وسىدان ءبىراز ۋاقىت بۇرىن جۇمىسقا بارۋ دەگەن ءسىز ءۇشىن مەيرامعا، تويعا بارۋمەن پارا-پار ەدى. سول ءۇشىن ادەمى كيىنىپ، ەرەكشە دايىندالاتىنسىز. ال، ءقازىر... ءقازىر جۇمىس دەسە العا باسقان اياعىڭىز كەرى كەتىپ، جۇيكەڭىز سىر بەرىپ ءجۇر. مۇنىڭ سەبەبى نەدە؟ كەشە جانعا قۋانىش سىيلاعان جۇمىسىڭىز بۇگىن نەگە كوڭىلىڭىزدى جابىرقاتادى؟
باستاپقىدا جۇمىستاعى جاعدايدىڭ ءبارى سىزگە قىزىق، ءبارى قۇپيا بولاتىن. مىنە، وسى جۇمباقتى شەشىپ، جەتىستىككە جەتۋ ءۇشىن العا ۇمتىلاتىن ەدىڭىز. ۋاقىت ءوتتى. كەشە اسىعىپ جەتەتىن، شەشۋگە جانتالاسا كىرىسەتىن شارۋالاردىڭ بارلىعى بۇگىندە قاراپايىم تىرلىككە اينالعان. مۇنداي جاعدايدى ماماندار كارەرالىق تۇيىققا تىرەلۋ نەمەسە كۇيزەلىستىڭ باستالۋى دەپ باعالايدى. ەگەر مۇنداي جاعدايدى وزىڭىزدەن بايقاساڭىز، وندا تىعىرىقتان شىعاتىن جولدى تەزىرەك ىزدەگەنىڭىز دۇرىس.
جۇمىسقا دەگەن ىقىلاسىڭىزدىڭ جوعالعانىن بايقادىڭىز با، وندا ارقانى كەڭگە سوزىپ جۇرە بەرۋدىڭ كەرەگى جوق. بىردەن دەمالىس الىڭىز. قىزمەتتەگى بارلىق بايلانىستان ءوزىڭىزدى شەتتەتىپ، كيىم-كەشەگىڭىزدى جيناڭىز دا بىردەن دەمالىس ورنىنا جول تارتىڭىز. ەگەر سىزدەگى كۇيزەلىس جۇمىستان جالىققاننان ەمەس، شارشاعاننان بولسا دەمالىستان كەيىن جاعىمسىز اسەردىڭ ءبارى ارتتا قالادى. ال ەگەر دەمالىستان كەيىن دە جۇمىسقا زاۋقىڭىز بولماي، اينالاڭىزداعىنىڭ بارلىعى قىزىقتىرمايتىن بولسا وندا باسقا ءتاسىل ىزدەگەنىڭىز دۇرىس. سوندا تىعىرىقتان شىعۋعا نەنىڭ كومەكتەسۋى مۇمكىن؟ بارلىعى ءسىزدىڭ جۇمىسقا دەگەن ىقىلاسىڭىزدىڭ وزگەرۋىنە نە سەبەپ بولعانىنا بايلانىستى.
- كاسىبىڭىزدىڭ جالىقتىرۋى. بۇعان دەيىن سىزگە ماڭىزدى، قىزىقتى كورىنگەن دۇنيەلەر ءقازىر ءوز ءمانىن جوعالتقان. نە ىستەۋ كەرەك؟ ءوزىڭىز اتقاراتىن شارۋالار شەڭبەرىن كەڭەيتىپ، جۇمىس تارتىبىنە ءبىراز وزگەرىستەر ەنگىزىڭىز. باسشىمەن سويلەسىپ، وزىڭىزگە بۇرىنعىدان كۇردەلىرەك، كوبىرەك جۇمىس بەرۋدى سۇراڭىز نەمەسە ارتىق جۇمىستى ءوز ەركىڭىزبەن-اق تىندىرا بەرىڭىز. ۋاقىتتى پايدالى ءارى قىزىقتى وتكىزۋدىڭ امالى جەتەرلىك. ايتالىق، ءبىلىم جەتىلدىرەتىن كۋرستارعا بارىڭىز، قوسىمشا كاسىپ مەڭگەرىڭىز، ترەنينگتەرگە قاتىسىڭىز. قانداي كەزدە دە باسشىلىق ىزدەنىمپاز ماماننان قول ءۇزىپ قالعىسى كەلمەيدى. بۇدان كەيىن دە جاعداي وزگەرمەسە، امال جوق، جۇمىستى اۋىستىرۋعا تۋرا كەلەدى.
بۇعان بەيىم توپ: كاسىبي بىلىكتىلىكتىڭ جالىقتىرۋى كەز كەلگەن جاننىڭ باسىنان وتەدى. اسىرەسە، شىعارماشىلىق ادامدارى، كوپشىلىكپەن جۇمىس ىستەيتىن ماماندار بۇل ماسەلەمەن ءجيى بەتپە-بەت كەلەدى.
