بيىلشا بلينكەندى قىتايدىڭ ءدامى تارتپاي تۇرعانداي. اقش مەملەكەتتىك حاتشىسىنىڭ بەيجىڭ ساپارىنان تاعى دا باس تارتۋى مۇمكىن. ول كوپتەن كۇتكەن ديپلوماتيالىق ساپارعا دايىندالىپ جاتقاندا، اقش-قىتاي اراسىندا قاۋىپسىزدىككە قاتىستى تاعى ءبىر شۋ شىقتى.
بايدەننىڭ باس ديپلوماتى ەنتوني بلينكەن وسى دەمالىس كۇندەرى قىتايعا رەسمي ساپارمەن بارماق ەدى. ساپارىنىڭ ماقساتى ەكى ەل اراسىنداعى تەرەڭدەي تۇسكەن قايشىلىقتى جەڭىلدەتۋ بولاتىن. ءدال وسى كەزدە قىتايدىڭ قۇراما شتاتتاردا تىڭشىلىق جانە بارلاۋ جۇمىسىن جۇرگىزۋگە تىرىساتىنى جايىندا اقپارات تارادى. بۇل ساپار قارساڭىندا بلينكەندى تاعى ءبىر رەت اۋىر ساياسي قىسىمعا قالدىردى.
Wall Street Journal، Washington Post سەكىلدى امەريكالىق اسا ىقپالدى باسىلىمدار تاراتقان حابار اق ءۇيدى اقپاراتتىق تاسقىنمەن سوعىپ ءوتتى. وندا جۇڭگو كۋبا جەرىندە ارنايى ستانسيا قۇرىپ، امەريكا قۇراما شتاتتارىنا قارسى بارلاۋ جۇرگىزۋگە كۇش سالىپ جاتقانى ايتىلعان.
ءۋولل-ستريتتىڭ ايگىلى باسىلىمى ءاتى-جونى جاسىرىلعان جوعارى لاۋازىمدى تۇلعاعا سىلتەمە جاساپ، جۇڭگو مەن كۋبا اراسىندا كەلىسىم جاسالىپ جاتقانىن حابارلادى. حابارعا قاراعاندا، جۇڭگو اقش-تان نەبارى 145 شاقىرىم قاشىقتىقتاعى كۋبا جەرىندە بارلاۋ ستانسياسىنىڭ قۇرلىسىن سالماق. ول اقش تەرريتورياسىن ءجىتى باقىلاۋ مۇمكىندىگىنە يە بولادى دەلىنگەن.
ەستەرىڭىزدە بولاار، اقپان ايىندا بلينكەن جۇڭگو ساپارىنا دايىندالىپ جاتقاندا «شار وقيعاسى» بولىپ، ساپار كەيىنگە قالدىرىلعان. قىتايدىڭ بيىك ۇشاتىن باقىلاۋشى اۋە شارى اقش كەڭىستىگىندە پايدا بولعان. ونى امەريكالىق جويعىش ۇشاق اتىپ تۇسىرگەن. وقيعا ۆاشينگتون مەن بەيجىڭنىڭ مامىلەسىن سۋىتىپ، اراسىن الىستاتقان. ءتىتپى، ەكى ەل اراسىندا ديپلوماتيالىق ءىس-قيمىلدار دا سالقىنداپ قالعان ەدى.
بلينكەن ساپاردان باس تارتاتىنى تۋرالى مالىمدەمە جاسامادى. بۇل ديپلوماتيالىق ساپار بولاتىن، يا بولمايتىنىن بولجاۋ دا قيىن. قالاي دەگەنمەن ەكى ەل اراسى بارعان سايىن سۋىپ بارا جاقانىن كورۋگە بولادى.