ادام ومىرىنە اراشا تۇسكەن الماتىلىق پوليسەيلەر ماراپاتتالدى

الماتىدا وز-وزىنە قول جۇمساماق بولعان ەر ادامدى قۇتقارىپ قالعان پاترۋلدىك پوليسيا قىزمەتكەرلەرى ماراپاتتالدى.

كاسىبي شەبەرلىكتەرى، سونداي-اق ازاماتتاردىڭ قاۋىپسىزدىگى مەن قۇقىق ءتارتىبى جولىندا جانقيارلىق قىزمەتى ءۇشىن الماتى قالاسى پد جەرگىلىكتى پوليسيا قىزمەتى پاترۋلدىك پوليسيا پولكىنىڭ ينسپەكتورلارى قۇدايبەرگەن توعجانوۆ پەن سانجار ءابدىرايىموۆ “قازاقستان پوليسياسىنا 30 جىل” مەرەيتويلىق توسبەلگىسىمەن ماراپاتتالدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

ەرجۇرەك پوليسيا قىزمەتكەرلەرىنە ماراپاتتى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ تابىس ەتتى. ماراپاتتاۋ ءراسىمى سالتاناتتى جاعدايدا ءوتتى.

ەسكە سالايىق، جاقىندا “بۋران-317” ەكيپاجىنىڭ پاترۋلدىك پوليسەيلەرى وز-وزىنە قول جۇمساماق بولعان الماتىلىق ازاماتتى امان الىپ قالعان بولاتىن. ءتارتىپ ساقشىلارى وقيعاعا قاتىسى بار ادامنىڭ دا، جول قوزعالىسىنىڭ باسقا قاتىسۋشىلارىنىڭ دا قاۋىپسىزدىگىن قامتاماسىز ەتۋ شارالارىن قابىلدادى.

«ساعات 19:00 شاماسىندا بىزگە ءسۇيىنباي داڭعىلىنىڭ بويىنداعى جاياۋ جۇرگىنشىلەر كوپىرىنەن بەلگىسىز ەر ادام سەكىرگىسى كەلەتىنى تۋرالى قوڭىراۋ كەلىپ ءتۇستى. ءبىز وقيعا ورنىنا ءۇش مينۋتتا جەتتىك. ارىپتەسىممەن بىرگە ەر ادامدى مۇنداي ارەكەتكە بارماۋعا كوندىرە باستادىق»، – دەدى جپقب پاترۋلدىك پوليسيا پولكىنىڭ قىزمەتكەرى توعجانوۆ قۇدايبەرگەن.

«ول بىزدەن الىستاي بەردى، ءوزىن ءجونسىز ۇستادى. سۇراقتارىمىزعا جاۋاپ بەرمەدى. ءبىز ونىڭ نازارىن اۋدارىپ، سويلەسىپ، ونى قورشاۋدىڭ ارعى جاعىنان شىعارۋ ءۇشىن جايلاپ جاقىندادىق. سول كەزدە ءبىزدىڭ باسقا ارىپتەستەرىمىز تومەندە، جولدىڭ بويىندا بولىپ، جول قاۋىپسىزدىگىن قامتاماسىز ەتتى. ولار ەر ادام سەكىرىپ كەتكەن جاعدايدا اۋىر جاراقات الماس ءۇشىن جۇك كولىگىن كوپىردىڭ استىنا اكەلىپ قويدى. ءبىر كەزدە ءبىز ونى ۇستاپ ۇلگەردىك. ورتاق كۇش-جىگەردىڭ ارقاسىندا ونى ءقاۋىپسىز جەرگە الىپ شىقتىق»، – دەدى سانجار ءابدىرايىموۆ.