دەنساۋلىق ساقتاۋ ءمينيسترى ەلدە ەپيدەميولوگيالىق جاعداي تۇراقتالعانىن مالىمدەدى

ەلدە تاۋلىگىنە كوروناۆيرۋس جۇقتىرۋدىڭ ون شاقتى جاعدايى تىركەلەدى.

بۇل تۋرالى دەنساۋلىق ساقتاۋ ءمينيسترى اجار عينيات مالىمدەدى، دەپ حابارلايدى Almaty-akshamy.kz 

"بۇگىندە ەلىمىزدىڭ بارلىق وڭىرلەرىندە ەپيدەميولوگيالىق جاعداي تۇراقتالدى، تاۋلىگىنە كوروناۆيرۋس ينفەكسياسىن جۇقتىرۋدىڭ شامامەن ون شاقتى جاعدايى تىركەلەدى، ناۋقاستاردىڭ 98%-دان استامى ساۋىعىپ كەتۋدە. بيىل 24 قاڭتاردا ۆەدومستۆوارالىق كوميسسيانىڭ وتىرىسىندا كارانتيندىك شارالاردى جەڭىلدەتۋ تاسىلدەرى قارالىپ، ماقۇلداندى. ءقازىر ەلدە بارلىق شەكتەۋ شارالارى الىنعان. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا، سوڭعى اپتادا بۇكىل الەمدە اۋرۋ 12%-عا تومەندەدى، ءبىراق اۋرۋدىڭ ءوسۋى امەريكا جانە افريكا وڭىرلەرىندە بايقالادى. سونىمەن قاتار، الەمنىڭ 97 ەلىندە سىرقاتتانۋشىلىق ارتۋدا، ماسەلەن، سوڭعى اپتادا ارمەنيادا سىرقاتتانۋشىلىق 200%، ۆەنگريادا 200% استام، بىرىككەن اراب امىرلىگىندە 55%-عا، جاپونيادا 54%-عا، سينگاپۋردا 37%-عا، يزرايلدە 15%-عا، تۇركيادا 12%-عا ءوستى"، - دەدى مينيستر. 

ونىڭ ايتۋىنشا، ەپيدەميولوگيالىق جاعدايدى كۇندەلىكتى بولجاۋ جانە باعالاۋ تۇراقتى نەگىزدە جالعاسۋدا، جاعداي ۋشىققان كەزدە كۆي-مەن اۋىراتىن ناۋقاستارعا مەديسينالىق كومەك كورسەتۋ ءۇشىن توسەك-ورىندار، ينفەكسيالىق اۋرۋحانالار، ەمدەۋگە ارنالعان قاراجات كولەمى، دارىلىك زاتتار مەن مەديسينالىق بۇيىمدار، جەكە قورعانىس قۇرالدارى دايىن.