شىلدەدەن باستاپ الماتىدا تاريف قىمباتتايدى

ازىرگە قانشاعا كوتەرىلەتىنى بەلگىسىز.

الماتىدا 1 شىلدەدەن باستاپ سۋ، جارىق پەن جىلۋعا تاريف قىمباتتايدى، دەپ حابارلايدى Almaty-akshamy.kz

بۇل تۋرالى بۇگىن تابيعي مونوپوليالاردى رەتتەۋ كوميتەتى الماتى قالاسى بويىنشا دەپارتامەنتىنىڭ باسشىسى مالىمدەدى.

«ازىرگە قانشاعا كوتەرىلەتىنى بەلگىسىز. بەلگىلىسى ءىرى مونوپوليستەر ءوز ۇسىنىستارىن بەرىپ جاتقانعا ۇقسايدى. ماسەلەن، ەلەكتر جارىعىن 40 پايىزعا، جىلۋ مەن ىستىق سۋدىڭ باعاسىن 43 پايىزعا، ال، سۋىق سۋدى 44 پايىزعا كوتەرۋ ۇسىنىلىپتى. بۇل "ءتاريفتى ينۆەستيسياعا الماستىرۋ" قاعيداسى بويىنشا قولعا الىنعان شارالار. تاريفتەن تۇسكەن قاراجات جوندەۋ جۇمىستارىنا كەتەدى»، دەدى تابيعي مونوپوليالاردى رەتتەۋ كوميتەتىنىڭ وكىلى.

ايتا كەتۋ كەرەك، قازىرگى ۋاقىتتا الماتى بويىنشا "الاتاۋ جارىق كومپانياسىنىڭ" جەلىلەرى 92،67 پايىزعا، جىلۋ جەلىلەرى 59،2 پروسەنتكە، ال، سۋمەن قامتاماسىز ەتەتىن جەلىلەر 56،4 پايىزعا توزعان. تاريف باعاسى وسكەن سوڭ، اپاتتار ازايىپ، كوممۋنالدىق قىزمەت كورسەتۋ ساپاسى ارتادى دەپ وتىر جاۋاپتىلار. وعان قوسا، 2029 جىلعا قاراي جەلىلەر 15%-عا جاڭارتىلادى دەپ ۋادە ەتتى.

"تاريف باعاسى بىردەن ءوسىپ كەتپەيدى. ناقتى قانشا كوتەرىلگەنىن مونوپوليستەر 5 كۇن بۇرىن حابارلايدى. ياعني، 25 ماۋسىمنان باستاپ بەلگىلى بولادى. بارلىق وتىنىشتەر تاريفتەردى قالىپتاستىرۋ ەرەجەلەرىنە سايكەس قارالاتىنىن ايتقىم كەلەدى. ول ءۇشىن ءماسليحات دەپۋتاتتارىنان باستاپ، قوعام بەلسەندىلەرى، ساراپشىلاردىڭ قاتىسۋىمەن تىڭدالىم بولادى"، - دەدى تابيعي مونوپوليالاردى رەتتەۋ كوميتەتى الماتى قالاسى بويىنشا دەپارتامەنتىنىڭ باسشىسى اسەل بودەنەيەۆا.