اۋەزوۆتىڭ شىعارمالارى تاتار تىلىندە جارىق كوردى

تاتارستان رەسپۋبليكاسىنىڭ ۇلتتىق كىتاپحاناسىندا قازاقتىڭ كورنەكتى جازۋشىسى مۇحتار اۋەزوۆتىڭ تاتار تىلىندەگى كىتابىنىڭ جارىق كورۋىنە ارنالعان عىلىمي-تاجىريبەلىك كونفەرەنسيا ءوتتى. ونىڭ تۋعانىنا 125 جىل تولۋىنا وراي شىعارىلعان جيناققا «كوكسەرەك»، «قاراش-قاراش وقيعاسى»، «قيلى زامان» اتتى ءۇش شىعارماسى ەنگەن، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

كەزدەسۋدى اشقان قازاقستاننىڭ قازان قالاسىنداعى باس كونسۋلى ەرلان ىسقاقوۆ بۇل كىتاپتىڭ تاريحي مۇرانى ساقتاۋ جانە ەلدەر اراسىنداعى مادەني-گۋمانيتارلىق، تاريحي-مادەني قارىم-قاتىناستى دامىتۋ ماقساتىندا شىعارىلعانىن اتاپ ءوتتى. ونىڭ ايتۋىنشا، مۇحتار اۋەزوۆ حح عاسىردىڭ كاسىبي ونەرى مەن ادەبيەتىنىڭ قالىپتاسۋىنىڭ قيىن جىلدارىندا بۇكىل سانالى عۇمىرىن حالقىنا قىزمەت ەتۋگە ارناعان، دەموكراتيالىق ادەبيەت پەن پروگرەسشىل ويدىڭ دامۋىنا ۇلەس قوسقان، تاتارستاننىڭ بەلگىلى جازۋشىلارىمەن تىعىز بايلانىستا بولعان.

شاراعا ءوزىنىڭ 80 جىلدىق مەرەيتويىن تويلاپ جاتقان كلاسسيكتىڭ ۇلى مۇرات اۋەزوۆ قاتىستى. بەلگىلى مادەنيەتتانۋشى، مەملەكەت جانە قوعام قايراتكەرى اكەسىنىڭ ءومىرى مەن قىزمەتى، تاتار مادەنيەتىنىڭ كورنەكتى وكىلدەرىمەن دوستىعى، پەداگوگ، پۋبليسيست، اعارتۋشى، قازاق مادەنيەتىنىڭ ءۇش كورنەكتى وكىلى ءبىلال سۇلەيەۆ، ءىلياس جانسۇگىروۆ جانە مۇحتار اۋەزوۆتىڭ جارى بولعان اناسى فاتيما عابيتوۆا تۋرالى ايتتى. مۇرات اۋەزوۆ اكەسىنىڭ شىعارمالارىن وزگە تىلدە ءتۇسىنۋ قيىن ەكەنىن ايتا كەلە، ولاردىڭ تاتار تىلىنە تاماشا اۋدارىلعانىنا ريزاشىلىعىن ءبىلدىردى.

كىتاپتى تاتار تىلىنە اۋدارعان قازان فەدەرالدى ۋنيۆەرسيتەتىنىڭ فيلولوگيا جانە مادەنيەتارالىق كوممۋنيكاسيالار ينستيتۋتىنىڭ دوسەنتى گۇلفيا گاينۋللينا اتالعان ءۇش شىعارمانىڭ كەزدەيسوق تاڭدالماعانىن ايتتى. سەبەبى، 1968 جىلى «قاراش-قاراش وقيعاسى»، 1973 جىلى «كوكسەرەك» فيلمدەرى ءتۇسىرىلدى.

فيلولوگيا عىلىمدارىنىڭ دوكتورى، پروفەسسور، تاتارستاننىڭ ەڭبەك سىڭىرگەن عىلىم قايراتكەرى حاتيپ ميننەگۋلوۆ قازاق جانە تاتار حالىقتارىنىڭ ەجەلدەن كەلە جاتقان جانە تىعىز مادەني بايلانىستارى تۋرالى ايتتى. ول حح عاسىردىڭ باسىندا مۇحتار اۋەزوۆ وقىعان سەمەيدە حالىقتىڭ جارتىسى تاتارلار بولعانىن، قازاق ادەبيەتىنىڭ بولاشاق كەمەڭگەر تۇلعاسىنىڭ قالىپتاسۋىنا تاتار مادەنيەتىنىڭ ىقپال ەتكەنىن ەسكە الدى.

شارانى قورىتىندىلاي كەلە، ونىڭ قاتىسۋشىلارى مۇحتار اۋەزوۆتىڭ شىعارماشىلىق مۇراسى الەمدىك ادەبي پروسەستىڭ ەلەۋلى قۇبىلىسىنا اينالعانىن، قازىرگى زاماندا دا وزەكتىلىگىن ساقتايتىنىن، جازۋشى ۇلتتىق مادەنيەتتىڭ عانا ەمەس، الەمدىك مادەنيەتتىڭ دامۋىنا باعا جەتپەس ۇلەس قوسقانىن اتاپ ءوتتى.

قازاق كلاسسيگى شىعارمالارىنىڭ تاتار تىلىنە اۋدارىلعان كىتابىنىڭ تارالىمى 100 دانانى قۇرايدى. الداعى ۋاقىتتا كىتاپ قازان قالاسىنىڭ جانە تاتارستاننىڭ باسقا وبلىستارىنىڭ مۇراجاي، مۇراعات جانە كورمە قورلارىنا تۇسەدى.