ەل پرەزيدەنتى قاسىم-جومارت كەمەل ۇلى توقايەۆتىڭ 2022 جىلى 1 قىركۇيەكتەگى: «ادىلەتتى مەملەكەت. ءبىرتۇتاس ۇلت. بەرەكەلى قوعام.» اتتى جولداۋىن جاستاردىڭ اراسىندا كەڭىنەن ناسيحاتتاۋ ماقساتىندا جوعارعى ءبىلىم جانە عىلىم مينيسترلىگىنىڭ اقپاراتتىق قولداۋىمەن «BILIM-ORKENIETI» ۇلتتىق يننوۆاسيالىق عىلىمي-زەرتتەۋ ورتالىعى رەسپۋبليكالىق «جاڭا قازاقستانداعى – ۇزدىك ستۋدەنت» فورۋمىن ۇيىمداستىرعان ەكەن.
ءىس-شارانىڭ نەگىزگى ماقساتى – رەسپۋبليكاداعى دارىندى جاستار اراسىندا بايلانىس ورناتۋ. پاتريوتتىق سەزىمدەرىن، شىعارماشىلىعىن شىڭداۋ، يننوۆاسيالىق ويلاۋ قابىلەتتەرىن دامىتۋ.
كونفەرەنسياعا عالىمدار، قوعام قايراتكەرلەرى جانە ب ا ق وكىلدەرى مەن بىرگە ق ر ۇقك شەكارا اكادەمياسى 3-وقۋ ديۆيزيونىنىڭ كۋرسانتى قوبىلاندى ايدوس داۋرەن ۇلى دا قاتىسقان بولاتىن. اتالمىش كونفەرەنسيانىڭ ناتيجەسىندە، قازاقستاننىڭ جوعارى وقۋ ورىندارى اراسىندا كۋرسانت قوبىلاندى ايدوس داۋرەن ۇلى 2022/2023 وقۋ جىلىندا «ۇزدىك ستۋدەنت» اتانىپ، قازاقستاننىڭ ۇزدىك ستۋدەنتى ديپلومىمەن جانە مەدالىمەن ماراپاتتالعان.
جاقسىنىڭ جاقسىلىعىن ايت نۇرى تاسىسىن دەمەكشى، بۇگىندە شەكارا اكادەمياسىنىڭ ماقتانىشىنا اينالعان ا.قوبىلاندى سولتۇستىك قازاقستان وبلىسىنىڭ پاۆلودار قالاسىنىڭ تۋماسى. 2020 جىلى وسىنداعى №35 جالپى ورتا مەكتەپتى ۇزدىك اتتەستاتقا بىتىرگەن.
ول مەكتەپ قابىرعاسىندا ءجۇرىپ-اق ءار ءپان بويىنشا اۋداندىق، وبلىستىق، رەسپۋبليكالىق وليمپيادالاردىڭ جەڭىمپازى اتانعان ەكەن. ءبىلىم-عىلىمعا جانى قۇمار شەكاراشى كۋرسانتتىڭ ايتۋىنشا، ول كىشكەنتايىنان اسكەري قىزمەتشى بولۋدى ارمانداعان. شەكارا اكادەمياسىندا وقىپ جۇرگەنىن ماقتان تۇتادى ەكەن.
«شەكارا اكادەمياسى تۇسىنە بىلگەن ادامعا ءبىر ۇلكەن اسكەري ۇجىم. مۇندا بارلىعى بىر-بىرىنە وقۋدا، سپورتتا جانە باسقا دا ءىس-شارالاردا كومەكتەسەدى. ءبىزدىڭ ۇرانىمىز: «ءبىرىمىز ءبارىمىز ءۇشىن، ءبارىمىز ءبىرىمىز ءۇشىن». كۋرسانتتىڭ ءومىرى وتە الۋان ءتۇرلى جانە كۇندەلىكتى ستۋدەنتتىك ومىردەن ەرەكشەلەنەتىن جارقىن وقيعالارعا تولى. اكادەميادا وقىپ جۇرگەن جىلداردى ءجاي عانا قاعازعا جازىپ جەتكىزۋ مۇمكىن ەمەس، ءتىپتى اۋىز ەكى تىلدە ايتىپ جەتكىزە المايسىڭ. ونى تەك جان دۇنيەڭمەن سەزىنۋىڭ كەرەك. ول ءۇشىن ءوزىڭ وسى ورتادا ءومىر ءسۇرۋىڭ كەرەك.
مەن وقۋ-بىلىمگە قۇمار ىزدەنىمپاز كۋرسانتتاردىڭ بارلىق ساۋالدارىنا جاۋاپ بەرە الاتىن، جاۋنگەرلىك دايارلىقتاعى جەتىستىكتەرىمىز ءۇشىن، سونداي-اق جاس ۇرپاقتى اسكەري-پاتريوتتىق تاربيەلەۋگە قوسقان ۇلەسى ءۇشىن اكادەميانىڭ پروفەسسورلىق-وقتىۋشىلار قۇرامىنا ريزامىن.
مەنىڭ ويىمشا، اسكەري وقۋ ورنىندا وقۋعا ەكىنىڭ ءبىرىنىڭ جۇرەگى داۋالاي بەرمەيدى. ويتكەنى، ولار تەمىردەي ءتارتىپتى تالاپ ەتەتىن اسكەري ءومىردىڭ قيىنشىلىقتارىنا شىداي بەرمەيدى. مۇندا تەك ناعىز ءوز ەلىنىڭ پاتريوتتارى عانا وقيدى. ولار وتانعا قىزمەتتى –ابرويلى مىندەت دەپ قانا تۇسىنەدى»، - دەيدى پولكوۆنيك قايرات مۇحامەتجانوۆ جەتەكشىلىك ەتەتىن 3-وقۋ ديۆيزيوننىڭ كۋرسانتى ايدوس داۋرەن ۇلى بىزگە بەرگەن سۇحباتىندا.