گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، فيزيكا-ماتەماتيكا عىلىمدارىنىڭ دوكتورى راتباي مىرزاقۇلوۆ «الەمدەگى ەڭ بەدەلدى عالىمداردىڭ» رەيتينگىنە ەندى.
بۇل كورسەتكىشتى جىل سايىن امەريكا قۇراما شتاتتارىنىڭ ستەنفورد ۋنيۆەرسيتەتى ساراپشىلارى جاساپ شىعارادى. وندا الەۋمەتتىك جەلىدە ەڭ كوپ قارالىپ، سىلتەمە جاسالعان ەڭبەكتەر سارالانادى. قازاقستاندىق عالىمنىڭ «مىرزاقۇلوۆ تەڭدەۋى» مەن «مىرزاقۇلوۆ گراۆيتاسياسى» دەپ اتالاتىن ەڭبەكتەرى شەتەلدىك مامانداردى قىزىقتىرىپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
ستەنفورد ۋنيۆەرسيتەتىنىڭ ساراپشىلارى بۇل رەيتينگتى Elsevier (ەلسيەۆير) عىلىمي باسپاسىنىڭ سوڭعى مالىمەتتەرىنە سۇيەنە قۇراستىرادى. وندا الەمدەگى ەڭ ۇزدىك عالىمداردىڭ ەڭبەكتەرى ەكى سانات بويىنشا باعالانادى. بىرىنشىسىنە بۇكىل ەڭبەك جولىندا جۇمىستارىنا ەڭ كوپ سىلتەمە جاسالعان عالىمدار ۇسىنىلسا، ەكىنشىسىنە سوڭعى جىلدارى جاساعان ەڭبەگىنە كوپ سىلتەمە جاسالعان ويشىلدار باعامدالادى . وسىلايشا، اكادەميك راتباي مىرزاقۇلوۆ استروفيزيكا- گراۆيتاسيا- كوسمولوگيا بويىنشا زەرتتەۋلەرى ءۇشىن بىردەن قوس تىزىمگە ەندى.
«عىلىم دەگەن - ۇلكەن باسەكە. بۇكىل دۇنيە ءجۇزىنىڭ مەملەكەتتەرىنىڭ، ەۋروپا، امەريكا، ازيانىڭ ۇلكەن مەملەكەتتەرىنىڭ عالىمدارىمەن كونكۋرەنسياعا ءتۇسىپ، سولاردىڭ الدىنا شىعىپ، ەكى پايىزىنا كىرۋ - ءبىز ءۇشىن ۇلكەن مارتەبە. ول - ءبىز ءۇشىن بەرىلگەن وبەكتيۆتىك باعا »، - دەيدى فيزيكا-ماتەماتيكا عىلىمدارىنىڭ دوكتورى، پروفەسسور راتباي مىرزاقۇلوۆ.
1998-99 جىلدارى امەريكالىق عالىمدار پلانەتانىڭ ۇدەمەلى تۇردە كەڭەيىپ بارا جاتقاندىعىن دالەلدەيتىن ماقالالاردى جارىققا شىعارا باستايدى. ول پىكىر قايشىلىعىن تۋىنداتىپ، ەسكپەريمەنت تۇرىندە دالەلدەنسە دە، تەوريادا ەشكىم دالەلدەي المايدى. بۇكىل الەم ويشىلدارى نازارعا العان ءىلىمدى، قازاقستاندىق عالىم راتباي مىرزاقۇلوۆتا زەرتتەيدى. ناتيجەسىندە، ول ەينشتەيننىڭ كەڭىتىلگەن تەورياسىن جاساپ شىعارادى. فيزيك ءوز ەڭبەگىن «مىرزاقۇلوۆ گراۆيتاسياسى» دەپ اتايدى. ءدال وسى ەڭبەك شەتەلدە تانىمالدىلىققا يە بولىپ، باسىلىمدارىندا 10-نان اسا ماقالا جازىلعان.
«مىرزاقۇلوۆتىڭ تەورياسى بارلىق مىندەتتەردى وتە قىزىقتى تۇردە سيپاتتايدى. ول ناقتى دالەلدەنىپ جازىلعان. ونى ءار ءتۇرلى ەلدىڭ عالىمدارى بەلسەندى تۇردە زەرتتەۋدە، سوندىقتان ول الەمدەگى ەڭ بەدەلدى عالىمداردىڭ، ەڭ كوپ سىلتەمە جاسالعان عالىمدارىنىڭ تىزىمىنە ەندى»، - دەيدى ەۇۋ«جالپى جانە تەوريالىق فيزيكا» كافەدراسىنىڭ مەڭگەرۋشىسى قوبلاندى ەرجانوۆ.
بۇگىندە راتباي مىرزاقۇلوۆ - 400-دەن استام عىلىمي جۇمىستىڭ اۆتورى. ونىڭ 300-دەن استام ماقالاسى شەتەلدىك باسپالاردا جاريالاندى.