ەندى اۆتوكولىكتى تىركەۋ قىزمەتىن بانك قوسىمشاسى ارقىلى الۋعا بولادى

سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين مەملەكەتتىك قىزمەت كورسەتۋ پروسەستەرىن جاقسارتۋ بويىنشا جاسالىپ جاتقان جۇمىستار تۋرالى ايتىپ بەردى، دەپ حابارلايدى almaty-akshamy.kz

بۇگىنگى كۇنى مەملەكەتتىك قىزمەتتەردىڭ 90%-ى ەلەكتروندىق نۇسقادا قولجەتىمدى. ول - 690 مەمقىزمەتتىڭ 624ء-ى. ءبىراق ءقازىر وسى ەلەكتروندىق قىزمەتتەردىڭ ساپاسى بويىنشا جۇمىس ىستەيمىز. ياعني تۇتىنۋشىلار قىزمەتتەردى نەگە ەلەكتروندى تۇردە الماي، حكو-عا جۇگىنەدى؟ وسى ماسەلەلەردى زەرتتەپ، ونلاين قىزمەتتەردىڭ ساپاسىن جاقسارتىپ جاتىرمىز، - دەدى مينيستر.

ايتۋىنشا، مەملەكەتتىك قىزمەتتەردى الۋدىڭ بىرنەشە ءتاسىلى بار:

• حالىققا قىزمەت كورسەتۋ ورتالىقتارى ارقىلى؛


• eGov، eGov mobile قوسىمشاسى؛


• مەملەكەتتىك ورگانداردىڭ، مينيسترلىك پەن اكىمشىلىكتەر ارقىلى.

مەملەكەتتىك قىزمەتتەردىڭ الۋدى ىڭعايلى ەتۋ ءۇشىن بانكتەردىڭ قوسىمشاسى ارقىلى اۆتوكولىكتەردى تىركەۋ قىزمەتتەرى قولجەتىمدى. باسقا دا قوسىمشالاردا مەملەكەتتىك قىزمەتتەردى الۋعا بولادى، - دەپ اتاپ ءوتتى باعدات مۋسين ماجىلىستە.

eGov ءموبيلدى قوسىمشاسى سيفرلىق قۇجاتتار قىزمەتىن جۇزەگە اسىرادى، وندا ەلەكتروندى فورماتتا 18 قۇجات ءتۇرى بار. قازىرگى ۋاقىتتا 5،3 ميلليون قازاقستاندىق «سيفرلىق قۇجاتتار» قىزمەتىن پايدالانادى.