- «وسۋگە» ءۇمىتتىڭ جوقتىعى.
مىنە، ءبىر ورىندا قانشا جىلدان بەرى تابان اۋدارماي ادال جۇمىس ىستەپ كەلە جاتساڭ دا باسشىلىق تاراپىنان سەنىڭ ەڭبەگىڭدى باعالاپ وسىرەيىن، جالاقىڭدى كوتەرەيىن دەگەن نيەت بايقالمايدى.
نە ىستەۋ كەرەك؟ ەڭ الدىمەن بۇل كومپانياعا قانشالىقتى ەڭبەگىڭىز سىڭگەنىن ويشا تارازىلاپ كورىڭىز. ەگەر تىندىرعانىڭىز كوپ بولسا وندا ويىڭىزدى جيناقتاپ، باسشىلىققا تالاپ قويا ءبىلىڭىز. ەڭ باستىسى، باستىققا كىرەر الدىندا جاقسىلاپ دايىندالىڭىز. ناقتى دەرەكتەر، سەنىمدى ايتىلعان ءسوز – ءسىزدىڭ ەڭ باستى قارۋىڭىز ەكەنىن ەستەن شىعارماڭىز. ال، باسشىلىق ءسوزىڭىزدى جۇرە تىڭداپ، تالابىڭىزعا كوڭىل اۋدارماسا جۇمىس اۋىستىرعاننان باسقا امال جوق.
بۇعان بەيىم توپ: ءارى قاراي كەڭەيۋدى، ۇلكەيۋدى ماقسات ەتپەيتىن شاعىن كومپانيا قىزمەتكەرلەرى
- كاسىپكە كوڭىل تولماۋشىلىق.
كۇندەردىڭ كۇنىندە ءسىز وزىڭىزگە مۇلدە جات، تابيعاتىڭىزبەن سايكەس كەلمەيتىن كاسىپپەن اينالىسىپ جۇرگەنىڭىزدى بايقايسىز. مۇندايدا نە ىستەگەن دۇرىس؟ ارينە، بۇلاي وكىنبەس ءۇشىن سىزگە ماماندىق تاڭداعان كەزدە جاقسىلاپ ويلانىپ، اسىعىستىق جاساماۋ كەرەك ەدى. ال، ەندى 16-17 جىل ءوتىپ كەتكەننەن كەيىن ويلانۋدىڭ ءمانى بار ما؟ دەسەك تە، قانشا ۋاقىت وتسە دە وزگەرىستەن قورىقپاڭىز. جاسىڭىز ورتا جاستان اسسا، ارينە، كاسىپتى وزگەرتۋ اسا قولايلى بولا قويمايدى. ءبىراق باسشى جالاقىنى دا تومەندەتىپ، قىزمەتتە دە كوتەرمەلەۋدى ۇمىت قالدىرسا، شاماڭىز كەلەتىن، ءوزىڭىز قىزىعاتىن باسقا جۇمىستاردى اقىرىنداپ مەڭگەرە باستاعانىڭىز دۇرىس. شەگىنەتىن نەسى بار؟ ءسىزدىڭ جۇمىس تاجىريبەڭىز مول. بۇل – ەڭ باستى ارتىقشىلىعىڭىز. سونداي-اق، كوپتەن بەرى ءوزىڭىز حوببيگە اينالدىرىپ جۇرگەن ءىسىڭىزدى دە كاسىپ ەتىپ، پۇل تابۋىڭىزعا بولادى. كەيدە وسى قىزىعاتىن ىسىڭىزگە ءبىرشاما ۋاقىت ءبولۋدىڭ ءوزى ءومىرىڭىزدى ءماندى ەتە تۇسەدى. ال ەندى جاس بولساڭىز اڭگىمە بولەك. كۇش-قۋاتىڭىز بويىڭىزدا، سىزگە ارتقا شەگىنۋدىڭ رەتى جوق. ءوزىڭىزدى بارلىق كاسىپتە سىناپ كورىڭىز. كوڭىلىڭىزدەگىنى تاپساڭىز ءىسىڭىز دە ءونىمدى بولماق.
بۇعان بەيىم توپ: كاسىبى بويىنشا ءوزىن كورسەتە الماعان، بويىنداعى قابىلەتىن اشا الماعان ادامدار.
ر.S. جالپى، ءبىر ورىندا وتىرىپ قالماي، 5-6 جىل سايىن جۇمىس وزگەرتىپ وتىرۋ توقىراپ قالۋدان ساقتايدى. ءارى جاڭا جۇمىستىڭ جاڭا وزگەرىس، ءۇمىت سىيلارى انىق.
دايىنداعان روزا قۇرمانباي.