اباي اتىنداعى قازاق ۇلتتىق وپەرا جانە بالەت تەاترىندا سالتاناتتى كونسەرت بولدى.
الماتىدا حالىقارالىق تۇركسوي ۇيىمنىڭ 30 جىلدىعىنا وراي قاتىسۋشى ەلدەر مينيسترلەرىنىڭ كەزدەسۋى ءوتتى، دەپ حابارلايدى Almaty-akshamy.kz
قازاقستانعا جۇمىس ساپارىمەن وزبەكستاننىڭ مادەنيەت ءمينيسترى وزودبەك نازاربەكوۆ، سونداي - اق تۇركيا، ءازىربايجان جانە قىرعىزستان مادەنيەت مينيسترلەرىنىڭ ورىنباسارلارى سەردار چام، مۋراد گۋسەينوۆ پەن قايرات يمانالييەۆ كەلدى. ءىس-شارا تۇركسوي باس حاتشىسى، قىرعىزستاننىڭ حالىق جازۋشىسى سۇلتان رايەۆتى II دارەجەلى «دوستىق» وردەنىمەن ماراپاتتاۋدان باستالدى. ەل پرەزيدەنتى قاسىم-جومارت توقايەۆ ءتيىستى جارلىققا قول قويدى. كونسەرتتىك باعدارلاما اياسىندا ساحنادا قازاقستان مەن باسقا دا تۇركسوي ەلدەرىنىڭ ارتيستەرى ونەر كورسەتتى. كورەرمەندەر اراسىندا ەلىمىزدىڭ كورنەكتى ونەر جانە مادەنيەت قايراتكەرلەرى، زيالى قاۋىم وكىلدەرى بولدى. سونداي-اق، تۇركى ەلدەرىنىڭ ۇلتتىق كيىمدەرىنىڭ تاقىرىپتىق فوتوكورمەسى مەن دەفيلەسى ءوتتى. ال تەاتر اۋلاسىندا قازاقستاندىق قولونەرشىلەردىڭ كورمەسى ۇيىمداستىرىلدى.
«تۇركسويدىڭ 30 جىلدىعى-بۇكىل تۇركى الەمى ءۇشىن ماڭىزدى وقيعا. سوندىقتان، ەڭ الدىمەن، الماتىعا وسى اتاۋلى كۇندى مەرەكەلەۋگە كەلگەن ارىپتەستەرىمە العىس ايتامىن. وسى ۋاقىت ىشىندە ءبىز باۋىرلاس حالىقتارمەن مادەني جانە رۋحاني بايلانىستاردى نىعايتتىق، اۋقىمدى جوبالاردى جۇزەگە اسىردىق، تاجىريبە جانە ءبىلىم الماستىق. بۇل ۇدەرىستەردىڭ باستالۋى قازاقستاندا قالانعانى ءبىز ءۇشىن ەرەكشە ماڭىزدى. ءبىزدىڭ ورتاق كۇش-جىگەرىمىزبەن تۇركسوي ودان ءارى داميتىنىنا سەنىمدىمىن. قازاقستان-تۇركسويدىڭ بەلسەندى قاتىسۋشىسى. ەلىمىزدىڭ باستاماسى بويىنشا 2023 جىل ۇيىم دەڭگەيىندە تەمىربەك جۇرگەنوۆ جىلى بولىپ جاريالاندى. ۇلى قايراتكەردىڭ 125 جىلدىعىنا وراي تۇركسوي ەلدەرىندە جۇزدەن استام ءتۇرلى ءىس-شارالار وتەدى. اتاپ ايتقاندا، كونسەرتتەر، عىلىمي — تاجىريبەلىك كونفەرەنسيالار جانە كىتاپتاردىڭ تۇساۋكەسەرلەرى وسى كوكتەمدە الماتىدا باستالدى»، - دەدى ق ر مادەنيەت جانە سپورت ءمينيسترى اسحات ورالوۆ.
