وزگەرىستەر 14 تامىزدان باستاپ كۇشىنە ەندى.
مەديسينالىق ساقتاندىرۋ قورىنىڭ الماتى قالالىق فيليالىنىڭ مالىمەتىنشە، ەندى ەڭبەك ميگرانتتارى مەديسينالىق ساقتاندىرۋ ءپوليسى نەمەسە جۇكتەلگەن مەديسينالىق ساقتاندىرۋ كەلىسىمشارتى ارقىلى عانا تىركەلە الادى، دەپ حابارلايدى اlmaty-akshamy.kz
ەڭبەك زاڭناماسىنا، حالىق دەنساۋلىعى مەن دەنساۋلىق ساقتاۋ جۇيەسى تۋرالى كودەكسكە ەنگىزىلگەن وزگەرىستەرگە سايكەس، يمميگرانتتاردى ەمحانالارعا تىركەۋ جانە ولارعا مەديسينالىق كومەك كورسەتۋ ءتارتىبى وزگەردى. بۇل وزگەرىستەر تەك رەسەي، بەلارۋس، قىرعىزستان، ارمەنيا مۇشەسى بولىپ تابىلاتىن ەاەو ەلدەرىنىڭ ازاماتتارىنا قاتىستى.
جاڭا ءتارتىپ بويىنشا اتالعان شەتەل ازاماتتارى ەمحاناعا ەرىكتى مەديسينالىق ساقتاندىرۋ (ەمس) نەمەسە جۇكتەلگەن مەديسينالىق ساقتاندىرۋ (جمس) كەلىسىمشارتى نەگىزىندە تىركەلەدى. كەلىسىمشارتتار باستاپقى مەديسينالىق-سانيتارلىق كومەك (ەمحانا) پەن شۇعىل مەدكومەك شىعىندارىن جابۋعا ارنالعان بولۋى ءتيىس. كەلىسىمشارت مەرزىمى بىتكەن كەزدە ميگرانت مەديسينالىق ۇيىم تىركەۋىنەن اۆتوماتتى تۇردە شىعارىلادى.
تىركەلۋ ءۇشىن ەمحانا باسشىسىنىڭ اتىنا قازاق نەمەسە ورىس تىلىندە ەركىن تۇردە ءوتىنىش جازۋ قاجەت. وتىنىشپەن بىرگە جەكە كۋالىك (پاسپورت)، ەمس نەمەسە جمس ءپوليسى قوسا بەرىلەدى. ءوتىنىش بەرۋشى مەديسينا مەكەمەسىنە ءوز بەتىنشە جۇگىنە الادى نەمەسە ونى ساقتاندىرۋ كومپانياسى تىركەيدى. تىركەلەتىن ەمحانالار ءتىزىمى شارتتىڭ قوسىمشاسىندا (ەمس نەمەسە جمس) كورسەتىلۋى ءتيىس.
ەاەو تۋرالى كەلىسىمشارتتا شەتەلدىكتەردىڭ دەنساۋلىق ساقتاۋ سالاسىنداعى قۇقىعى عانا ەمەس، مىندەتتەرى دە جازىلعان. ولاردىڭ قاتارىنا اۋرۋلاردى ەرتە انىقتاۋ ءۇشىن پروفيلاكتيكالىق سكرينينگتەردەن ۋاقتىلى ءوتۋ، ايەلدەردى جۇكتىلىك بويىنشا ۋاقتىلى ەسەپكە قويۋ (12 اپتاعا دەيىن)، سوزىلمالى جانە الەۋمەتتىك ماڭىزى بار اۋرۋلاردى ديناميكالىق بايقاۋ جانە ت.ب. كىرەدى. سونداي-اق، قازاقستاندا ۋاقىتشا تۇراتىن شەتەلدىكتەر اينالاعا ءقاۋىپ توندىرەتىن اۋرۋلار كەزىندە كورسەتىلەتىن مەديسينالىق كومەكتى قوسپاعاندا، رەسپۋبليكانىڭ تۇراقتى تۇرعىندارىنا عانا كورسەتىلەتىن تەگىن مەديسينالىق كومەكتىڭ كەپىلدىك بەرىلگەن كولەمى (تمككك) پاكەتىندەگى قىزمەتتەردى پايدالانا المايدى.
ال، ق ر ازاماتتارى، قانداستار جانە ق ر اۋماعىندا تۇراقتى تۇراتىن شەتەلدىكتەر ءۇشىن ەمحاناعا تىركەلۋ ءتارتىبى وزگەرگەن جوق.
ەمحانالار تىزىمىمەن قوردىڭ www.fms.kz سايتىنداعى «ەمحانانى تاڭداۋ» ءبولىمى ارقىلى تانىسۋعا بولادى.