1 شىلدەدەن باستاپ قازاقستاندىقتارعا قارجى پيراميدالارى تۋرالى ەسكەرتەتىن sms-تەر جولدانادى.
بۇل تۋرالى ق ر باس پروكۋرورى بەرىك اسىلوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جاقىن ارادا (اعىمداعى جىلدىڭ 1 شىلدەسىنەن باستاپ) قارجىلىق پيراميدالاردىڭ تاۋەكەلدەرى تۋرالى سمس-حابارلامالار تەتىگى ىسكە قوسىلادى. سونداي-اق، قۇقىق قورعاۋ جانە مەملەكەتتىك ورگاندار حالىق اراسىندا ءتۇسىندىرۋ جۇمىستارىن كۇشەيتۋگە باعدارلاندى. الاياقتىق پەن قارجى پيراميدالارىنا قارسى ءىس-قيمىل جالعاسادى جانە ەرەكشە باقىلاۋدا تۇر»، - دەپ جازىلعان باس پروكۋروردىڭ دەپۋتاتتارعا جولداعان جاۋابىندا.
باس پروكۋراتۋرانىڭ دەرەگى بويىنشا، 2020 جىلى قازاقستاندىقتار قارجى پيراميدالارىنا 6 ملرد تەڭگەدەن استام اقشا سالىپ جىبەرگەن. بۇل – كەيىنگى جىلدارداعى رەكوردتىق كورسەتكىش بولىپ ەسەپتەلەدى.
«سوڭعى 5 جىلدا قارجى پيراميدالارى تۋرالى ىستەردى تىركەۋ سەرپىنى تۇراقسىز (2017 ج - 74، 2018 ج - 103، 2019 ج - 24، 2020 ج - 180، 2021 ج - 160). 2020 جىلى ءوسىم بايقالعان. بۇل كەزەڭدە تىركەلگەن قىلمىستاردىڭ سانى 7 ەسە (24-تەن 180-گە دەيىن) وسكەن. كەلتىرىلگەن زالالدىڭ سوماسى 6 ملرد تەڭگەدەن استى (2019 ج - 1،6 ملرد تەڭگە). قارجى پيراميدالارىنىڭ سايتتارىنا 680 سىلتەمە بۇعاتتالدى. بانكتەر وپەراسيالاردىڭ كۇشەيتىلگەن مونيتورينگىنە جانە كۇدىكتى كليەنتتەرمەن ىسكەرلىك قارىم-قاتىناستاردى بۇزۋعا باعدارلاندى. وسىنداي 149 اداممەن ىسكەرلىك قارىم-قاتىناس توقتاتىلدى جانە ونى ورناتۋدان باس تارتىلدى. مىسالى، «Kaspi Bank» اق 40 سالىمشىنى تارتىپ ۇلگىرگەن «قارا قازان» قارجىلىق پيراميداسىنىڭ ۇيىمداستىرۋشىلارىنا قىزمەت كورسەتۋدى توقتاتتى»، - دەپ جازىلعان باس پروكۋروردىڭ جاۋابىندا.
ايتا كەتەيىك، وتكەن اپتادا الماتى قالاسىنداعى بوستاندىق اۋدانىنىڭ پروكۋراتۋراسى «Astra Consulting Agensy» جانە «Alpha Lux Consulting» قارجى پيراميدالارىنا قاتىستى قىلمىستىق ءىس سوتقا جولداعانىن ءمالىم ەتكەن ەدى.