شوكولادتا ۆاكسينا بار ما؟

الەۋمەتتىك جەلىلەردە وسى سىڭايداعى ۆيدەو تاراعان.

ۆيدەو اۆتورىنىڭ ايتۋىنشا، سۋپەرماركەتتەگى شوكولاد قاپتاماسىنداعى ەرەكشە بەلگى ۆاكسينا كومپونەنتتەرىنىڭ بارىن بىلدىرەدى، دەپ حابارلايدى Almaty-akshamy.kz

بۇرىن مۇنداي ونىمدەرگە باقانىڭ سۋرەتى سالىنىپ كەلگەن، ال بۇل تۋرالى كوبىنە بەلگىلى بولعاندىقتان، لوگوتيپ وزگەرتىلدى. مۇنىڭ ءبارى وتىرىك.

بۇعان دەيىن جەلىدە باقانىڭ كىشكەنتاي بەينەسى بار ونىمدەردە بيلل گەيتس جاساعان ۆاكسينالار بار دەگەن قاستاندىق تەورياسى تاراعان بولاتىن.

شىن مانىندە، باقا لوگوتيپى Rainforest Alliance ۇيىمىنا تيەسىلى. قاپتاماداعى بەينە تاۋاردىڭ نەمەسە قاپتامانىڭ ەكولوگياعا ەڭ از زيان كەلتىرىپ وندىرىلگەنىن جانە ولاردى جاساۋ كەزىندە جۇمىس ىستەگەن ادامداردىڭ قۇقىقتارى بۇزىلماعانىن بىلدىرەدى.

پايدالانۋشىلار «ءقاۋىپتى» دەپ تانىعان لوگوتيپتىڭ ۆاكسيناعا دا، بيلل گەيتسكە دە قاتىسى جوق. وسى اتتاس باعدارلاماعا قاتىسا وتىرىپ، وندىرىلگەن ونىمدەردى جاسىل تۇسپەن جانە Cocoa Life جازۋىمەن بەلگىلەيدى. Cocoa Life – بۇل كاكاو بۇرشاقتارىن ونەركاسىپتىك اۋقىمدا ءوسىرۋ جانە جيناۋ پروسەسىن ەكولوگيالىق تازا ەتۋگە ارنالعان جاھاندىق باستاما. باستاما اياسىندا توپىراقتى تىڭايتۋ، زيانكەستەرمەن ەكولوگيالىق كۇرەس، لايىقتى جۇمىس ورىندارىن قۇرۋ، گەندەرلىك تەڭسىزدىكتى جويۋ، كەدەي ەلدەردە ءبىلىم الۋعا قول جەتكىزۋ جانە ت.ب. ماسەلەلەر شەشىلۋدە.

باعدارلامانىڭ رەسمي سايتىندا ۆاكسينالار، فارماكولوگيا نەمەسە گەيتس تۋرالى ءسوز جوق.

بيلل جانە مەليندا گەيتس قورى افريكاداعى كاكاو ونەركاسىبىن دامىتۋعا گرانتتار ءبولدى، ءبىراق بۇل قاراجات Cocoa life باستاماسىنىڭ اياسىندا پايدالانىلمادى.

جالپى، Cocoa life باعدارلاماسىنىڭ لوگوتيپى سالىنعان شوكولادتا نەمەسە باسقا ونىمدەردە ۆاكسينالار نەمەسە باسقا قۇپيا كومپونەنتتەر بار دەپ ساناۋعا نەگىز جوق. بۇل تەوريا دا، Rainforest Alliance سەرتيفيكاتتالعان ونىمدەردە بيلل گەيتس جاساعان كەيبىر دارى-دارمەكتەر بار دەگەن پىكىر دە جالعان.