ناۋرىزدىڭ 19 كۇنى ساعات 18.00-دە اباي اتىنداعى قازاق ۇلتتىق وپەرا جانە بالەت تەاترىنىڭ ۇلكەن ساحناسىندا قازاق كسر-نىڭ حالىق ءارتىسى، وپەرا ءسوليسى، ۇستاز شورا ۇمبەتالييەۆتىڭ 80 جىلدىعىنا ارنالعان مەرەكەلىك كونسەرت وتەدى، دەپ حابارلايدى اlmaty-akshamy.kz
كونسەرت شىعارماشىلىق جولى جارتى عاسىرعا جۋىق ۇرپاققا ۇلگى-ونەگە بولعان كورنەكتى ورىنداۋشىنىڭ ەسىمىنە تاعزىم بولماق. شورا ۇمبەتالييەۆ اباي اتىنداعى وپەرا جانە بالەت تەاترىنىڭ ۇلكەن ساحناسىندا 40 جىل قىزمەت ەتتى.
«تەاترىمىزدا ۇزاق جىلدار قىزمەت ەتكەن قاريالاردى ەسكە الۋ ەرتەدەن كەلە جاتقان جاقسى داستۇرگە اينالعان. ءانشى مەن ورىنداۋشىنىڭ سانىندا شەك جوق، ال تۇلعا - ساۋساق سانارلىق. تۇلعا ساحناعا شىققاندا، ساحنا تۇرلەنىپ، ءبىزدى بىردەن باسقا دەڭگەيگە كوتەرەدى. شورا ۇمبەتالييەۆ ءدال وسىنداي تۇلعا ەدى. ونىڭ سيرەك باس - داۋىسى، ۆوكالدىق جانە اكتەرلىك شەبەرلىگى كورەرمەندى وزىنە تارتىپ، ونىڭ قاتىسۋىنسىز بىردە-بىر قويىلىم ساحناعا جول تارتپادى. ول قازاق كومپوزيتورلارىنىڭ شىعارمالارىن وتە بەلسەندى تۇردە ناسيحاتتادى. ونىڭ پارتيالارى – جەكە دارا تۋىندى، سوندىقتان ولاردى تەاترىمىزدىڭ انتولوگياسىنا قوسۋعا بولادى»، - دەيدى اباي اتىنداعى ءقازۇوبت-نىڭ قويۋشى-رەجيسسەرى، ق ر ەڭبەك سىڭىرگەن قايراتكەرى ءلايلىم يمانعازينا.
شورا ۇمبەتالييەۆ سومداعان بەينەلەردە ءانشىنىڭ بيىك ارتىستىك دارىنى، پسيحولوگيالىق تولعانىسى، ساحنالىق شەبەرلىگى ورنىن تاپتى. ونىڭ ورىنداۋىنداعى ۇزدىك پارتيالار – سىرتتان («اباي» ا. جۇبانوۆ پەن ل. حاميدي)، بەكەجان مەن قوجاق («قىز جىبەك» جانە «ەر تارعىن» ە. برۋسيلوۆسكيي)، جانبوتا («ءبىرجان سارا» م. تولەبايەۆ)، تايشىق حان («الپامىس» ە. راحمادييەۆ)، كەڭگىرباي («ەڭلىك كەبەك» ع. جۇبانوۆا)، مىلقاۋ مەن ابىلايحان («احان سەرى – اقتوقتى» جانە «جۇمباق قىز» س. مۇحامەدجانوۆ)، مازامحان («سادىر پالۋان» ق. قوجامياروۆ)، ديىرمەنشى («سۋ پەرىسى» ا. دارگومىجسكيي).
كەش باعدارلاماسىندا اباي اتىنداعى قازۇوبت وپەرا ترۋپپاسىنىڭ جەتەكشى سوليستەرى مەن Astana-Operaدان شاقىرىلعان قوناقتار ازامات جىلتىرگوزوۆ پەن تالعات مۇسابايەۆتىڭ ورىنداۋىندا شورا ۇمبەتالييەۆتىڭ رەپەرتۋارىنان قازاق كومپوزيتورلارىنىڭ شىعارمالارىنا ارنالعان اريالار شىرقالادى.