ولار مەملەكەت باسشىسىنا جەدەلحات جولداعان.
قازاقستان پرەزيدەنتىنىڭ اتىنا ناۋرىز مەرەكەسىنە وراي شەت مەملەكەتتەر جانە حالىقارالىق ۇيىم باسشىلارىنان قۇتتىقتاۋ جەدەلحاتتارى ءالى دە كەلىپ جاتىر، دەپ حابارلايدى Almaty-akshamy.kz اقورداعا سىلتەمە جاساپ.
تۇركيا پرەزيدەنتى رەجەپ تاييپ ەردوعان ءوز قۇتتىقتاۋىندا كوكتەمنىڭ جارشىسى – ناۋرىز ورتالىق ازيادان بالقانعا دەيىنگى الىپ كەڭىستىكتە تويلاناتىن ورتاق ءداستۇر مەن مولشىلىق مەيرامى ەكەنىن اتاپ وتكەن.
"وسى ورتاق ءداستۇرىمىزدى ساقتاۋ جانە ونى كەيىنگى ۇرپاققا جەتكىزۋ ماقساتىندا جىل سايىن الەمنىڭ تۇكپىر-تۇكپىرىندە تويلاناتىن ناۋرىز مەرەكەسى – دوستىعىمىز بەن باۋىرلاستىعىمىزدىڭ جارقىن كورىنىسى"، – دەپ جازىلعان تۇركيا پرەزيدەنتىنىڭ جەدەلحاتىندا.
تاتارستان رايسى رۋستام ميننيحانوۆ تا باۋىرلاس تاتار حالقىنىڭ اتىنان جۇرەكجاردى تىلەگىن جولداعان.
"ەجەلدەن كەلە جاتقان ءارى ەشقاشان ەسكىرمەيتىن، سونداي-اق وزىنە ءتان جاڭارۋ رۋحىن، جاسامپازدىق قۋاتى مەن قۋانىشىن الا كەلەتىن ناۋرىز مەرەكەسى قازاق-تاتار حالىقتارىنىڭ دامۋىنا، ءوزارا ىنتىماقتاستىعىنىڭ كەڭەيۋىنە جول اشسىن دەپ تىلەيمىن"، – دەپ جازىلعان جەدەلحاتتا.
شانحاي ىنتىماقتاستىق ۇيىمىنىڭ باس حاتشىسى چجان مين ءوز قۇتتىقتاۋىندا ناۋرىز مەرەكەسىندە دارىپتەلەتىن تاتۋلىق، تابيعاتپەن ەتەنە جاقىندىق جانە ادامدار اراسىنداعى سىيلاستىق كۇللى ادامزات بالاسىنىڭ قۇندىلىعى ەكەنىن ايتقان.
"ناۋرىز شىۇ-عا مۇشە ەلدەر مەن حالىقتاردىڭ مادەني ءارالۋاندىعىن ساقتاۋدا جانە ولاردىڭ تاتۋ كورشىلىك قارىم-قاتىناسىن، دوستىعى مەن ىنتىماقتاستىعىن نىعايتۋدا ماڭىزدى ءرول اتقارادى. شىۇ-عا مۇشە مەملەكەتتەردىڭ بەلسەندى اتسالىسۋىمەن بۇۇ باس اسسامبلەياسى ناۋرىز حالىقارالىق كۇنى تۋرالى قارار قابىلداعانىن ايرىقشا اتاپ وتكىم كەلەدى. بۇل وسى مەيرامنىڭ جاھاندىق دەڭگەيدەگى ماڭىزدىلىعىن بىلدىرەدى"، – دەپ جازعان ۇيىمنىڭ باس حاتشىسى.
سونىمەن قاتار مەملەكەت باسشىسىن ناۋرىز مەرەكەسىمەن كاۆكاز مۇسىلماندارى باسقارماسىنىڭ ءتوراعاسى، شەيح-ۋل-يسلام اللاشۇكىر پاشازادە قۇتتىقتادى.