قازاقستان رەسپۋبليكاسى سىرتقى ىستەر مينيسترلىگى، باس رەداكتورلار كلۋبى، Kazakh Tourism ۇلتتىق كومپانياسى جانە ازياداعى ءوزارا ءىس-قيمىل جانە سەنىم شارالارى جونىندەگى كەڭەس حاتشىلىعى (اوسشك) بىرلەسىپ وتكىزىپ جاتقان 8ء-شى جىل سايىنعى «قازاقستان شەتەلدىك ب ا ق كوزىمەن» اتتى بايقاۋىنا قاتىسۋعا 40 ەلدەن 70-تەن استام جۋرناليست ءوتىنىم بەرگەن.
الەمنىڭ بەس قۇرلىعىنان جينالعان جۋرناليستەر مەن بلوگەرلەر حالىقارالىق قاتىناستار، تاريح، مادەنيەت، تۋريزم، ءبىلىم، ينۆەستيسيالىق الەۋەت، ۇلتتىق تاعامدار جانە باسقا دا تاقىرىپتاردى قامتيتىن باسپا جانە ەلەكتروندى باسىلىمداردا، تانىمال ينتەرنەت-پلاتفورمالاردا، بلوگتاردا، سونداي-اق پودكاست تۇرىندە جارىق كورگەن شىعارماشىلىق جۇمىستارىن تانىستىردى، دەپ حابارلايدى Almaty-akshamy.kz.
سىرتقى ىستەر ءمينيسترىنىڭ ورىنباسارى رومان ۆاسيلەنكو، باس رەداكتورلار كلۋبىنىڭ پرەزيدەنتى بيبىگۇل جەكسەنباي، Kazakh Tourism باسقارما ءتوراعاسى تالعات امانبايەۆ جانە اوسشك اسكەري-ساياسي ولشەم ساراپشىسى ەلشى دۋلات قۋانىشيەۆ كىرگەن قازىلار القاسى كونكۋرستىڭ ناتيجەسىن قورىتىندىلادى.
الەمنىڭ ءتۇرلى ايماقتارى مەن نوميناسيالارى بويىنشا 8 شەتەلدىك اۆتور كونكۋرستىڭ جەڭىمپازى اتاندى:
سولتۇستىك جانە وڭتۇستىك امەريكا ايماعى بويىنشا قازاقستانداعى جوعارى ءبىلىم، تاۋ-كەن ونەركاسىبىن ترانسفورماسيالاۋ جانە ەلىمىزدى شەتەلدىك ينۆەستورلار الدىندا تارتىمدى ەتۋ تاقىرىبىنداعى Canada Eurasia Chamber of Commerce (CECC) پودكاستتار سەرياسى ۇزدىك دەپ تانىلدى.
ەۋروپا ەلدەرىنىڭ ىشىندە يسپاندىق جۋرناليست حوسە پۋگليسيدىڭ جۇمىسى ەڭ كورنەكتى دەپ تانىلدى. ول يبەريا تۇبەگىندە عانا ەمەس، لاتىن امەريكاسى ەلدەرىندە دە وقىلاتىن «Periodista Digital» باسىلىمىندا جاريالانعان قازاقستاننىڭ الەمدىك ارەناداعى پوزيسياسىن نىعايتۋعا ارنالعان ماقالاسىن ۇسىندى.
«تمد جانە ەۋرازيا» نوميناسياسىندا «Uzdaily.uz» ءتىلشىسى اسكار ياكۋبوۆتىڭ وزبەكستان مەن قازاقستان اراسىنداعى ىنتىماقتاستىق تاقىرىبىنا ارنالعان ماقالالار توپتاماسى ۇزدىك دەپ تانىلدى.
ازيا – تىنىق مۇحيتى ايماعى بويىنشا «The Voice of Vietnam» ۇلتتىق راديوسىنىڭ ءتىلشىسى نگۋەن فان حۋونگ سۋاننىڭ قازاقستان تاريحى جانە ەكىجاقتى ىنتىماقتاستىقتى دامىتۋ تاقىرىپتارىنداعى ءبىرقاتار جۇمىستارى اتاپ ءوتىلدى.
تاياۋ شىعىس پەن افريكا ەلدەرى اراسىندا قازىلار القاسى ەفيوپيالىق رەپورتەر گوساي فەييسسا ناتەيدىڭ ءبىرقاتار ماقالالارىن جوعارى باعالادى. قۇرلىقتىڭ 54 مەملەكەتىن بىرىكتىرەتىن افريكا مەملەكەتتەرى وداعىنىڭ شتاب-پاتەرى ادديس-ابەبادا ورنالاسۋى دا كونكۋرستىق كوميسسيانىڭ شەشىمىنە اسەر ەتتى.
Kazakh Tourism نوميناسياسى بويىنشا يتالياندىق ساياحاتشى-بلوگەر فيليپپو تەنتيدىڭ قازاقستاننىڭ مادەنيەتى مەن تۋريستىك ورىندارى تۋرالى «الەم وۆەرلەند كوزىمەن» اتتى دەرەكتى ءفيلمى جەڭىسكە جەتتى. بۇل فيلم 2023 جىلعى قاڭتاردا يتاليانىڭ «RAI» باس تەلەديدارىندا كورسەتىلدى.
بيىل قازاقستاننىڭ اوسشك-تە ءتوراعالىق ەتۋىنە وراي العاش رەت اوسشك تاراپىنان جەكە نوميناسيا ەنگىزىلدى. قازىلار القاسى «Kazakhstan's Unwavering Commitment In Promoting International Peace، Security» ماقالاسى ءۇشىن «Bernama» اگەنتتىگى حالىقارالىق ءبولىمىنىڭ رەداكتورى مالايزيالىق راۆيچاندران رادجامانيكام، سونداي-اق «اوسشك: جاڭا الەمدەگى جاڭا ازيا – ازەربايجاننىڭ كوزقاراسى» ماقالاسى ءۇشىن نارگيز مامەدوۆانى جەڭىمپاز دەپ تانىدى.
بۇرىن حابارلانعانداي، بايقاۋ جەڭىمپازدارى اعىمداعى جىلدىڭ تامىز ايىندا قازاقستانعا ۇيىمداستىرىلاتىن ساپار شەڭبەرىندە استانا، الماتى جانە شىعىس قازاقستان وبلىستارىنا ساياحاتتاۋعا مۇمكىندىك الادى.
ءوز جۇمىسىن 2014 جىلى باستاعان «قازاقستان شەتەلدىك ب ا ق كوزىمەن» جىل سايىنعى بايقاۋى شەتەلدىكتەردىڭ ەلىمىزدىڭ دامۋىنىڭ وزەكتى ۇردىستەرىنە، ونىڭ باي تابيعي جانە مادەني مۇراسىن دارىپتەۋ، سونداي-اق بۇكىل الەمنەن شەتەلدىك ينۆەستورلار مەن تۋريستەردى تارتۋ ءۇشىن ونىڭ الەۋەتىن اشۋعا باعىتتالعان.