بۇگىن قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى، بەلگىلى كۇيشى، شەرتپە كۇي شەبەرى، ق ر ەڭبەك سىڭىرگەن قايراتكەرى ءبىلال الپان ۇلى ىسقاقوۆتىڭ 70 جاسقا تولۋىنا وراي ۇيىمداستىرىلعان «قازىرگى زامانعى شەرتپە كۇي ورىنداۋشىلىق ونەرىندەگى وزەكتى ماسەلەلەر» اتتى رەسپۋبليكالىق دوڭگەلەك ۇستەل ءوتتى.
القالى جيىندا قۇرمانعازى اتىنداعى كونسەرۆاتوريانىڭ پروفەسسورى، ق ر ەڭبەك سىڭىرگەن قايراتكەرى كاريما ساحاربايەۆا، م.و.اۋەزوۆ اتىنداعى ادەبيەت جانە ونەر ينستيتۋتى «مۋزىكاتانۋ» ءبولىمىنىڭ مەڭگەرۋشىسى، ونەرتانۋ عىلىمدارىنىڭ كانديداتى اينۇر قازتۋعانوۆا، «كونە مۋزىكالىق اسپاپتار» كافەدراسىنىڭ مەڭگەرۋشىسى ز.ءىزمۇراتوۆا، «دومبىرا» كافەدراسىنىڭ ۇستازدارى قۋانىش جۇماعالييەۆ، بايان يگىلىك، التىناي دجۋماگالييەۆا، اسەل الينا جانە ت.ب. ءبىلال ىسقاقوۆتىڭ ءومىرى مەن شىعارماشىلىعى جايىندا بايانداما وقىدى.
زەرتتەۋشى-عالىم اينۇر قازتۋعانوۆا «كۇيشىلەر ءتالىمىنىڭ جاناشىرى» اتتى بايانداماسىندا ىسقاقوۆ ءبىلال الپان ۇلىنىڭ كۇيشى-ورىنداۋشى، كۇيشى-ۇستاز، كۇيشى-زەرتتەۋشى رەتىندە قىزمەتىن سارالاي كەلە، «ۇلى كۇيشىلەردەن باستاۋ العان ءداستۇردى جالعاستىرۋشى، ونى دامىتۋعا وزىندىك ۇلەس قوسىپ، ۇلتتىق كۇي ونەرىن جاڭا دەڭگەيگە كوتەرىپ، بولاشاق ۇرپاققا امانات رەتىندە ساقتالۋدا ەلەۋلى ەڭبەك ەتكەن تۇلعا رەتىندە ءبىلال الپان ۇلى ىسقاقوۆ قۇرمەتكە لايىق»، – دەپ تۇجىرىمدادى.
سونداي-اق ءىس-شارانىڭ قۇرمەتتى قوناقتارى ق ر مادەنيەت قايراتكەرى، قۇرمەت وردەنىنىڭ يەگەرى، كۇيشى ابدۋلحاميت رايىمبەرگەنوۆ، قازاقستاننىڭ ەڭبەك سىڭىرگەن قايراتكەرى، كۇيشى-كومپوزيتور ەرمۇرات ۇسەنوۆ، قازاق ۇلتتىق ونەر ۋنيۆەرسيتەتىنىڭ وقىتۋشىسى، رەجيسسەر-پروديۋسسەر سارىباسوۆ ورالبەك، «مۋزىكاتانۋ جانە كومپوزيسيا» كافەدراسىنىڭ دوسەنتى، PhD ايجان بەردىباي، «حالىق ءانى» كافەدراسىنىڭ مەڭگەرۋشىسى ۆەنەرا قارجاۋبايەۆا، PhD، «دارىن» مەملەكەتتىك جاستار سىيلىعىنىڭ يەگەرى، «دومبىرا» كافەدراسىنىڭ دوسەنتى ەرجان جامەنكەيەۆ جانە سەمەيدەن، استانادان، تالدىقورعاننان كەلگەن ارىپتەستەرى، شاكىرتتەرى ىستىق ىقىلاسىن ءبىلدىردى.
دوڭگەلەك ۇستەلدى جۇرگىزگەن توقجانوۆ تولەپبەرگەن مەرەيتوي يەسىنە توسىن سىي رەتىندە ب.ىسقاقوۆ پەن ت.توقجانوۆتىڭ اۆتورلىعىمەن شىعارىلعان «دومبىراداعى ورىنداۋشىلىق ونەر تاريحى» اتتى كىتاپتى تارتۋ ەتىپ، تۇساۋىن كەستى.
كۇيشى ءبىلال الپان ۇلى ىسقاقوۆتىڭ مەرەيتويى ەرتەڭ وتەتىن «كاۋسار كۇي» اتتى كونسەرتكە ۇلاسادى. كونسەرت قۇرمانعازى اتىنداعى قازاق ۇلتتىق كونسەرۆاتورياسىنىڭ ە.راحمادييەۆ اتىنداعى ۇلكەن زالىدا، ساعات 17:00 وتەدى. كەلەم دەۋشىلەرگە ەسىك اشىق.
