اۋىل شارۋاشىلىعى جەرلەرىن شەتەلدىكتەرگە بەرۋ تۋرالى زاڭدى بۇزعان شەنەۋنىكتەردىڭ جازاسى كۇشەيەدى.
بۇدان بىلاي ولارعا 30 ايلىق ەسەپتىك كورسەتكىش كولەمىندە ايىپپۇل تاعىلادى. سەناتورلار ءتيىستى وزگەرىستەردى ماقۇلدادى، دەپ حابارلايدى Almaty-akshamy.kz
ەندى شەتەلدىكتەردىڭ قاتىسۋىمەن اشىلعان كومپانيالارعا، حالىقارالىق ۇيىمدار مەن عىلىمي ورتالىقتارعا، قانداستار جانە شەتەلدىكپەن نەكەگە وتىرعاندارعا جەر بەرەتىندەر قاتاڭ تەكسەرىلەدى. بۇل وزگەرىستەر مال جايۋ مەن ەگىنشىلىككە ارنالعان القاپتارعا دا قاتىستى. ەگەر جازاعا تارتىلعان جاۋاپتى تۇلعالار، مۇنداي ارەكەتكە ەكىنشى رەت بارسا، وندا ايىپپۇل سوماسى ەكى ەسەگە ارتادى. ايتا كەتەرلىگى، ەندى باقىلاۋدى جەرگىلىكتى اتقارۋشى ورگاندار ەمەس، اۋىل شارۋاشىلىعى مينيسترلىگىنىڭ ءوزى جۇرگىزەدى. ۆەدومستۆو ماماندارى اكىمشىلىك ىستەردى قاراپ، تولەمدەردى وندىرەتىن بولادى.
«بۇل زاڭ جەر زاڭناماسىن بۇزعانى ءۇشىن جەكەلەگەن باپتار بويىنشا اكىمشىلىك جاۋاپكەرشىلىكتى ناقتىلاۋعا ارنالىپ وتىر. سونىمەن قاتار زاڭ شەڭبەرىندە جەردى پايدالانۋ مەن قورعاۋعا مەملەكەتتىك باقىلاۋ جۇرگىزەتىن ورگانداردىڭ وكىلەتتىكتەرىن قايتا قاراۋ كوزدەلگەن. جاڭا نورمالار جەر ۋچاسكەسىنە قۇقىق بەرۋ كەزىندە سىبايلاس جەمقورلىق تاۋەكەلدەرىن جويۋعا جانە جەردى پايدالانۋ مەن قورعاۋعا قاتىستى مەملەكەتتىك باقىلاۋدى كۇشەيتۋگە مۇمكىندىك بەرەدى دەپ سەنەمىز»، - دەيدى ق ر پارلامەنتى سەناتىنىڭ ءتوراعاسى ماۋلەن اشىمبايەۆ.