«قازاقستان رەسپۋبليكاسىنىڭ پرەزيدەنتىنە ماعان كورسەتكەن قۇرمەتى ءۇشىن العىس ايتامىن. قازاق جەرى تۇركى مادەنيەتى ءۇشىن كوپتەگەن ماڭىزدى تۇلعالاردىڭ وتانى بولدى. جاھاندانۋدىڭ قازىرگى داۋىرىندە تۋعان مادەنيەتتى ساقتاۋدىڭ ماڭىزدىلىعى بۇرىنعىدان دا وزەكتى. سوندىقتان تۇركسوي ەلدەرىنىڭ بارلىعى وسى ورتاق ميسسيا ءۇشىن بىرلەسىپ جۇمىس ىستەيتىن بولادى»، — دەدى سۇلتان رايەۆ.
ەستەرىڭىزگە سالا كەتەيىك، اۋقىمدى مادەني باعدارلاما 7 ماۋسىمدا باستالدى. ق ر ورتالىق مەملەكەتتىك مۋزەيىندە «مىڭجىلدىق وركەنيەت تاريحى» كورمەسى ۇيىمداستىرىلدى. كورمەنى ق ر مادەنيەت جانە سپورت ۆيسە-مينيسترى ەرجان ەركىنبايەۆ پەن تۇركسوي باس حاتشىسى سۇلتان رايەۆ اشتى. كەلۋشىلەردىڭ نازارىنا ايگىلى «التىن ادام» جانە جۇزدەن استام كونە جادىگەر ۇسىنىلدى. كەلەسى كۇنى ءا.قاستەيەۆ اتىنداعى ق ر مەملەكەتتىك ونەر مۋزەيىندە «ءبىز بىرگەمىز» اتتى كورمە اشىلدى. وندا مۋزەي قورىنان وتاندىق سۋرەتشىلەردىڭ 40 تۋىندىسى، سونداي-اق تۇركىستاننان اكەلىنگەن 30 سۋرەت ۇسىنىلدى. ال ق ر ۇلتتىق كىتاپحاناسىندا سول كۇنى «تۇركى الەمىنىڭ بىرلىگى» اتتى كىتاپ كورمەسى باستالدى. وندا كىتاپحانا قورىنان سيرەك كەزدەسەتىن كىتاپتار مەن قولجازبالار: ءفيردوۋسيدىڭ «شاحنامە» جانە «ناسابنامنىڭ» ەڭبەكتەرى، قوجا احمەت ياساۋي، باقىرعاني، الىشەر ناۋاي، سوپى اللاياردىڭ ەجەلگى ەڭبەكتەرى، ابايدىڭ العاشقى باسپا كىتابى، احمەت بايتۇرسىنوۆ، ماعجان جۇمابايەۆ، جۇسىپبەك ايماۋىتوۆتىڭ ەڭبەكتەرى، سونداي-اق تۇركىلەر تاريحى بويىنشا كىتاپ ماتەريالدارى، قۇجاتتار ۇسىنىلدى تۇركسوي تۋرالى، حح عاسىردىڭ ءبىرىنشى جارتىسىنداعى مەرزىمدى باسىلىمدار، تۇركى حالىقتارىنىڭ مۋزىكالىق شىعارمالارى بار ۆينيلدىك گرامپلاستينكالار كوپشىلىككە ۇسىنىلدى.
تۇركسوي - تۇركى حالىقتارىنىڭ ورتاق ماتەريالدىق جانە مادەني ەسكەرتكىشتەرىن ساقتاۋ، دامىتۋ جانە بولاشاق ۇرپاققا جەتكىزۋ ماقساتىن كوزدەيتىن حالىقارالىق ۇيىم. 1993 جىلى الماتىدا قۇرىلعان. تۇركسوي قۇرامىنا 6 مەملەكەت كىرەدى: قازاقستان، تۇركيا، قىرعىزستان، ءازىربايجان، تۇرىكمەنستان جانە وزبەكستان.