15-قىركۇيەكتە قازاقستاندا ءداستۇرلى ەمحاناعا تىركەۋ ناۋقانى باستالادى. شەتەل ازاماتتارى بۇل مۇمكىندىكتى پايدالانا الا ما، ولار ەمحاناعا قالاي تىركەلەدى؟ بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە مەديسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆ ايتىپ بەردى، دەپ حابارلايدى almaty-akshamy.kz
تىلەۋحان ابىلدايەۆتىڭ سوزىنە سۇيەنسەك، كامپانيا بارىسىندا قازاقستاندىقتارمەن بىرگە ەۋرازيالىق ەكونوميكالىق وداق ەلدەرىنەن كەلگەن ەڭبەك ميگرانتتارى مەن ولاردىڭ وتباسى مۇشەلەرى دە ەمحاناعا تىركەلە الادى.
«بيىل شەتەلدىك ەڭبەك ميگرانتتارىن ەمحاناعا تىركەۋ ءتارتىبى وزگەردى. ەندى ولار ەمحاناعا ەرىكتى مەديسينالىق ساقتاندىرۋ نەمەسە جۇكتەلگەن مەديسينالىق ساقتاندىرۋ كەلىسىمشارتى ارقىلى عانا تىركەلە الادى. بۇل پوليستەر ارقىلى ولار باستاپقى مەديسينالىق-سانيتارلىق كومەك قىزمەتىن پايدالانا الادى»، - دەدى فيليال باسشىسى.
شەتەلدىك ەڭبەك ميگرانتتارى ە-گوۆ ارقىلى تىركەلە المايدى. تىركەلۋ ءۇشىن ەمحانا باسشىسىنىڭ اتىنا قازاق نەمەسە ورىس تىلىندە ەركىن تۇردە ءوتىنىش جازىلادى. وتىنىشپەن بىرگە پاسپورت، ەرىكتى نەمەسە جۇكتەلگەن مەديسينالىق ساقتاندىرۋ ءپوليسى قوسا بەرىلەدى.
ەلىمىز بويىنشا اتالعان كەلىسىمشارتتاردى 7 جەكە مەنشىك ساقتاندىرۋ كومپانياسى ارقىلى راسىمدەۋگە بولادى. ولار: «ينتەرتيچ» سك، «بازەل» سك، «نوماد» سك، «فريدوم ينشۋرانس» سك، «سەنتراس ينشۋرانس» سك، «نسك» سك، «بازەل» سك.
«تىركەلگەننەن كەيىن ەڭبەك ميگرانتتارى ءمامس پاكەتىندەگى قىزمەتتەردى پايدالانا الادى. مىسالى، قاجەتتى كونسۋلتاتيۆتىك-دياگنوستيكالىق قىزمەتتەر، جوسپارلى ستاسيونارلىق كومەك، مەديسينالىق وڭالتۋ سىندى تاعى دا باسقا كومەك تۇرلەرى قولجەتىمدى بولادى»، - دەدى تىلەۋحان ابىلدايەۆ.
ەڭبەك ميگرانتتارىنىڭ وزدەرى ءمامس جۇيەسىنە جۇمىس بەرۋشى تاراپىنان جاسالعان جارنالار مەن اۋدارىمدار ارقىلى قاتىسادى. ال، 18 جاسقا تولماعان بالالارى مەملەكەت تاراپىنان ساقتاندىرىلسا، ولاردىڭ جۇبايلارى (زايىبى) ءوزىن-وزى ساقتاندىرۋشى رەتىندە الداعى 12 ايعا جارنا تولەۋى قاجەت.
ەستەرىڭىزگە سالا كەتسەك، قازاقستاندا تۇراقتى تۇراتىن، ىقتيارحاتى بار شەتەلدىكتەر ەل ازاماتتارىمەن بىردەي قۇقىقتارعا يە. ولار ەمحاناعا بۇرىنعىشا كەدەرگىسىز تىركەلە الادى.
ال، ەۋرازيالىق وداققا كىرمەيتىن ەلدەردىڭ ازاماتتارى ەمحاناعا تىركەلە المايدى جانە ءمامس قىزمەتىن پايدالانبايدى، مەديسينالىق كومەك ولارعا تەك اقىلى تۇردە كورسەتىلەدى.