سەگىز مەملەكەتتەن كەلگەن 200-گە جۋىق بالا كۋرورتتىق ايماقتا دەمالىپ جاتىر.
ءۇشىنشى جىل ۇيىمداستىرىلعان جازعى لاگەرگە كەلۋشىلەر سانى ارتىپ كەلەدى، دەپ حابارلايدى Almaty-akshamy.kz.
24.kz اقپاراتىنا سۇيەنسەك، بىلتىرعى جىلمەن سالىستىرعاندا، وقۋشى سانى ەكى ەسەگە ارتقان. ولارعا قازاقتىڭ سالت-داستۇرلەرى كورسەتىلىپ، ۇلتتىق ويىندارى ناسيحاتتالادى. نۇرگۇل بالا كۇنىنەن دومبىرا تارتادى. 10-نان استام ءان بىلەدى. بولاشاقتا قازاق ءتىلى مامانى بولۋدى ارماندايدى. ءبىر قىزىعى، ونەرلى ورەن بيىل حالىقارالىق بايقاۋعا قاتىسىپ، قىزىلورداداعى قورقىت اتا ۋنيۆەرسيتەتىنە گرانت ۇتىپ العان.
«اتاجۇرتقا ايتار العىسىمىز وتە شەكسىز. شەكارادان اتتاعان كەزدە بىزدە ءبىر ىستىق سەزىم بولادى وتانعا دەگەن. ءتىپتى كوڭىلدەن جىلاپ جىبەرەتىندەي دارەجەدە بولعانبىز. ءبىز وزبەكستاندا تۇرعانىمىزبەن ءوزىمىزدىڭ قازاق مادەنيەتىمىزدى، ءسالت-داستۇرىمىزدى، ادەت-عۇرىپتامىزدى دامىتۋدان جالىقپاي كەلە جاتقان حالىقپىز»، - دەيدى وزبەكستاننان كەلگەن قانداسىمىز نۇرگۇل ولجابايەۆا.
دەمالۋعا كەلگەن بالعىنداردىڭ بارلىعى ءتۇرلى بايقاۋدىڭ جۇلدەگەرلەرى. وقۋشىلاردىڭ دەنى رەسەي، وزبەكستان مەن موڭعوليادان كەلگەن. ال بەلورۋسسيا مەن يراننان تەك ءبىر عانا وقۋشى بار.
دەمالىس ۋاقىتىندا وقۋشىلارعا ءتۇرلى ساباق ۇيىمداستىرىلادى. نەگىزگى ەكپىن الاشتانۋ مەن قازاقستان تاريحىنا بەرىلىپ وتىر. بيىل لاگەردەگى وقۋ باعدارمالاسىنا ءبىرقاتار وزگەرىستەر دە ەڭگىزىلگەن.
«وسى جىلى لاگەردىڭ باعدارلاماسى ەتنو بولدى. اعىلشىن ءتىلى جوق، تەك قانا قازاق ءتىلى. دومبىرا تارتۋ، الاشتان، جاساندى ينتەلەكتىمەن جۇمىس ىستەۋ سياقتى جاڭاشىلدىقتار قوستىق. باعدارلاماعا قازاق رۋحىن وياتۋ ءۇشىن، قازاق بولامىن دەگەنى ءۇشىن اۋىستىردىق»، - دەيدى «وتانداستار» قورى پرەزيدەنتىنىڭ كەڭەسشىسى ديدار بولات.
وقۋشىلار 14 شىلدەگە دەيىن دەمالادى. جالپى ەتنيكالىق قازاق بالالارىن قولداۋ تەك وسىمەن عانا شەكتەلمەيدى. جىل سايىن قازاقستاندىق جوعارعى وقۋ ورىندارىندا وزگە مەملەكەتتەردەگى قانداستارىمىز ءبىلىم الۋى ءۇشىن 6 مىڭ گرانت بولىنەدى.