«جاڭا الماتى» كەشەندى جوسپارىنىڭ ىسكە اسىرىلۋ بارىسىن ساراپتامالىق تالقىلاۋ اياسىندا جول-كولىك ينفراقۇرىلىمىن دامىتۋ ماسەلەلەرى كوتەرىلدى دەپ حابارلايدى almaty-akshamy.kz
دوڭگەلەك ۇستەل بارىسىندا قالالىق ستراتەگيا جانە بيۋدجەت باسقارماسىنىڭ باسشىسى الماس باتانوۆ «جاڭا الماتىنىڭ» كولىك قۇرىلىمىن قالىپتاستىرۋ تۋرالى ايتىپ بەردى. مەگاپوليستىڭ كوشە-جول جەلىسىنىڭ جالپى ۇزىندىعى 3097 شاقىرىمدى قۇرايدى. بۇل رەتتە قالاعا قوسىلعان شاعىن اۋدانداردا 299 كيلومەتر جولدىڭ قاتتى جابىنى جوق. جاقسى جانە قاناعاتتانارلىق جاعدايداعى جولداردىڭ ۇلەسىن 80%-دان 83%-عا دەيىن جەتكىزۋ جوسپارلانۋدا.
«شاڭىراق-5، نۇرشاشقان، سامعاۋ، المەرەك، قايرات، وجەت شاعىن اۋداندارىندا جولداردىڭ قۇرىلىسى مەن كۇردەلى جوندەۋ اياقتالدى. سونداي-اق، ۇزىندىعى 201،1 كم 206 كوشەنىڭ ورتاشا جوندەۋى اياقتالدى، دۋمان شاعىن اۋدانىنىڭ 59 كوشەسىندە 30،5 كم جول كۇردەلى جوندەۋدەن ءوتتى. ۇزىندىعى 6،7 شاقىرىم بولاتىن اباي مەن سايننىڭ ەكى راديالدى كوشەلەرىن تەسۋ ءجۇرىپ جاتىر»، - دەدى الماس باتانوۆ.
سونىمەن قاتار، تاۋسامالى كەنتىندەگى ياسساۋي كوشەسىنەن رىسقۇلوۆ كوشەسىنە دەيىن ۇزىندىعى 1،2 شاقىرىم بولاتىن الماتى كوشەسىن قايتا جاڭارتۋ اياقتالدى. رىسقۇلوۆ داڭع. – ەمسوۆ ك.، سەيفۋللين ك. – جانسۇگىروۆ ك.، بۇقتىرما ك. - قۇلجا تراكتىسى كولىك ايىرىقتارىنىڭ قۇرىلىسى كەستەگە سايكەس جۇرگىزىلۋدە.
2022 جىلدىڭ ءبىرىنشى توقسانىندا قالا ماڭىنداعى جولدار ءقاۋىپسىز بولادى. 12 باعدارشام وبەكتىسى ورناتىلادى، 10 رەتتەلەتىن جانە 30 رەتتەلمەيتىن جاياۋ جۇرگىنشىلەر وتكەلى جاسالادى.
جالپى، «جاڭا الماتى» جول-كولىك ينفراقۇرىلىمىن دامىتۋ قالاعا قوسىلعان شاعىن اۋداندارداعى ءومىر ساپاسىن جاقسارتادى، قالا تۇرعىندارىنىڭ، سونداي-اق الماتى وبلىسىنداعى اۋدان تۇرعىندارىنىڭ موبيلدىلىگى ارتادى.