ەل اۋماعىنان سىرتقا شىعۋدىڭ ءتارتىبى جەڭىلدەتىلدى
ق ر ۇكىمەتىنىڭ جانىنداعى كوروناۆيرۋستى تاراتپاۋ جونىندەگى ۆەدومستۆوارالىق كوميسسيا مەملەكەتتىك شەكارادان كىرىپ-شىعۋدىڭ شارتتارىن جەڭىلدەتتى، دەپ حابارلايدى Almaty-akshamy.kz
بۇل تۋرالى ق ر ۇلتتىق قاۋىپسىزدىك كوميتەتى شەكارا قىزمەتى حابارلادى.
«COVID-19 پاندەمياسىنا بايلانىستى مەملەكەتتىك شەكارانى كەسىپ وتۋدەگى شەكتەۋلەر جالعاسادى. 2021 جىلدىڭ 13 قازانىندا قازاقستان ۇكىمەتىنىڭ جانىنداعى كوروناۆيرۋستى تاراتپاۋ جونىندەگى ۆەدومستۆوارالىق كوميسسيا كارانتين شەكتەۋلەرى كەزەڭىندە مەملەكەتتىك شەكارانى كەسىپ ءوتۋدىڭ جاڭا ءتارتىبىن بەكىتتى. بۇل قۇجاتپەن knb.gov.kz ينتەرنەت رەسۋرسىنىڭ جانە رەسمي كانالداردىڭ «پايدالى سىلتەمەلەر» بولىمىنەن وقىپ تانىسۋعا بولادى»، دەلىنگەن شەكارا قىزمەتىنىڭ Instagram پاراقشاسىندا.
جاڭا ەرەجەدە ەل اۋماعىنان سىرتقا شىعۋدىڭ ءتارتىبى جەڭىلدەتىلدى. وتباسى مۇشەسىنىڭ نەمەسە جاقىن تۋىسىنىڭ قازاسىنا، قاتتى اۋىرىپ جاتقان تۋىسقانىن كورۋگە شىققان بولسا، قازاقستان ازاماتى شەكارانى جۇبايىمەن جانە كامەلەكەتكە تولماعان بالاسىمەن بىرگە كەسىپ وتە الادى.
ءبىراق بارا جاتقان تۋىسقانى مەن ونىڭ اراسىندا ەرلى-زايىپتىلىق، اتا-انا مەن بالا، اسىراپ العان نەمەسە اسىراپ الىنعان تۋىسقاندىق، تولىققاندى نەمەسە جارتىلاي اعايىندىلىق، اتا-اجە مەن نەمەرە سياقتى تۋىستىق قاتىناسى بولۋى كەرەك.