شەتەلدىكتەر ساۋساق ىزدەرىن تاپسىرا باستادى

قاڭتار ايىنان باستاپ الەمنىڭ ءار تۇكپىرىندەگى قازاقستان ەلشىلىكتەرى ەلىمىزگە كەلەتىن شەتەل ازاماتتارىنان ساۋساق ءىزىن الۋدى باستادى.

ۆاشينگتونداعى كونسۋلدىق قىزمەتتە قازاقستانعا بارۋدى جوسپارلاعان شەتەلدىكتەردى داكتيلوسكوپيالىق تىركەۋدەن وتكىزىپ جاتىر. ۆيزاعا ءوتىنىش بەرگەن وزگە ەل ازاماتى ون ساۋساعىنىڭ ءىزىن تاپسىرادى، دەپ حابارلايدى Almaty-akshamy.kz 24.kz-گە سىلتەمە جاساپ. 

مۇنداي تالاپ ەلىمىزدە تۇراقتى تۇرۋ ءۇشىن رۇقسات الۋعا نيەت بىلدىرگەن ازاماتتىعى جوق ادامدارعا دا قويىلادى. جالپى اقش ازاماتتارى قازاقستانعا 30 كۇنگە دەيىن ۆيزاسىز كىرە الادى. ءبىراق جۇمىس، وقۋ، بيزنەس ماقساتىمەن  ۇزاق مەرزىمگە باراتىندار ءۇشىن ۆيزا مىندەتتى. اقش-تاعى قازاقستان ەلشىلىگىندە ەلىمىزگە وقۋعا اتتانعالى جاتقان امەريكالىق ستۋدەنتتەر العاش رەت ساۋساق ءىزىن تاپسىرىپ جاتىر. زاڭ بويىنشا 16 جاستان اسقان ءاربىر شەتەلدىك وسى راسىمنەن ءوتۋى ءتيىس. داكتيلوسكوپيا الەمدىك تاجىريبەدە كەڭىنەن قولدانىلادى. ول مەملەكەتتىك ورگاندارعا جەكە تۇلعالاردى تەز انىقتاۋ جانە كوشى-قون اعىنىن باقىلاپ، قىلمىستىڭ ءىزىن سۋىتپاي اشۋ ءۇشىن قاجەت. ياعني، ۇلتتىق قاۋىپسىزدىك ءۇشىن اسا ماڭىزدى. زاڭ تالابى بويىنشا شەتەلدىكتەردىڭ جەكە باس مالىمەتتەرى 10 جىل بويى اقپاراتتىق بازادا، ودان كەيىن 40 جىل مۇراعاتتا ساقتالادى.

«قازاقستان ەندى عانا تىزىمگە قوسىلدى. بۇل پروسەسس ەلەكتروندى جۇيەمەن بايلانىستى بولعاندىقتان، كەيدە كىشىگىرىم اقاۋلار بولىپ تۇرادى، ونى  تۇسىنەمىز. ءبىراق ماسەلە ۋاقىتىلى شەشىلىپ جاتىر. ءبىز بۇل جەردە ايتارلىقتاي ۇلكەن پروبلەما كورمەدىك»، - دەيدى «American Councils» حالىقارالىق ءبىلىم مەنەدجەرى يراكلي سارازيدزە.