
ال پوستكەڭەستىك جانە تمد ەلدەرىنىڭ ىشىندە ەلىمىز رەسەيدەن كەيىنگى ەكىنشى ورىندا ەكەنىن بايقايمىز. قالعان مەملەكەتتەر كيبەرقاۋىپسىزدىك بويىنشا رەيتينگتە قازاقستاننان تومەن ورنالاسقان. ماسەلەن، ازەربايجان – 40، مولدوۆا – 63، وزبەكستان – 70، ۋكراينا – 78، بەلارۋس – 89، ارمەنيا – 90، قىرعىزستان – 92، تاجىكستان – 138، تۇرىكمەنستان – 144-ورىنعا لايىق دەپ تانىلعان. جالپى 200-گە جۋىق مەملەكەتتىڭ ىشىنەن قازاقستاننىڭ 31-ورىنعا تۇراقتاۋى ەلدەگى كيبەرقاۋىپسىزدىك سالاسىنىڭ دامىعانىن كورسەتە مە؟ بۇل تۋرالى كيبەرشابۋىلداردى تالداۋ جانە تەرگەۋ ورتالىعىنىڭ ساراپشىسى ءالايدار امىرسەيىتتەن سۇراپ كورگەن ەدىك.
«ءوزىڭىز ايتىپ وتىرعانداي، 31-ورىن – جاقسى كورسەتكىش. قازاقستاندا كيبەرقاۋىپسىزدىك سالاسى جولعا قويىلىپ، جاقسى دامىپ كەلە جاتقانىنىڭ ءبىر دالەلى. ويتكەنى رەيتينگ جاساۋشىلاردىڭ ءوز تالاپتارى بار. سونداعى كورسەتكىشتەر ساراپتالىپ، ناتيجە شىعادى. ودان كەيىن بۇل باسەكەگە قابىلەتتى ەل ەكەنىمىزدى دە كورسەتىپ وتىر. دەگەنمەن الدا زاڭنامانى جەتىلدىرۋ، حالىقتىڭ سيفرلىق ساۋاتتىلىعىن ارتتىرۋ، سونىمەن قوسا تەحنيكالىق رەسۋرستار جاعىنان دا جەتىلدىرۋ جۇمىستارى كۇتىپ تۇر»،-دەدى ول.