ۇڭگىرلەر قاۋىپسىزدىكتى قامتاماسىز ەتۋ ءۇشىن قاجەت
مامانداردىڭ ايتۋىنشا، شارىن شاتقالىندا قاۋىپسىزدىكتى ساقتاۋ ءۇشىن ۇڭگىرلەر ورناتۋ قاجەت. ازىرگە قاۋىپسىزدىك ۇڭگىرشەلەرى ءۇش جەردەن قويىلعان، دەپ حابارلايدى Almaty-akshamy.kz
قاجەتتىلىك تۋىنداپ جاتسا، كەيىن تاعى كوبەيتىلەدى. ەستەرىڭىزدە بولسا، بيىل 29 مامىردا سەلدىڭ كەسىرىنەن ەكى ادام قازا تاپقان بولاتىن. ءبىر ءبۇلدىرشىن ەرتەسىنە تابىلعان ەدى. ۇلتتىق پاركتە ەكولوگيالىق ءتۋريزمدى دامىتۋدىڭ 2022 – 2025 جىلدارعا ارنالعان تۇجىرىمداماسى جاسالدى.
الداعى بىرنەشە جىلدا شارىندى دامىتۋعا ينۆەستورلار 3 ميلليارد تەڭگە سالۋدى جوسپارلاپ وتىر. پاركتىڭ ۇسىنىسىمەن، ينۆەستورلاردىڭ قولداۋىمەن ينفراقۇرىلىم ماسەلەسى شەشىلەدى.
«تۇجىرىمدامادا ينفراقۇرىلىمدى دامىتۋ ماسەلەسى كورسەتىلگەن. ول جەردە گلەمپينگ، ساپار ورتالىعى، ءقوناقۇي، كەمپينگ، مەيرامحانا سياقتى تۋريستەردىڭ دەمالۋىنا جاعداي جاسايتىن ينفراقۇرىلىمدار سالىنادى»، - دەيدى "شارىن" مەملەكەتتىك ۇلتتىق تابيعي پاركىنىڭ ءبولىم باسشىسى قۇتلىقجان ءجۇسىپوۆ.
شارىندى تاماشالاۋشىلاردىڭ سانى جىلدان-جىلعا ارتىپ كەلەدى. 10 جىل بۇرىن مۇندا جىلىنا 1300 ادام كەلگەن بولسا، بيىل توعىز ايدا ساياحاتشىلاردىڭ سانى 33 مىڭنان اسىپتى. ناتيجەسىندە، اۋماقتىڭ تۋريستىك الەۋەتى دە ەداۋىر جاقسارعان. شارىن مەملەكەتتىك ۇلتتىق تابيعي پاركىنىڭ نەگىزگى بولىگىن جانۋارلار الەمى قۇرايدى. مۇندا سۇتقورەكتىلەردىڭ 34 ءتۇرى، باۋىرىمەن جورعالاۋشىلار، قوسمەكەندىلەر مەن قۇستاردىڭ الۋان ءتۇرى مەكەندەيدى. ولاردىڭ اراسىندا قىزىل كىتاپقا ەنگەن قاراقۇيرىق، ءسىبىر تاۋ ەشكىسى، سابانشى، سىلەۋسىن جانە ورتالىق ازيا قۇندىزى بار. زاڭسىز اڭ اۋلاۋشىلارمەن دە كۇرەس كۇشەيەدى.
«2019 جىلعى دەرەك بويىنشا، وسى اۋماقتا قاراقۇيرىق جابايى جانۋارىن اتقانى ءۇشىن ءبىر ازامات ۇستالىپ، ايىپپۇل تولەگەن. ءبىر قاراقۇيرىققا سول كەزدەگى اەك-پەن ەسەپتەگەندە 9 ميلليون 90 مىڭ تەڭگە ايىپپۇل سالىنعان»،- دەيدى شارىن مەملەكەتتىك ۇلتتىق تابيعي پاركىنىڭ ءبولىم باسشىسى ارسەن نۇرعالييەۆ.
تابيعي پارك اۋماعىندا شارىن شاتقالىنان وزگە تاعى دا ءۇش تۋريستىك باعىت بار. ولار: شارىن ەرەن توعايى، بەيىتتەر مەن قورعاندار جانە تەمىرلىك كىشى شاتقالى. پارك ماماندارىنىڭ ايتۋىنشا، شارىن ءبىر جىلدا 200 مىڭعا جۋىق ءتۋريستى قابىلداۋعا قاۋقارلى.