جىل وتكەن سايىن اۋىلشارۋاشىلىقپەن اينالىساتىن شارۋالاردىڭ جۇمىسى شاتقاياقتاپ بارادى. نەگە؟ وتكەن جىلى قانشاما شارۋا پياز ەگىپ شىعىنعا مولىنان باتتى. قاۋىن-قاربىز ەگۋشى ديقاندار دا بىرنەشە جىل ونىمدەرىن دالادا قالدىردى. سونىڭ سالدارى ما بيىل قازاقستاندا باقشا داقىلدارىنىڭ ەگىس القابى 8،9% - عا ازايىپتى، دەپ حابارلايدى aqshamnews.kz.
قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ (ۇبس) ەسەپتەرىنە سايكەس، بيىلعى ماۋسىمدا قاربىز مەن قاۋىن 98،1 مىڭ گەكتار جەرگە ەگىلگەن. سالىستىرمالى تۇردە وتكەن جىلى جالپى ەگىس القابى 107،6 مىڭ گەكتار بولعان. بيىلعى جىلى قاۋىن-قاربىزدى ەگۋگە شارۋا قوجالىقتارى مەن جەكە كاسىپكەرلەر كوبىرەك باسىمدىق بەرىپتى. ناتيجەسىندە ەگىس القاپتاردىڭ 82%-نا كاسىپكەرلەر ءدان ەككەن.
بيىلعى جىلى دا قاۋىن-قاربىز ەگۋدەن تۇركىستان وبلىسىنان ەشكىم باسىپ وزا المادى. ەلىمىزدەگى ىستىق ايماقتا قاۋىن-قاربىز الاڭى 73،8 مىڭ گەكتارعا جەتكەن. بۇل ەل اۋماعى بويىنشا جالپى الاڭنىڭ 75،2%-ى. وڭتۇستىك وبلىستاردا قاۋىن وسىرەتىن ورتاڭقول شارۋالار دا بار. ءبىراق ولار بيۋدجەتتەن كومەك بولماعان سوڭ قۇلقى كەتە باستاعان. جالپى ەگىس القابىنىڭ 17،9 مىڭ گەكتارىنا داقىل ەككەن.
ۇلتتىق ستاتيستيكا بيۋروسى مالىمەتتەرى بويىنشا، وتكەن جىلى ديقاندار 2،8 ميلليون توننا باقشا داقىلدارىن جيناعان. ونىڭ 1،4 ميلليون تونناسى قاربىز. بۇل قيىن، قۇرعاقشىلىق ورىن العان وتكەن جىلعى جەتكەن جەتىستىك. ال 2024 جىلى سۋارمالى سۋ جاعدايى جاقسى جاققا وزگەردى. كوكتەمگى سۋ تاسقىنىنان كەيىن شاردارا سۋمەن جابدىقتاۋ قويماسى 90% - عا تولدى. دەمەك تۇركىستان وبلىسىنىڭ ديقاندارى ءۇشىن بۇل وتە قولايلى جاعداي. ءتىپتى، وسىنداي مۇمكىندىكتى پايدالانىپ، ەكىنشى رەت ءونىم الۋعا مۇمكىندىكتەرى بار. سوندىقتان بىلتىرعى كورسەتكىشتى باسىپ وزۋعا نيەت ءبىلدىرۋى ءتيىس. وتكەن جىلعى كورسەتكىشتى جاڭارتا الار ما ەكەن. ونى ۋاقىت ەنشىسىنە قالدىردىق.