جامبىل وبلىسىندا بولعان ولىممەن اياقتالعان جول اپاتىنان ەكى ادام كوز جۇمدى، تاعى ەكى ادام ءتۇرلى جاراقاتپەن اۋرۋحاناعا جەتكىزىلدى. جەلىدە تاراعان اقپاراتقا سايكەس، زارداپ شەككەندەر – تانىمال سپورتشى شاۆكات راحمونوۆتىڭ ايەلى مەن ۇلى، - دەپ حابارلايدى aqshamnews.kz ءتىلشىسى Massaget.kz-كە سىلتەمە جاساپ.
وڭىرلىك پوليسيا دەپارتامەنتى زارداپ شەككەندەردىڭ ءاتى-جونىن ناقتىلاماعانىمەن، اپات بويىنشا رەسمي مالىمەت ۇسىندى.
"2025 جىلدىڭ 27 شىلدەسىندە ساعات 08:50-دە رەسپۋبليكالىق ماڭىزى بار الماتى – ەكاتەرينبۋرگ اۆتوجولىنىڭ 299-شاقىرىمىندا Toyota Land Cruiser 200 كولىگىنىڭ جۇرگىزۋشىسى، قاراعاندى وبلىسى تاراپىنان الماتى قالاسىنا باعىت العان، رولگە يە بولا الماي، كولىكتى اۋدارىپ العان. اپات سالدارىنان ەكى ادام وقيعا ورنىندا كوز جۇمدى، تاعى ەكەۋى اۋرۋحاناعا جەتكىزىلدى"، – دەلىنگەن جامبىل وبلىسى پد حابارلاماسىندا.
جول-كولىك وقيعاسىنا بايلانىستى پوليسيا ق ر قك "كولىك قۇرالىن باسقاراتىن ادامداردىڭ جول ءجۇرىسى نەمەسە كولىك قۇرالىن پايدالانۋ ەرەجەلەرىن بۇزۋى، ابايسىزدا ەكى نەمەسە ودان دا كوپ ادامنىڭ ولىمىنە اكەلۋى" بابى بويىنشا سوتقا دەيىنگى تەرگەۋ جۇرگىزىپ جاتىر.
الايدا پوليسيا زارداپ شەككەندەردىڭ ءاتى-جونىن رەسمي تۇردە جاريالاماعانىمەن، Tengrinews.kz دەرەككوزىنە سۇيەنسەك، كولىكتە راسىندا UFC جۇلدىزى شاۆكات راحمونوۆتىڭ جارى وتىرعان.
جەلىدە دە اپاتقا قاتىستى مالىمەتتەر تاراپ جاتىر. بەلگىلى بولعانداي:
"اپات جامبىل وبلىسى، مويىنقۇم اۋدانىندا بولعان. گۇلايىم راحمونوۆا ۇلى مەن قۇربىلارىمەن بىرگە قاراعاندىدان الماتىعا كەلە جاتقان. الماتى – ەكاتەرينبۋرگ تراسساسىنىڭ 296-شاقىرىمىندا Toyota Land Cruiser جول اپاتىنا ۇشىراعان – جۇرگىزۋشى رولگە يە بولا الماعان. 39 جاستاعى ايەل وقيعا ورنىندا كوز جۇمدى، تاعى ءبىر 35 جاستاعى ايەل اۋرۋحاناعا بارار جولدا قايتىس بولدى. راحمونوۆا مەن ۇلى شۋعا جەتكىزىلگەن، جاعدايى – ورتاشا اۋىر"، – دەلىنگەن الەۋمەتتىك جەلىدەگى جازبالاردا.
سپورتشىنىڭ كومانداسى ازىرگە جاعدايعا قاتىستى تۇسىنىكتەمە بەرگەن جوق.